Վարդան Արամյան. «Մեզ համար ամենակարևորը ոչ թե գործընթացն է, այլ՝ արդյունքը»

АНАЛИТИКА 17 Июнь, 2017 10:14

Նոր կայք, «Վեբինար» կոչվող կայքի նոր հավելված, որի միջոցով հնարավոր է կազմակերպել առավել կարևոր, արդիական թեմաների շուրջ մասնագիտական կամ հանրային օպերատիվ քննարկումներ ու միևնույն ժամանակ օնլայն պատասխանել բոլոր հարցերին:

Անմիջապես հավելենք, որ ՀՀ ֆինանսների նախարարություն–լրագրողական համայնք հանդիպման միակ առիթը, սակայն, միայն գերատեսչության նոր կայքի, նոր հնարավորությունների ու հարթակի մասին իրազեկելը չէր: Հանդիպման օրակարգում ներառված էին նաև հունվար–մայիս ամիսների ֆինանսատնտեսական ցուցանիշների, կառավարության կատարողականի, առցանց պարտատոմսերի ձեռքբերման հնարավորության մասին հարցերը, որոնց մենք հետագայում ավելի մանրամասն կանդրադառնանք առանձին–առանձին:

ՀՀ ֆինանսների նախարար Վարդան Արամյանը նշեց, որ եթե առաջին եռամսյակում ՀՆԱ–ի աճը կազմել է 6,5%, որը նրա կարծիքով բավականին լավ ցուցանիշ է առաջին եռամսյակի համար, ապա տարվա համար թիրախավորած 3,2% ՀՆԱ–ի աճին հասնելն իրագործելի կլինի, որն այն նվազագույն շեմն է, որին ձգտում է կառավարությունը:

Ի դեպ, ՀՆԱ–ի աճին նպաստել են արդյունաբերությունը, ծառայությունները և առևտուրը: Տնտեսական ակտիվության ցուցանիշի համաձայն`հունվար–ապրիլ ամիսներին ունեցել ենք 5,7% ցուցանիշ: Դրան նպաստել են երկրի արդյունաբերության, ծառայությունների ոլորտները: 5,7%–ի 4,5%–ը բաժին է ընկել ծառայություններին, 2,4%–ը` արդյունաբերությանը, իսկ գյուղատնտեսությունը և շինարարությունը առաջին հինգ ամիսներին գրանցել են բացասական արդյունքներ:

Արտահանում–ներկրում ցուցանիշներով արտահանումը շարունակում է առաջանցիկ աճ գրանցել, ներմուծման համեմատ: Վերջին հինգ ամիսների ընթացքում եթե 16%–ից մի փոքր ավել արտահանում է իրականացվել, ապա ներմուծումը կազմել է 14%–ից է մի փոքր ավելի և արտահանման ցուցանիշը շարունակում է ավելի արագ աճել, քան ներմուծմանը: Հարկերի հավաքագրման մասով առաջին եռամսյակը 13 միլիարդ դրամի չափով ավելի բարձր ցուցանիշ է արձանագրել, քան պլանավորված էր:

«Հետճգնաժամային ժամանակաշրջանում սա առաջին դեպքն է, երբ հարկերի հավաքագրման շեմը շուրջ 50 միլիարդով բարձրացվեց: Եվ այն վարքագիծը, որը մենք ունեցել ենք այս մասով, մեզ թույլ է տալիս ասել, որ մենք դեռևս շարժվում ենք ճշգրտված ու բարձր ծրագրային ցուցանիշով: Ապրիլ–մայիս ամիսներին նախորդ տարվա ցուցանիշների համեմատ ավելի քան 10 միլիարդ դրամով հարկերի հավաքագրման աճ ունենք, և այս սցենարը եթե շարունակվի ամբողջ տարվա ընթացքում, ապա 1 տրիլիոն 197 միլիարդ ծրագրային ցուցանիշը կիրականացվի»,– ասաց ՀՀ ֆինանսների նախարարը:

Վ.Արամյանի խոսքով՝ այդ նշաձողը բավականին ամբիցիոզ է և դրան հասնելու համար հարկավոր է ջանքեր գործադրել, սակայն ներկայի հարկերի հավաքագրման վարքագիծը թույլ է տալիս ենթադրել, որ կառավարությունն այնուամենայնիվ կկարողանա իր ամբիցիոզ ծրագիրն իրագործել:

Ծախսերի մասին ֆինանսների նախարարն ասաց, որ առաջին եռամսյակում նախատեսվածից շուրջ 26 միլիարդ դրամ է խնայվել, իսկ ապրիլ–մայիս ամիսներին ծախսերը ծրագրավորածի չափով է իրականացվել: Այսինքն՝ առաջին կիսամյակի ընդհանուր ցուցանիշներով խնայողությունները մի փոքր ավելի պակաս կլինեն, քան առաջին եռամսյակում էր:

«Այն հիմնական թիրախները, որոնք որ մենք մեր առջև դրել էինք ամբողջությամբ կատարել ենք: Եվ մեզ համար ամենակարևորը ոչ թե գործընթացն է, այլ՝ արդյունքը, որը հանրության համար կարող է օգտակար լինել»,– ասաց Վ. Արամյանը:

Նա նաև տեղեկացրեց, որ արդեն իսկ լուծվել է նաև գնման պայմանագրերի կատարման գործընթացի հարցը և այն նույնպես այսուհետ էլեկտրոնային հարթակի միջոցով կիրականացվի: Դա թույլ կտա, որ այսուհետ փաստաթղթերի մուտքագրման ժամանակ բացառվի նաև մարդկային միջամտության գործոնը, ինչը է՛լ ավելի կնվազեցնի կոռուպցիոն ռիսկերը և կբարձրացնի գործընթացի արդյունավետությունը:

«Հետայսու հնարավոր չի լինելու աշխատանքն ընդունել և հետագայում, հետին թվով ստորագրել և մուտքագրել ակտերը և ստանալ ֆինանսավորումը: Կամ ընդունման–հանձնման ակտը մուտքագրելուց հետո հետագայում, երբ այն ինչ–ինչ պատճառներով արդյունքների հետ չհամապատասխանի, փորձեն ընդունման–հանձնման ակտը փոխել և համապատասխանեցնել կատարված աշխատանքին»,– ասաց ՀՀ ֆինանսների նախարար Վարդան Արամյանը:

ԱրմինեԳրիգորյան