«Միշտ վախեցել եմ չհասցնելուց». Լուիզա Ղամբարյան

ЛАЙФ 19 Июль, 2017 12:26

Past.am-ի բլից հարցերի թիրախում այս անգամ սիրված դերասանուհի Լուիզա Ղամբարյանն է:

- Ձեր օրն սկսվում է...

- Դստերս առավոտյան դպրոց տանելով:

- Ո՞վ կամ ի՞նչն է Ձեր ոգեշնչման աղբյուրը:

- Կյանքի տարբեր իրավիճակներում տարբեր մարդիկ և տարբեր երևույթներ կարող են լինել ոգեշնչման աղբյուր: Բայց իմ կայուն և մշտական ոգեշնչման աղբյուրն ընտանիքս է:

- Գեղեցիկը Ձեզ համար...

- Բնության մեջ է:

- Ու՞մ եք դիմում, երբ հուսահատ եք:

- Ինքս ինձ:

- Կյանքում երբեք չեք ների...

- Կփորձեմ չառանձնացնել որևէ բան, կփորձեմ ներել ամեն դեպքում:

- Ձեր ամենամեծ հիասթափությունը...

- Ես չունեմ այդպիսի մեծ և միակ, առանցքային ճակատագրական հիասթափություն: Իմ կյանքում ամեն ինչ շատ սահուն է ընթացել, և՛ հաջողությունները, և՛ անհաջողությունները, և՛ մարդկային տարբեր տեսակների ճանաչումը, կյանքում մեծ հիասթափություն չեմ ապրել:

- Մի բան, որի համար շատ եք փոշմանել:

- Այդպիսին նույնպես չեմ կարող առանձնացնել:

- Ձեր կյանքի ամենառոմանտիկ հանդիպումը...

- Դրա մասին ես կլռեմ:

- Երբ բարկացած եք...

- Փորձում եմ արագ ի մի բերել ինձ, գտնել բարկանալու պատճառը և վերացնել այն: Փորձում եմ հնարավորինս արագ և սթափ պատասխան տալ այդ ամենին և դուրս գալ ստեղծված իրավիճակից:

- Ձեզ հասկանալու համար դիմացինը պետք է...

- Ուղղակի ցանկություն ունենա՝ ինձ հասկանալու: Ինձ հասկանալը շատ դժվար չէ:

- Եթե լինեիք ամենազոր...

- Այնպես կանեի, որ մարդիկ շատ երկար տարիներ ապրեին երիտասարդ, ծաղկուն տարիքում և ավելի կարճ տևեր ծերությունը:

- Հայրենիքը Ձեզ համար...

- Իմ գոյության, իմ հայ լինելու ամենամեծ հպարտությունն է: Ես հպարտանում եմ իմ հայրենիքով:

- Ձեր կյանքի ամենամեծ ձեռքբերումը...

- Իհարկե, ես կպատասխանեմ՝ որպես ամենահասարակ, ամենաերջանիկ ու բավարարված կին. դա իմ ընտանիքն է:

- Ամենաշատը երազում եք...

- Դստերս տեսնել երջանիկ:

- Երբեք չեք փորձի...

- Շատ բաներ:

- Մարդ, ով ինչ-որ առումով փոխել է Ձեզ...

- Այդպիսիք նույնպես շատերն են եղել իմ կյանքի տարբեր ժամանակահատվածներում: Ես մշտապես գնահատում ու գիտակցում եմ այդ մարդկանց կատարած դերը, կարևորությունն ու առաքելությունն իմ կյանքում: Դրանք իմ ծնողներն են, իմ ուսուցիչները, իմ սիրելի մարդիկ:

- Աշխարհի լավագույն վայրը Ձեզ համար...

- Իմ անկյունն է:

- Տանել չեք կարողանում, երբ...

- Ստում են:

- Միշտ վախեցել եք...

- Չհասցնելուց:

- Մի բառով բնորոշեք ինքներդ Ձեզ:

- Պայծառ տեսակ:

- Տարվա ո՞ր եղանակի հետ եք Ձեզ ասոցացնում:

- Բոլոր եղանակներն էլ իմ մեջ կան:

-Իր, որ միշտ Ձեզ հետ է:

- Հեռախոս, դրամապանակ:

- Երջանկության՝ Ձեր բանաձևը...

- Կարողանալ ապրել և ձգտել կատարյալին:

- Վերջին անգամ ե՞րբ եք արտասվել:

- Շաբաթ օրը՝ ներկայացման ժամանակ:

- Կյանքում Ձեր գերագույն նպատակը...

- Ապրել իմ հայրենիքում, ապրել երջանիկ, խաղաղ երկրում և իմ ընտանեկան երջանկության մեջ:

- Ուրիշ ի՞նչ հարցի կցանկանայիք պատասխանել, որը չհնչեց:

- Այս պահին բոլոր հարցերն ինձ հետաքրքիր էին, և չկա մի այնպիսի հարց, որը կուզենայի՝ հնչեցվեր և ես պատասխանեի:

- Եվ վերջում...

- Եվ վերջում՝ սեր:

Մարիամ Նալբանդյան