Անկարայում պայթյունների հետեւանքով զոհվածների տարբեր թվաքանակներ են հաղորդվում

Անկարայում հոկտեմբերի 10-ի առավոտյան երկաթուղային կայարանի մոտ թուրք-քրդական բախումներին վերջ դնելու խաղաղության կոչերով հանրահավաքի ժամանակ տեղի ունեցած երկու հզոր պայթյունների հետեւանքով զոհվածների տարբեր թվաքանակներ են հաղորդվում:

Թուրքական «Միլիեթ» թերթը հայտնում է, որ պաշտոնական տվյալներով` պայթյուններից զոհվել է 97 եւ վիրավորվել 246 քաղաքացի: Զոհվածներից 92-ի ինքնությունն արդեն հայտնի է:

LifeNews կայքը հայտնում է, որ Անկարայում տեղի ունեցած ահաբեկչության զոհերի թիվը հասել է 126-ի, վիրավորների թիվը` մոտ 400-ի:

Թուրքիայի խորհրդարանում 80 պատգամավորներ ունեցող միակ քրդական Ժողովուրդների դեմոկրատական կուսակցության (HDP) կարծիքով` պայթյունների հետեւանքով զոհվել է 128, վիրավորվել 516 մարդ: 

ANF News կայքը հայտնել է, որ Թուրքիայի հանրային աշխատավորների արհմիությունների համադաշնությունը (KESK), Հեղափոխական աշխատավորների արհմիությունների կոնֆեդերացիան (DISK) եւ Մարդու իրավունքների միությունը (IHD) այսօր առավոտյան Անկարայում քուրդ-թուրքական բախումների դեմ հանրահավաքից առաջ տեղի ունեցած երկու պայթյունների համար մեղավոր է համարել իշխող «Արդարություն եւ զարգացում» կուսակցությանը (AKP) եւ Թուրքիայի նախագահ Ռեջեփ Թայիփ Էրդողանին: 

Հիշյալ ՀԿ-ների` այդ մասին տարածած հայտարարության մեջ ասվում է, որ մահապարտ ահաբեկիչների գլխավոր թիրախը եղել է հանրահավաքին եկած քրդական Ժողովուրդների դեմոկրատական կուսակցության (HDP) անդամների ավտոմեքենաների շարասյունը, ինչով ցանկացել են սպանել երկրում խաղաղություն եւ հաշտություն ցանկացողներին:

Կազմակերպությունների ղեկավարները հայտարարության մեջ նշել են, որ չեն հրաժարվելու Թուրքիայում քաղաքացիների միջեւ համերաշխության եւ խաղաղության համար իրենց պայքարից:

Միջադեպի առնչությամբ HDP-ի համնախագահ Սալահեթդին Դեմիրթաշը ուշադրության է հրավիրել այն բանի վրա, որ Անկարայի կոտորածը համընկել է Քրդստանի աշխատավորական կուսակցության (PKK) մարտիկների կողմից զինադադար հայտարարվելու ժամանակաշրջանի հետ:

«Մենք դեմ դիմաց կանգնած ենք մաֆիայի վերածված, մարդասպան դարձած եւ սերիական մարդասպանի պես իրեն պահող պետական հասկացության առաջ», -ասել է Դեմիրթաշը:

Թուրքիայում թուրք-քրդական բախումներն ահագնացել են երկու ամիս առաջ Ուրֆայի Սուրուչ քաղաքում քրդական երիտասարդական հասարակական կազմակերպության կողմից ի պաշտպանություն Սիրիայում «Իսլամական պետություն» ահաբեկչական խմբավորման դեմ սիրիացի քրդերին աջակցելու համար անցկացվող հավաքի ժամանակ իրականացված պայթյունից հետո, որի ժամանակ 32 մարդ սպանվել, 100-ից ավելի մարդ վիրավորվել էին: