Հակոբ Սանասարյան. «Ամուլսարից անտեղյակ մարդիկ կգովաբանեն Ռուբեն Վարդանյանին, խնդիրը հասկացողները՝ կանիծե՞ն». «Փաստ»

«Փաստ» օրաթերթը գրում է.

Կիրակի օրը տեղի ունեցավ «Ավրորա» մարդասիրական նախաձեռնության մրցանակաբաշխությունը, որի համահիմնադիրներ Ռուբեն Վարդանյանը և Նուբար Աֆեյանը միաժամանակ Ամուլսարի հանքի վարկատու «Ամերիաբանկի» տնօրենների խորհրդի անդամներն են:

Հայտնի բարերար, գործարար Ռուբեն Վարդանյանի մի կողմից «Ավրորայի» մրցանակաբաշխությունը կազմակերպելու, մյուս կողմից էլ՝ վտանգավոր հանքարդյունաբերությանը, մասնավորապես՝ Ամուլսարի ծրագիրը հովանավորելու հետ կապված՝ կարծիք է հայտնել Հայաստանի կանաչների միության նախագահ Հակոբ Սանասարյանը:

Ըստ Սանասարյանի. «Մի կողմից հոսում են բարեգործական կոչված, անվերադարձ դրամաշնորհներ, մյուս կողմից կողոպտվում է, քայքայվում, փոշիանում երկիրը: Ես չեմ կարծում, որ Ռուբեն Վարդանյանը լիովին հասկանում է իր արածը: Նա հավանաբար չգիտի, որ Ամուլսարի շահագործումը նշանակում է ոչնչացնել Որոտան և Արփա գետերը, որոնցով տարեկան հոսում է 1 միլիարդ 300 միլիոն խորանարդ մետր ջուր, որն ամբողջովին կթունավորվի ու կաղտոտվի: Տարիների ընթացքում այդ գետերի հովիտները դառնալու են ապրելու համար ոչ պիտանի, բնակչությունը այդ տարածքներից արտագաղթելու է»:

Բնապահպանը նաև կարծում է, որ բազմակողմանի զարգացած լինելուն զուգահեռ մարդը չի կարող բոլոր բնագավառները խորությամբ հասկանալ և ընկալել: «Եթե նա գոնե մի քանի ամիս ուսումնասիրի խնդիրը, կհասկանա՝ ինչ է»,– ասաց նա:

Բացի այդ Հակոբ Սանասարյանը «Փաստի» հետ զրույցում մի առաջարկ արեց, ըստ որի այն մեծահարուստները, պետական պաշտոնյաները, ովքեր Հայաստանի քաղաքական կաթսան են համարվում, գոնե մեկ անգամ պետք է մի լսարանում հավաքվեն, որտեղ իրենց 2–3 մասնագետ ցույց կտան, թե ինչպիսի աղետ է իրենից ներկայացնում հանքարդյունաբերության արագացված թափը, մասնավորապես՝ Ամուլսարի շահագործումը Հայաստանի համար:

Մյուս կողմից էլ, ըստ Սանասարյանի՝ մի ծախու պրոֆեսոր իր աշխատավարձը ապահովելու համար կարողանում է համոզել մարդկանց, որ այդ ամենը ոչ մի վտանգ չի ներկայացնում:

«Ռեալ կարելի է մտածել, որ Ռուբեն Վարդանյանն այդ խնդրից տեղյակ չի, այսինքն՝ լսել է Ամուլսարի մասին, գիտի որ այնտեղ 2 գետ կա, բայց չգիտի՝ ինչ աղետով է հղի այն, ինչ անդառնալի հետևանք է ունենալու Հայաստանի համար: Սա կործանման ծրագրերից մեկն է: Ամենակուսական մասը մորթոտում ենք»,– ասաց մեր զրուցակիցը:

Մեր այն դիտարկմանը, թե մի կողմից «Ավրորայի» մրցանակաբաշխությունից հրճված հայերը, մյուս կողմից բնապահպանների ու գիտակից մարդկանց ցավն ու ապրումները հանքարդյունաբերության արդյունքում բնական ռեսուրսներին հասցվող վնասի համար, կարելի՞ է միմյանց կողքին դնել՝ Սանասարյանը պատասխանեց, որ կան մարդիկ, ովքեր կարողությունների և ինֆորմացիայի մատչելիության առումով կարող է չիմանան, թե ինչն է Հայաստանին խոշոր օգուտներ կամ վնասներ հասցնում: Այդ մասսան, իհարկե, հիացած պիտի լինի Ռուբեն Վարդանյանի նախաձեռնությամբ, իսկ բոլոր նրանք, ովքեր խնդիրը հասկանում են, միայն պետք է անիծեն նրան:

 Շարունակությունը` «Փաստ» օրաթերթի այսօրվա համարում: