Երեխաների պաշտպանության օրը կնշվի դասական երաժշտության համերգով

ОБЩЕСТВО 29 Май, 2017 14:03

Երեխաների պաշտպանության օրվա կապակցությամբ հունիսի 1-ին «Արամ Խաչատրյան» համերգասրահում փոքրիկներին կներկայացվի «7» նախագիծ-համերգային ծրագիրը: Համերգ-շոուի ընթացքում հանդիսատեսը ոչ միայն կունկնդրի դասական երաժշտարվեստի սիրված ստեղծագործություններ, այլև ակտիվ մասնակցություն կունենա միջոցառմանը: Այս մասին մայիսի 29-ին լր ագրողների հետ հանդիպմանը խոսեցին ծրագրի նախաձեռնողներ Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը և հաղորդավար Ավետ Բարսեղյանը:

«7» նախագիծը միտված է դասական երաժշտությունը փոքրիկներին ու մեծերին խաղի տեսքով ներկայացնելուն: Ներկայացվելու են հայտնի դասական ստեղծագործություններ: Համերգն ինտերակտիվ է. փոքրիկ հանդիսատեսին խաղի տեսքով կսովորեցնենք շաբաթվա օրերը, գույները և այլն»,-«Արմենպրես»-ի հաղորդմամբ՝ նշեց Ավետ Բարսեղյանը:

Նա հավելեց, որ համերգի խորագիրը խորհրդանշական է, քանի որ Աստված աշխարհը արարել է յոթ օրում, գույները յոթն են, շաբաթվա օրերը յոթն են: Ելնելով ծրագրի վերնագրից` նախաձեռնողները հորինել են դասական երաժշտության հանդեպ գործված յոթ մեղք` համերգի ընթացքում բջջային հեռախոսի ձայնը միացնելը, մաստակ ծամելը և այլն: Կազմակերպիչները ցանկանում են, որ երեխաները հետագայում չգործեն այդ մեղքերը:

Ավետ Բարսեղյանը շեշտեց, որ դասական երաժշտությունը միշտ բարձունքում կլինի, սակայն նոր մոտեցումներ են պետք այն երեխաներին ընկալելի և հասանելի ներկայացնելու համար:

Սերգեյ Սմբատյանի խոսքով` իրենք փորձում են ստեղծել ձևաչափ, որը հետաքրքիր կլինի երեխաների և մեծահասակների համար: «Կլինեն բազմաթիվ անակնկալներ, որոնց մասին անգամ ես տեղյակ չեմ: Պետք է խոստովանեմ, որ ինձ համար իսկապես հետաքրքիր է այս նախագիծը»,-ասաց նա:

Հանդիպման ավարտին ներկաների համար երգեցին թիվ 12 մանկապարտեզի սաները:

Երեխաների և նրանց ծնողների համար նախատեսված ինտերակտիվ համերգ-երեկոն կրթադաստիարակչական նշանակություն ունի:

Դասական երաժշտության համերգին կներկայացվեն աշխարհի 7 հրաշալիքները, ծիածանի 7 գույները, 7 նոտաները, 7 առաքինությունները և այլն։ Երեխաները կտեղեկանան նաև, թե ինչ է նվագախումբը, ինչ դեր ունի դիրիժորը և այլն։

Երեկոյի ընթացքում սպասվում են յուրահատուկ անակնկալներ:

Նախագիծն իրականացվում է ՀՀ նախագահի տիկին Ռիտա Սարգսյանի հովանու ներքո և ՀՀ մշակույթի նախարարության աջակցությամբ:

Երեխաների պաշտպանության միջազգային օրը սահմանվել է 1925 թվականին` Ժնևում երեխաների պաշտպանության համարհրավիրված համաշխարհային կոնֆերանսի ընթացքում:

1949 թվականին Կանանց ժողովրդավարական միջազգային դաշինքը երեխաների պաշտպանության օր անցկացնելու որոշում էընդունել: ՄԱԿ-ը, հավանություն տալով այս նախաձեռնությանը, հայտարարել է երեխաների կյանքի և առողջությանպաշտպանության հարցը իր գործունեության գերակա ուղղություններից մեկը: Առաջին անգամ հունիսի 1-ը նշվել է որպեսերեխաների պաշտպանության միջազգային օր 1950 թվականին: