Հայաստանում կայացած վենչուրային ֆորումում մինչև 9 ստարտափեր կարող են ստանալ դրամաշնորհներ

ОБЩЕСТВО 4 Май, 2017 15:35

Հայաստանում մայիսի 4-ին կայացած վենչուրային ֆորումին նորարություններին ուղղված համաֆինանսավորվող դրամաշնոհային մրցույթում բարձր տեխնոլոգիական ուղղվածություն ունեցող 24 ընկերություն հանդես եկան ինովացիոն լուծումներով: «Արմենպրես»-ի հաղորդմամբ` մրցույթի շրջանակում 2017, 2018/2019 թվականների ընթացքում կհատկացվի 30 -50 հազար եվրոյի չափով դրամաշնորհ` նախատեսված առավելագույնը 12 ամիս տևողությամբ ծրագրերի համար: Ծրագրի նպատակն է խթանել տեխնոլոգիաների յուրացման ընթացքն ու գիտական հետազոտությունների արդյունքների առևտրայնացումը, ինչպես նաև խրախուսել համագործակցությունը գիտության և մասնավոր հատվածի, հատկապես հայաստանյան ՓՄՁ-ների միջև:

Նորարարություններին ուղղված համաֆինանսավորվող ծրագիրն իրականացվում է Ձեռնարկությունների ինկուբատոր հիմնադրամի կողմից` «Աջակցություն ՓՄՁ զարգացմանը Հայաստանում» ծրագրի շրջանակում, որը համաֆինանսավորվում է Եվրամիության, ինչպես նաև Գերմանիայի դաշնային հանրապետության տնտեսական համագործակցության և զարգացման նախարարության կողմից և իրականացվում է ԳՄՀԸ «Մասնավոր հատվածի զարգացումը Հարավային Կովկասում» ծրագրի շրջանակում:

Ձեռնարկությունների ինկուբատոր հիմնադրամի տնօրեն Բագրատ Ենգիբարյանի խոսքով` ծրագիրն այն թիմերի համար է, ովքեր ունեն պրոդուկտ, որը պետք է շուկա տանեն կամ արդեն շուկայում է:

«Մոտ 80 թիմ էին դիմել, նրանց հետ 4 ամիս աշխատանքներից հետո 24-ն այսօր վերջնական հնարավորություն ունեն ներկայացնելու իրենց լուծումները: Մի սկզբունքային սահմանափակում ունեինք` կազմակերպությունները պետք է ունենային ճարտարագիտական կամ տեղեկատվական տեխնոլոգիաների որոշակի լուծումներ: Շատ ուրախ եմ, որ մեծ քանակությամբ թիմեր դիմեցին, քանի որ բավականին լուրջ մարտահրավեր էր նման մրցույթ հայտարարելը: Այս տարի բացառիկ է նաև ժյուրիի կազմը: Ունենք 7 ժյուրիի անդամներ, որոնք ներկայացնում են ԱՄՆ-ն, Իսպանիան, Հոլանդիան և Գերմանիան: Նրանցից շատերը նրդրողներ են և շատ հայտնի կազմակերպությունների հիմնադիրներ: Ներկա են նաև տեղական վենչուրային ֆորումների և համալսարանների ներկայացուցիչներ: Այսինքն` կազմակերպությունները կարող են համապարփակ գնահատվել և կարծիքներ ստանալ»,- ասաց Ենգիբարյանը` կարծիք հայտնելով, որ նախաձեռնությունը դեռ մեծ ճանապարհի սկիզբն է: Նրա հավաստմամբ` ծրագիրը միայն դրամաշնորհ ստանալու համար չեն իրականացնում. դրամաշնորհը միայն կարագացնեի որոշ գործողություններ:

Ենգիբարյանի տեղեկացմամբ` հաղթողներն ընտրվելու են երեք հիմնական մեթոդաբանությամբ` թիմը պետք է վստահություն ներշնչի, որ կարող է բիզնեսն առաջ տանել, պետք է հիմնավորի, որ իր ծրագիրը ոչ միայն գաղափար է, այլև բիզնես-նախատիպ և պետք է կարողանա մի քանի րոպեում գրավել իր ծրագրերով:

Մրցույթի պայմաններից է, որ թիմերը պետք է տեխնոլոգիական որոշակի մակարդակի հասած լինեն, ներկայացնեն իրենց գաղափարների իրատեսականությունը, բիզնես-հաշվարկը, ռազմավարությունը և հետագա հնարավոր տեխնոլոգիական աշխատանքները:

Վերջում Ձեռնարկությունների ինկուբատոր հիմնադրամի տնօրենը հավելեց, որ մրցույթում կարող են հաղթել ոչ ավելի քանի 9 ծրագրեր, սակայն հնարավոր է չհաղթի ոչ մի ծրագիր:

«On your way» անվանմամբ ստարտափ ծրագրի հեղինակներ Մանե Սահակյանը և Գոռ Առաքելյանը ներկայացրել են ծրագիր, ըստ որի իրենց կայքի միջոցով մարդիկ կարող են գտնել ճամփորդների և նրանց խնդրել իրենց հետ բերել ինչ-որ ապրանքներ:

«Շատ մարդիկ իրենց ընկերներին, ովքեր մեկնում են արտերկիր, դիմում են, որպեսզի իրենց համար ինչ-որ իրեր բերեն: Մենք ցանկանում ենք այդ գործընթացը տեղափոխել օնլայն հարթակ, որտեղ շատ ճամփորդներ կլինեն, և հնարավոր կլինի շատ արագ գտնել համապատասխան մարդկանց և նրանց խնդրել ցանկալի իրեր բերել: Արդյունքում արտերկրից եկող մարդը փող է վաստակում, իսկ մենք վերահսկողություն ենք սահմանում գումարի վրա»,- ասաց Մանե Սահակյանը:

Ծրագրով նախատեսվում է, որ, եթե մարդ գտնում է համապատասխան ճամփորդին, ապա գումարը փոխանցում է կազմակերպությանը, որն էլ այն պահում է իր բիզնես հաշվեկշռի վրա, իսկ ճամփորդն իր փողով գնում է ցանկալի ապրանքը, այն հասցնում է պատվիրատուին, իսկ կազմակերպությունը փոխանցում է ճամփորդին փողը և վաստակած գումարը: Վաստակվող գումարը պայմանավորվում են պատվիրատուն և ճամփորդը: Որքան շատ գումար առաջարկի պատվիրատուն, այնքան շատ հետաքրքրված կլինեն ճամփորդները:

Թիմի խոսքով` վենչուրային ֆորումին մասնակցելու և հաղթելու շնորհիվ իրենք կկարողանան ավելի մեծացնել իրենց հաճախորդների ընդգրկունության շրջանակը և կլուծի որոշակի տեխնիկական խնդիրներ:

Նրանք նաև հավելեցին, որ ծրագիրն արդեն գործում է Լիբանան և ԱՄՆ ուղղություններով պատվիրատուների և ճամփորդների համար, իսկ իրենց ցանկությունն է այն գործարկել նաև Հայաստանում:

Մրցույթների մրցանակաբաշխությունը կկայանա մայիսի 5-ին:

«Ձեռնարկությունների Ինկուբատոր» հիմնադրամը (ՁԻՀ) տարածաշրջանի խոշորագույն տեխնոլոգիական բիզնես ինկուբատորներից և խորհրդատվական ընկերություններից մեկն է, որը գործում է Երևանում: Կազմակերպությունը հիմնադրվել է 2002թ. Համաշխարհային Բանկի «Ձեռնարկությունների Ինկուբատոր» ծրագրի շրջանակում և աջակցում է Հայաստանում տեղեկատվական և հեռահաղորդակցության տեխնոլոգիաների ոլորտի աճին՝ ստեղծելով նպաստավոր միջավայր նորարարության զարգացման, տեխնոլոգիաների կատարելագործման և ընկերությունների ընդլայնման համար: