Life.panorama.am-ի զրուցակիցն է երիտասարդ դերասան Սիսիան Սեփանյանը, ում հեռուստադիտողը ճանաչեց «Շանթ» հեռուստընկերության «Օտարը» հեռուստասերիալով: Սիսիանը, Թեհրանից Հայաստան գալով, անմիջապես ստացել է գլխավոր կերպար մարմնավորելու հնարավորություն: Անցած ճանապարհի եւ հայտնի դառնալու զգացողությունների մասին մենք զրուցել ենք Սիսիանի հետ, ով արդեն հասցրել է սիրվել հանրության կողմից:
Սիսան հեռուստադիտողը Ձեզ առաջին անգամ տեսավ «Օտարը» հեռուստասերիալում: Կպատմե՞ք, թե ինչպես հայտնվեցիք հեռուստատեսությունում:
- Ծնվել եմ Թեհրանում, մանուկ հասակից եղել եմ թատրոնում, հաղթանակներ եմ գրանցել ասմունքի տարբեր փառատոններում, այդ թվում նաեւ համահայկական «Շուշիի ասմունքի փառատոնում», որի շրջանակներում վերջին տարում ընդգրկվել էի ժյուրիի կազմի մեջ։ Պատանի տարիքում ընդունվել եւ ավարտել եմ «7-րդ արվեստ» դերասանական քոլեջը, ավարտելուց անմիջապես հետո տեղափոխվել Հայաստան։ Երևանում ուսումս շարունակել եմ բոլորովին այլ մասնագիտությամբ, սակայն շարունակել են մասնակցել տարբեր ներկայացումներում, նաեւ ունեցել եմ կարճամետրաժ գեղարվեստական ֆիլմերում նկարահանվելու փորձ։ Հեռուստատեսությունից ինձ նկատել են «The Name production>-ի փոքրիկ տեսահոլովակում եւ հրավիրել քասթինգի։
Այս ոլորտում նորեկ եք ու հետաքրքիր է` ինչպե՞ս եք Ձեզ այս ասպարեզում զգում: Ի վերջո, միանգամից գլխավոր կերպար են Ձեզ վստահել, այդ առումով դժվարություններ եղե՞լ են:
- Դժվարություններ, բնականաբար, եղել են, որովհետեւ գլխավոր հերոս մարմնավորելու պատասխանատվությունը մեծ էր, բայց դժվարություները ստեղծված են հաղթահարելու համար:
Թիմում ինտեգրվելը հե՞շտ էր: Խաղում եք փորձառու ու նաեւ վաստակավոր արտիստների հետ, ինչպե՞ս է կայանում նրանց հետ շփումը:
- Այո, հեշտ էր, քանի որ աշխատում եմ պրոֆեսիոնալ թիմի հետ, իսկ փորձառու խաղընկերների հետ կապը հրաշալի է եւ իրենցից նոր հմտություններ սովորելու առիթը բաց չեմ թողնում:
Այս ոլորտում բավական է մեկ անգամ հայտնվել ու սիրվել, որից հետո առաջարկները չեն պակասում, հիմա նոր առաջարկներ ու ծրագրեր ունե՞ք:
- Այո, ճիշտ եք, առաջարկներ արդեն իսկ ստացել եմ, բայց, կարծում եմ, ճիշտ կլինի, դեռեւս կենտրոնանալ ընթացիկ նախագծի վրա, քանզի, կարծում եմ, դա կօգնի ավելի որակյալ արտադրանք տալուն։
Հայտնիությունը դերասանի համար շատ կարեւոր է, փողոցում, երբ Ձեզ ճանաչում են, հաճելի է, թե բարդույթավորվում եք:
- Բարդույթավորվելու պատճառ չեմ տեսնում, միանգամայն հաճելի զգացողություն է, քանի որ լիցքավորվում ես միայն դրական էներգիայով։
Քանի որ Ձեր մասին առանձնապես ոչինչ չգիտենք, կպատմեք, թե ի՞նչ հետաքրքրություններ ունեք:
- Ընթերցանությունը դարձել է սովորություն։ Պոեզիայի սիրահար եմ, հետաքրքրվում եմ համաշխարհային գրականությամբ եւ կինոարվեստով։
Սիսիան, Ձեր թույլտվությամբ ուզում եմ տեղեկանալ նաեւ անձնական կյանքից, կցանկանա՞ք, որ Ձեր ապագա կինը լինի այս ոլորտից:
- Այս պահին միայնակ եմ, իսկ ինչ վերաբերվում է ապագա ընտրյալիս հետ նույն ոլորտում աշխատելուն, կարծում եմ, դա խնդիր չէ. մարդկային հարաբերությունները չեն կառուցվում մասնագիտական հիմքի վրա, կան ավելի կարեւոր հատկանիշներ , որոնց ես ուշաշդրություն եմ դարձնում եւ գնահատում աղջիկների մեջ։
