ՀՀ ՊՆ-ի նախաձեռնությամբ Checkpoint Software ընկերությունը ներկայացրեց կիբեռանվտանգության ոլորտի նորարարական լուծումներ

ОБЩЕСТВО 13 Апрель, 2017 19:49

ՀՀ պաշտպանության նախարարության և «ՀայՏեք» կիբեռանվտանգության կենտրոնի համատեղ նախաձեռնությամբ Softline Armenia ընկերությունը կազմակերպել է կիբեռանվտանգության խնդիրների քննարկմանը նվիրված գիտաժողով: «Արմենպրես»-ի հաղորդմամբ` մասնակիցներին ներկայացվեցին ո լորտի միջազգային առաջատարներից մեկի՝ Checkpoint Software ընկերության նորարարական լուծումները:

ՀՀ պաշտպանության նախարարիտեղեկատվական տեխնոլոգիաների գծովօգնական Արմեն Գնունու խոսքով` Checkpoint Software ընկերության մասնագետները ցույց կտան կիբեռանվտանգության ոլորտում ժամանակակից պաշտպանության մեթոդները: Նա նշեց, որ մասնակցելով նմանատիպ միջոցառումների` ՀՀ պաշտպանության նախարարությունը մեծացնում է իր փորձը տվյալ ոլորտում և, օգտագործելով ժամանակակից տեխնիկական ու ծրագրային ապահովում, փակում է հնարավոր հարձակման բոլոր բաց կետերը:

«Պաշտպանության նախարարությունը մշտապես ուսումնասիրում է իր ռեսուրսների վրա կատարված բոլոր հարձակումները, պաշտպանվում դրանցից և, անհրաժեշտության դեպքում, պատասխանում դրանց: Հարձակումներ լինում են տարբեր տեղերից, քանի որ հարձակվողները դրանք անում են տարբեր երկրների և քաղաքների IP-ներից: Վերջին շրջանում հարձակումներ են լինում ոչ թե պաշտպանության նախարարության սերվերային ռեսուրսների վրա, այլ մեծացել են հարձակումները ֆեյսբուքյան և թվիթերյան տիրույթներում, սակայն նախարարությունը չի կարող մեծ վնաս կրել, քանի որ նրա ցանկացած վիրտուլ հաշիվ պաշտպանված է երկշերտ պաշտպանվածության գաղտնաբառերով, որոնք թույլ են տալիս առավելագույնս պաշտպանվել»,-ասաց Գնունին` հավելելով, որ բոլոր նմանատիպ խնդիրները լուծված են:

Նրա խոսքով` իրենք փորձում են ոչ թե պաշտպանվել, այլ զարգացնել գիտելիքները, որպեսզի պատրաստ լինեն նոր տիպի հարձակումներին: Անդրադառնալով հետագա անելիքներին` պաշտպանության նախարարի օգնականը տեղեկացրեց, որ ժամանակ առ ժամանակ կազմակերպելու են նման միջոցառումներ, հրավիրելու են տարբեր ոլորտների մասնագետների ու փորձելու են ծանոթանալ նորանոր լուծումներին և ավելացնեն իրենց գիտելիքները:

«ՀայՏեք» կիբեռանվտանգության կենտրոնի գործադիր տնօրեն Լևոն Պետրոսյանը նշեց, որ պաշտպանության նախարարության նախաձեռնությամբ ստեղծված «ՀայՏեք» կիբեռանվտանգությունը մի հարթակ է, որտեղ հանդիպում են պետական և մասնավոր հատվածները: Այդ հարթակում, ըստ Պետրոսյանի, կարևորվում է համագործակցությունը:

«Կենտրոնն ունի գործունեության մի քանի ուղղություններ: Առաջին ուղղությունը կիբեռանվտանգությունն է, որի համար համագործակցում ենք ոլորտի միջազգային առաջատար կազմակերպությունների հետ: Մյուս` ուսումնական ուղղաթյամբ, նախազորակոչային տարիքի երիտասարդների մասնագիտական վերապատրաստում ենք իրականացնում, այնուհետև նրանք զորակոչվում են բանակ և ծառայում ըստ մասնագիտական գիտելիքների»,- ասաց նա` հավելելով, որ նրանց մասնագիտական կարողություններն առավել արդյունավետ են օգտագործվում ծառայության ընթացքում:

Շարքային Բագրատ Գալստյանը փորձում է իր գիտելիքները ներդնել ՀՀ պաշտպանության նախարարության կիբեռանվտանգության ոլորտում, սակայն նրա խոսքով` անցկացվող դասընթացները նոր փորձի ձեռքբերման հնարավորություն են տալիս:

«Մեր ոլորտն այնպիսին է, որ ամեն օր նորանոր հարձակումներ են լինում, իսկ այդ պարագայում փորձը մեծ օգուտ է տալիս: Հարձակումները լինում են տարբեր տեսակի և տարբեր տեղերից: Մեր կիբեռբանկը զինված է ամեն անհրաժեշտ բանով: Պակաս բաները քիչ են, սակայն դրանք ժամանակի ընթացքում լուծվում են: Այդպիսի հարց չկա, որ մնա անպատասխան, այդպիսի խնդիր չկա, որ չլուծվի»,- նշեց շարքայինը` հավելելով, որ այդ ոլորտում հակառակորդը մեկը չի, սակայն եթե հակառակորդ ասելով նկատի ունենանք ադրբեջանցիներին, ապա շարքայինը սխալ է համարում նրանց հետ համեմատվելը:

Softline ընկերության հայաստանյան գրասենյակի տնօրեն Սարգիս Հարությունյանի տեղեկացմամբ` իրենք պաշտպանության նախարարության նախաձեռնությամբ հրավիրել են իրենց գործընկերներից մեկին` Checkpoint Software ընկերության ներկայացուցիչներին, ովքեր հանդիսանում են աշխարհում կիբեռանվտանգության և ինֆորմացիոն անվտանգության առաջատարներից, ներկայացնելու նորագույն լուծումները կիբեռանվտանգության ոլորտում:

«Նրանք կպատմեն իրենց փորձի և արտադրանքի մասին, որպեսզի մենք կարողանանք իրազեկված լինել աշխարհում եղած գործիքների մասին և հասկանալ, թե որը կարող ենք օգտագործել մեր անվտանգությունն ապահովվելու համար»,- նշեց Հարությունյանը:

ԱՊՀ երկրներում Check point կազմակերպության բիզնեսի զարգացման տնօրեն Ալեքսանդր Սավուշկինը գիտաժողովի ժամանակ ներկայացրեց կիբեռանվտանգության կարևորությունը: Նրա խոսքով` բոլորը բախվում են կիբեռհարձակումների խնդրին: Նա կարևոր համարեց ուժային կառույցների ներգրավվածությունը գիտաժողովին: Սավուշկինը հիշեցրեց երեք տարի առաջ Կիևում տեղի ունեցած կիբեռհարձակումը, ինչի հետևանքով խափանվեցին ատոմային էլեկտրակայանի և օդանավակայանի որոշակի տեխնիկական միջոցներ: Նրա տեղեկացմամբ` այդ հարձակման ժամանակ մասնագետները վերլուծեցին, հասկացան կիբեռ հարձակման պատճառները և փորձեցին գտնել դրան հակազդող միջոցառումներ: Ուկրաինայում այժմ սկսել են հատկացնել գումարներ կիբեռանվտանգության համար, այն դեպքում, երբ կիբեռհարձակվողներն արդեն հասել էին իրենց նպատակին:

«Թեման իրականում շատ հագեցած է և «թեժ»: Ես կարծում եմ, որ երրորդ համաշխարհային պատերազմն արդեն ընթանում է, սակայն այլ ֆորմատում: Այս թեման ներկայումս շատ արդիական է: Մեր ընկերությունում աշխատակիցների մեծ մասը վերլուծաբաններ են, որոնք զբաղվում են կիբեռհարձակումների վերլուծությամբ և ախտորոշմամբ: Մենք չենք կարող իմանալ, թե ով կարող է վաղը լինել կիբեռհարձակման զոհ, մենք չգիտենք չարամիտների գործողությունները: Ցանկացած չարամիտ այս կամ այն հարձակումը պատրաստելու համար միջոցներ և ժամանակ է ծախսում, այդ պատճառով նրանք կընտրեն ամ ենից թույլ պաշտպանված զոհին: Այդ պատճառով հարկավոր է լինել պաշտպանված, քան հետագայում մտածել վնասների մասին»,- ասաց ԱՊՀ երկրներում Check point կազմակերպության բիզնեսի զարգացման տնօրեն Ալքսանդր Սավուշկինը: