Վարչապետն ակնկալում է տրանսպորտի ոլորտում սահմանել ռադիկալ խաղի կանոններ

ОБЩЕСТВО 6 Апрель, 2017 13:11

Հայաստանի Հանրապետության բնակավայրերի տրանսպորտային հասանելիության մակարդակը բավարար չէ՝ 97 համայնք չի սպասարկվում ներմարզային երթուղիներով։ Այդ մասին ՀՀ կառավարության նիստում հայտարարեց վարչապետ Կարեն Կարապետյանը՝ ավելացնելով, որ խիստ անհրաժեշտ է համարում հանրապետությունում երթուղային ցանցի, մասնավորապես՝ներմարզային ցանցի արդիականացմանն ուղղված աշխատանքների անհապաղ իրականացումը:

Վարչապետը հիշեցրեց, որ Տրանսպորտի, կապի և տեղեկատվական տեխնոլոգիաների նախարարն արդեն ստացել էր համապատասխան հանձնարարական, սակայն ըստ նրա, հարկ է նշել, որ տրանսպորտային համակարգի բարեփոխումները սերտորեն կապված են նաև միջպետական, հանրապետական նշանակության և համայնքային ճանապարհների տեխնիկական վիճակի հետ: «Տվյալ խնդրի շուրջ ունեցել ենք քննարկումներ, բայց, կարծում եմ, ժամանակն է սահմանել խնդրի լուծման հստակ վերջնաժամկետները: Այդ իսկ պատճառով հանձնարարում եմ Տրանսպորտի, կապի և տեղեկատվական տեխնոլոգիաների նախարարի՝ երեքշաբաթյա ժամկետում ամփոփել և Կառավարության աշխատակազմ ներկայացնել հանրապետության և մարզերի համար նախատեսված ուղևորափոխադրման երթուղային ցանցի նոր տարբերակ, որի պարագայում կլուծվի նշված 97 բնակավայրերի ներմարզային երթուղիներով, ժամանակակից և հարմարավետ տրանսպորտային միջոցներով սպասարկման հարցը»,- «Արմենպրես»-ի հաղորդմամբ, ասաց վարչապետը:

Վարչապետի մեկ այլ հանձնարարականով երեքշաբաթյա ժամկետում պետք է ակտիվացնել Հայաստանի Հանրապետությունում միջպետական և հանրապետական նշանակության ճանապարհների ՀՀ պետական բյուջեից և վարկային ծրագրերով ֆինանսավորվող շինարարական-վերականգնողական աշխատանքները, և Կառավարության աշխատակազմ ներկայացնել տվյալ աշխատանքների վերաբերյալ ամփոփ տեղեկատվություն 2017 թվականին նախատեսված աշխատանքների վերաբերյալ:

Մեկամսյա ժամկետում էլ պետք է մշակվի և Կառավարության աշխատակազմ ներկայացվի «ՀՀ ճանապարհների շինարարության եւ պահպանման» հիմնադրամի ստեղծման անհրաժեշտության վերաբերյալ հիմնավորումը՝ հաշվի առնելով միջազգային լավագույն փորձը, և ներկայացնել առաջարկություն նշված հատուկ հիմնադրամը ֆինանսական ռեսուրսների ապահովման և հնարավոր աղբյուրների վերաբերյալ:

«Մենք պետք է միջպետական 1800 կմ, հանրապետական 1900 կմ, համայնքային 3800 ճանապարհների հստակ ռանգավորում ունենանք, յուրաքանչյուրի գնահատականը տանք, ցանցը էլեկտրոնային տարբերակով ունենանք՝ յուրաքանչյուր հատվածի վրա համապատասխան տեղեկատվությամբ: Երկրորդ՝ բոլոր վերանորոգման, շինարարական աշխատանքները կազմակերպելու ժամանակ քննարկեք տարբերակ, որ շինարարներին մենք պատվիրակելու ենք ճանապարհի հսկողությունն ու էքսպլատացիան, որպեսզի նա իմանա՝ լինելու է խնդրի մեջ: Այդ ամենը պետք է առավելագույնս բաց ու թափանցիկ անել»,- ասաց Կարեն ԿարապեÕ �յանը՝ հավելելով, որ պետք է տրանսպորտային ցանցը բաժանել լոտերի՝ ըստ շահութաբերության, որպեսզի պոտենցիալ ներդրողը հասկանա իր գործողությունը, բիզնեսի երկարատևությունը, պայմանը: «Պետք է խաղի կանոնները սահմանել սկզբունքային, ռադիկալ կերպով, երկարատև հորիզոնով: Շատ արագ ձեզնից սպասում ենք լուծումներ»,- դիմելով Տրանսպորտի նախարար Վահան Մարտիրոսյանին՝ ասաց ՀՀ վարչապետը: