Էրիկ. «Միշտ նախընտրել եմ հանելուկային կանանց»

Tert.am Life–ը գրում է.

Մարտի 8–ին` կանանց միջազգային օրվան ընդառաջ Tert.am Life–ը բլից հարցում է իրականացրել կնոջ մասին հայտնիների շրջանում։ Մեր զրուցակիցը երգիչ Էրիկն է։

-Եթե չլինի կինն ու գինին...

–Ի՞նչը կհաղթի կյանքում հերոսին, թե չլինեն կինն ու գինին։ Թե՛ գինին, թե՛ կինը ցանկացած տղամարդու վրա մեծ ազդեցություն են թողնում։ Կնոջ պարագայում տղամարդն ավելի խոցելի է։ Ցանկացած կին կարողանում է ազդել տղամարդու վրա։

 -Ինչպե՞ս երջանկացնել կնոջը:

–Խելացի կանայք շատ բան չեն պահանջում տղամարդուց։ Երջանիկ լինելու համար նրանց համար շատ բան պետք չէ` պարզապես, ուշադրություն։ Երբ կանանց հանդեպ ուշադիր ես, նրանք իսկապես երջանիկ են։ Կարծում եմ` առաջնայինը դա է։

-Ի՞նչ բառերով տղամարդը կարող է արտահայտել սերը կնոջ հանդեպ:

–Սեր բառն այնքան հարուստ է. չգիտեմ այլ ինչ բառով կարող ենք արտահայտել, որ համարժեք լինի։ Ես իմ երգերում տարբեր ձևերով եմ նկարագրել սերը։ Բայց ամենահարուստ արտահայտությունը «սիրում եմ»–ն է։

-Հե՞շտ է կնոջը բացահայտել:

–Երբեմն, կանայք լինում են շատ փակ ու անկանխատեսելի։ Միշտ նախընտրել եմ հանելուկային կանանց։ Նրանց նկատմամբ հետաքրքրությունը միշտ ավելի մեծ է։ Երբ կինը բացահայտված է լինում, հետաքրքրությունը կորում է և այլևս չես ցանկանում շարունակել շփվել։ Կանայք տարբեր են. կան կանայք, որ հեշտ են բացահայտվում, կան կանայք` այդպես էլ չես բացահայտում։

-Կնոջը բնորոշող 3 հատկանիշ:

–Ամենամեծ հատկանիշը, որը կնոջն ի վերուստ է տրված, մայրանալու կարողությունն է։ Երկրորդը` կինը շատ լավ ընկեր է։ Շատ հաճախ են ինձ հարցնում` դու կարող ես կնոջ հետ ընկերություն անել, թե վերջում ուրիշ բանի է վերածվում այն։ Միանշանակ կարող եմ ասել` այո, ես կարող եմ կնոջ հետ ընկերություն անել, քանի որ կինը առաջին հերթին շատ լավ ընկեր է։ Մյուս հատկանիշը կարծում եմ նվիրվածությունն է։ Կինը նվիրվող է և նույնը պահանջում է տղամարդուց։ Շատ հաճախ մենք այդ հատկանիշը սովորում ենք կանանցից։

-Ի՞նչ պետք է անի տղամարդը, երբ  կինը սխալ է:

–Ես ամեն դեպքում փորձել եմ միշտ բացատրել։ Սիրում եմ, որ տղամարդն ու կինը բանակցում են, խոսում են, փորձում են իրար հասկանալ։ Անթերի մարդ չկա և չկա նման սխալ, որ չկարողանաս շտկել։

-Ի՞նչ սխալներ են հաճախ թույլ տալիս տղամարդիկ:

–Մենք շատ սխալներ ենք թույլ տալիս։ Սովորաբար, առաջնորդվում ենք ցանկություններով, հետո հիշում ենք ուղեղի մասին։  Ոչ ոք թող հակառակը չհամոզի։ Կարծում եմ` մենք մի քիչ ուշ ենք հասկանում որոշ բաներ։ Խելացի մարդիկ միշտ իրենց արածների համար ներողություն են խնդրում, և դա ընդհանրապես ամոթ չէ։

-Ի՞նչ հատկանիշներ չպետք է բնորոշ լինեն կնոջը:

–Ես չեմ սիրում չափազանց ինքնավստահ կանանց։ Իհարկե, կինը պետք է լինի հպարտ, խելացի։ Խելացի կինը տղամարդուն չի նյարդայնացնում իր խելացիությամբ։ Տղամարդիկ սիրում են կանանց կողքին լինել կայացած և դա մեծ մասամբ գալիս է կնոջից։

 -Ո՞ր տղամարդկանց են սիրում կանայք:

–Կանայք տարբեր են, որոշները սիրում են ինտելեկտով հարուստ տղամարդկանց, որոշներն էլ` տղամարդու արտաքինը։ Վերջինի դեպքում հարաբերություները երկարատև չեն լինում։

-Տղամարդու ո՞ր քայլը կարող է հիասթափեցնել կնոջը:

–Կարծում եմ երկուսի դեպքում էլ ամենաանտանելին դավաճանությունն է։ Այն շատ ծանր է ընդունվում և երբեմն չի ներվում։

-Չսիրած արտահայտություններ, որ թույլ են տալիս կանայք:

–«Գնանք գնումներ անելու». սիրում եմ գնումներ կատարել, բայց ոչ կնոջ հետ։

Նյութը` Մելինե Տոնոյանի