Մարտակերտի թիվ 1 միջնակարգ դպրոցը կարողանում է պահպանել հիմնական կորիզն ու աշխատանքային բարձր տրամադրությունը

ОБЩЕСТВО 7 Февраль, 2017 13:52

Արցախի Հանրապետության Մարտակերտ քաղաքի Վլադիմիր Բալայանի անվան թիվ 1 միջնակարգ դպրոցը 2017 թվականի փետրվարի դրությամբ ունի 580 աշակերտ: Ինչպես «Արմենպրես»-ին պատմեց Մարտակերտի թիվ 1 միջնակարգ դպրոցի տնօրեն Լիդիա Պետրոսյանը, նախորդ տարվա նույն ժամանակահատվածում դպրոցն ունեցել է 625 աշակերտ: Ըստ տնօրենի՝ Ապրիլյան քառօրյա պատերազմի հետեւանքով թեեւ դպրոցական կյանքը մի քանի օր խաթարվել է, արկի պայթյունի ալիքից փշրվել են շենքի ապակիները, սակայն մի քանի օր ան ց այն կրկին վերադարձել է իր լիարյուն կյանքին: «Ապրիլյան պատերազմի օրերին մենք մեր տեղից չենք շարժվել, ավելին, ապրիլի 7-ին՝ Մայրության և գեղեցկության օրը, կոլեկտիվով տոնը նշել ենք դպրոցում, կոնյակ բացել, մեր հաղթանակի կենացը խմել, միմյանց շնորհավորել: Ջարդված ապակիների փոխարեն նորերն ենք տեղադրել եւ վերսկսել դպրոցական պարապմունքները: Ունեինք նույնիսկ շրջանավարտ աշակերտներ, ովքեր պատերազմական օրերին իրենց ընտանիքներով հեռացել էին Ռուսաստան, սակայն որոշեցին Վերջին զանգի օրերին վերադառնալ հայրենիք եւ միանալ իրենց համադասարանցիներին»,- նշեց դպրոցի տնօրենը: Նախորդ տարվա շրջանավարտների մոտ 80 տոկոսը շարունակել են իրենց ուսումը Արցախի կամ Հայաստանի բուհերում, միջնակարգ մասնագիտական հաստատություններում: Տղաներից շատերն ընտրել են ռազմական թեքումով ուսումնական հաստատությունները: Նախորդ ապրիլ-մայիս ամիսների ընթացքում դպրոցի բարձր դասարանների աշակերտները բանակին օգնել են ինժեներական աշխատանքներում: «Նույնիսկ մեր բարձր դասարանների կամ ավարտական դասարանների աղջիկները ցանկանում են Հայոց բանակում ծառայել որպես նշանառուներ: Բոլորի մոտ բարձր է հայրե նասիրական ոգին: Մենք մեր հողին ամուր կառչած մարդիկ ենք՝ մեծից փոքր, եւ բոլորս մեկ մարդու նման ուզում ենք պաշտպանել ու կառուցել մեր երկիրը եւ աշխարհի որեւէ այլ երկրում բախտ չորոնել: Մեր աշակերտներն աչքի են ընկնում ուսման բարձր առաջադիմությամբ: Հիմա սկսվել է առարկայական օլիմպիադայի շրջանային փուլը, որին ակտիվորեն են մասնակցում նրանք: Մեր բոլոր ուսուցիչներն ունեն մասնագիտական բարձրագույն կրթություն, երկուսն արժանացել են Վաստակավոր ուսուցչի կոչման: Ապրիլյան պատերազմի հետեւանքով մեզ մոտ 3 դասարան կրճատվեց, սակա յն կարողանում ենք պահպանել մեր հիմնական կորիզն ու աշխատանքային բարձր տրամադրությունը: Այս տարի ընդունել ենք 60 առաջին դասարանցի եւ կճանապարհենք 46 շրջանավարտների՝ նախորդ ուստարվա 63-ի դիմաց: Միակ դժվարությունը, որ ծառացած է մեր առջև, դպրոցական շենքի անբարեկարգ վիճակն է: Հանրապետության ու շրջանի ղեկավարները քաջատեղյակ են հիմնախնդրին, պարզապես դպրոցի հիմնանորոգման համար մեծ գումարներ են հարկավոր: Դասասենյակներն այժմ ջեռուցվում են հեղուկ վառելքիով, սակայն բավարար սենյակային ջերմաստիճան ապահովելը դժվար է նման անբարեկարգ շենքա յին պայմաններում: Այդուհանդերձ, դպրոցական պարապմունքներն ընթանում են սովորական հունով, առանց ընդհատումների կամ դասաժամերի սահմանված չափի կրճատման»,-ասաց Լիդիա Պետրոսյանը: Ինը տասնամյակն արդեն բոլորած հաստատությունը, ինչպես հավաստեց տնօրենը, մինչեւ Արցախյան պատերզմի սկիզբը ունեցել է 1600 աշակերտ եւ 160 ուսուցիչ:

Պատերազմի տարիներին եւ Մարտակերտի ազատագրումից հետո դպրոցի վերակազմակերպման առաջին մասնակիցներից եղել է Լիդիա Պետրոսյանը, ով այդ ժամանակ ստանձնել է դպրոցի տնօրենի պարտականությունները եւ այդ պաշտոնում աշխատում է արդեն 23 տարի: «Դպրոցի շենքը լրիվ ավերված էր, մնացել էին միայն արտաքին պատերը: 1994 թվականի սեպտեմբերին մենք ծրագրել էինք դպրոց ընդունել 300 աշակերտի, բայց կարողացանք ընդունել 204-ին: Աշխատանքային տարին սկսեցինք 28 մանկավարժով: Այսօր արդեն մենք տարեկան մինչեւ 60-65 առաջին դասարանցի ենք ընդունում, ճիշտ այդքան շրջանավարտների է լ կյանք ենք ճանապարհում: Ի հեճուկս թշնամիների սպառնալիքների՝ մենք շարունակում ենք ապրել, պայքարել ու հայրենիք կերտել: Եթե նրանց արկերը մեզ չեն վախեցրել, նրանց խոսքերը բոլորովին չեն վախեցնի»,-ասաց դպրոցի տնօրենը:

Լիդիա Պետրոսյանը ծնվել է Բաքվում, սակայն ութ ամսական հասակում ծնողների հետ տեղափոխվել է Արցախ: Ավարտել է Ստեփանակերտի մանկավարժական ինստիտուտի մաթեմատիկայի բաժինը: 1976 թվականից մաթեմատիկա է դասավանդել Մարտակերտի թիվ 2 միջնակարգ դպրոցում, աշխատել նաեւ նույն դպրոցի կազմակերպիչ:Այս տարի Լիդիա Պետրոսյանը բոլորում է իր մանկավարժական աշխատանքի 41-րդ տարին:

Խոսրով Խլղաթյան