«Սուպեր մաման» շարունակություն կունենա. Հայկ Մարությանը՝ ֆիլմի նկարահանումների մասին և ոչ միայն

ЛАЙФ 8 Февраль, 2017 12:00

Past.am-ի զրուցակիցը դերասան, սցենարիստ, ռեժիսոր, պրոդյուսեր, հասարակական ակտիվիստ Հայկ Մարությանն է:

- «Ազիզյանները» սիթքոմից սկսենք: Իհարկե, այն ոչ բոլորին է հասանելի, բայց մեծ արձագանք է ստացել հեռուստադիտողի շրջանում: Ի՞նչ փուլում են նկարահանումները և արդյո՞ք հեռուստադիտողը հնարավորություն կունենա՞ այն երբևիցե դիտելու:

- Մենք հենց սկզբից հայտարարել ենք, որ հեռուստադիտողը սիթքոմը դիտելու հնարավորություն անպայման ունենալու է: Մենք արտադրող ընկերություն ենք, որն իր արտադրանքը վաճառում է «Պանարմենիա» ՓԲԸ-ին, հետո արդեն ընկերությունը որոշում է կայացնում, թե ինչպես, ինչ կարգավիճակով կամ որ ալիքներով այն հեռարձակի: Այս պահին որոշումն այնպիսին է, որ այն հեռարձակվի միայն Ucom ցանցով, բայց այս տարվա մեջ հեռարձակում լինելու է նաև հեռուստատեսությամբ, ամենայն հավանականությամբ՝ «Արմենիա» TV-ով:

- Խոսակցություններ կան նոր ֆիլմի մասին: Ինչքանո՞վ են դրանք համապատասխանում իրականությանը և ե՞րբ հնարավորություն կունենանք դիտելու այն:

- Նկարահանումները պատրաստման փուլում են: Խոսքը բոլորի կողմից սիրված «Սուպեր մամայի» մասին է, կարելի ասել, դրա շարունակությունն ենք ցանկանում նկարահանել: Չնայած՝ շարունակություն բառն այնքան էլ տեղին չէ, որովհետև այս անգամ իրավիճակը լրիվ այլ է լինելու::

- Դերասանական կազմում փոփոխություններ կա՞ն:

- Հիմնական 4-5 դերասանները նույնն են, բայց քանի որ իրադարձությունների զարգացման միջավայրը տարբեր է, բազմաթիվ ուրիշ դերասաններ են ավելանալու:

- Այս տարի հնարավորություն կունենա՞նք ֆիլմը դիտելու:

- Մենք էլ ենք շատ ցանկանում այս տարի ֆիլմի նկարահանումն ավարտին հասցնել և ամեն ինչ անում ենք այդ ուղղությամբ: Սցենարը գրեթե պատրաստ է, անկեղծ ասած՝ այն մեզ շատ է դուր գալիս: Ոգևորությունը շատ մեծ է, և մենք անհամբերությամբ սպասում ենք, թե երբ ենք այն կինոդիտողներիի դատին հանձնելու:

- Եվ վերջում, կուզենայի Ձեր կարծիքն իմանալ հայաստանյան ժամանակակից կինեմատոգրաֆիայի մասին: Բազմաթիվ նոր ֆիլմեր են ստեղծվում՝ հիմնականում հումորային ժանրում, ի՞նչ կարծիքի եք դրանց որակական հատկանիշների մասին, ըստ Ձեզ՝ դրանք մնայու՞ն են:

- Կարծում եմ՝ դա միայն ժամանակը ցույց կտա: Ես այս պահին կարող եմ խոսել միայն փաստերի մասին, իսկ դրանք վկայում են, որ կինոկատակերգություններն այսօր ավելի մեծ «կասսա» են ունենում, քան մնացած ժանրերի ֆիլմերը:

Բայց դրանց մեջ շատ քչերն են, որոնք իրոք հավաքում են բավականաչափ հանդիսատես: Դե, հանդիսատեսը հենց այնպես չի գալիս, պետք է ֆիլմը լավը լինի, որ գա: Գովազդից ելնելով կարող է 10-20 հազար հոգի գալ, իսկ մնացած հազարները գալիս են՝ այդ 10-20 հազարի կարծիքը լսելով: Ինձ համար 100 հազար և ավելի հանդիսատես ունեցող ֆիլմը նոր կարող է հաջողված համարվել:

- Իսկ դերասանների, կոնկրետ անհատների դերը որքանո՞վ է կարևոր հանդիսատեսին գրավելու հարցում:

Image may contain: 1 person, closeup and indoor

- Ես ֆիլմը համարում եմ մի ամբողջական մարմին և ընդհանրապես չեմ ուզում առանձնացնել ո՛չ դերասանին, ո՛չ սցենարիստին, ո՛չ էլ ուրիշ մեկին: Պետք է ամբողջ մարմինը լավը լինի: Չի կարող դեմքը սիրուն լինել, իսկ փորը՝ մեծ: Չի կարող ֆիլմը լավը լինել, երբ սցենարն անհաջող է, իսկ դերասանը չի կարող լավ խաղալ, երբ ֆիլմն անհետաքրքիր է: Որպեսզի հանդիսատեսն ասի՝ «վա՜յ, ինչ լավ ֆիլմ էր» և դրանով ամեն ինչ եզրափակվի, պետք է բոլոր բաղադրիչները լինեն լավ, պատշաճ որակի:

Հարցազրույցը՝ Մարիամ Նալբանդյանի