Ինչ ծրագրեր կիրականացվեն և որ տեսարժան վայրերը կվերանորոգվեն 55 մլն դոլար վարկով

2016 թվականի փետրվարի 23-ին ՀՀ-ի և Վերակառուցման և զարգացման միջազգային բանկի միջև ստորագրվել է «Տեղական տնտեսության և ենթակառուցվածքների զարգացման ծրագիր» վարկային համաձայնագիրը: Համաձայնագրով սահմանվում է ծրագրի իրագործման հիմնական երկու և մեկ լրացուցիչ բաղադրիչ, որոնց ֆինանսավորումը Համաշխարհային Բանկի կողմից կկազմի 55 միլիոն ԱՄՆ դոլար:

Tert.am-ը գրավոր հարցում էր ուղարկել ՀՀ տնտեսական զարգացման և ներդրումների նախարարություն, ճշտելու, թե ինչ աշխատանքներ են իրականացվելու  նախատեսված գումարով, որտեղից պատասխանել են, որ տեղական տնտեսության և ենթակառուցվածքների զարգացման ծրագրի իրականացումը նպատակաուղղված է համայնքներում ենթակառուցվածքների, կարողությունների և զբոսաշրջության զարգացմանը և այդպիսով համայնքներում տնտեսական զարգացմանը:

Նախարարությունից հայտնեցին, որ համաձայնագրով սահմանվում է ծրագրի իրագործման հիմնական երկու և մեկ լրացուցիչ բաղադրիչ, որոնց ֆինանսավորումը Համաշխարհային Բանկի կողմից 5 տարվա ընթացքում կկազմի 55 միլիոն ԱՄՆ դոլար: Նախագիծը մշակելիս հաշվի է առնվել Վրաստանում իրականացված փորձը և Հարավային Կովկասի տարածաշրջանային զարգացման ծրագրի վերաբերյալ կատարված ՀԲ-ի 2014թ. Տնտեսական ոլորտի աշխատության առաջարկությունները:

««Տեղական տնտեսության և ենթակառուցվածքների զարգացման ծրագիրը» բաղկացած է երեք բաղադրիչից՝ «Քաղաքային վերածնունդ և զբոսաշրջային օղակների զարգացում (50.41  միլիոն ԱՄՆ դոլար)», որն ունի իր   ենթաբաղադրիչները.

Ժառանգության վերականգնում. այս ենթաբաղադրիչի նպատակն է ֆինանսավորել քաղաքային վերականգնման գործողությունները Գորիս և Մեղրի հին քաղաքներում և Արենի, Տաթև և Տանձատափ գյուղերում:

Զբոսաշրջային շրջանների զարգացում. այս ենթաբաղադրիչի նպատակն է ֆինանսավորել Հայաստանի հիմնական զբոսաշրջային երթուղու երկայնքով գտնվող մշակութային և բնության ժառանգության առավել գրավիչ վայրերի մշակութային ժառանգության պահպանման և օբյեկտների կառավարման բարելավված պլանների նկատմամբ համալիր մոտեցումը: Զբոսաշրջության զարգացման տեսլականի հիման վրա զբոսաշրջային շրջանի զարգացման համար ընտրվել են հետևյալ վայրերը. Գառնին (տաճար և ձոր), Գեղարդավանքը, Դվինի հնավայր-բնակատեղին (նաև թանգարանը), Խոր Վիրապ վանքը, Արենիի շուկան և Արենի քարանձավը, Մոզրովի քարանձավը, Զորաց քարերը (Քարահունջ), Խնձորեսկը և ՅՈւՆԵՍԿՕ-ի համաշխարհային ժառանգության օբյեկտներ՝ Հաղպատ և Սանահին վանական համալիրները:

Պետական-մասնավոր ներդրում (ՊՄՆ). Այս ենթաբաղադրիչի նպատակն է տրամադրել հանրային ենթակառուցվածքներ մասնավոր ներդրումներ ներգրավելու համար:  Ծրագրի կառավարում, նախագծում և շինարարության վերահսկում:

Հաջորդ բաղադրիչն Ինստիտուցիոնալ զարգացումն է՝ զբոսաշրջային վայրերի կառավարում, մարքեթինգ և խթանում, զբոսաշրջավայրերի կառավարման գրասենյակների հիմնում, աշխատուժի զարգացում, որի համար կհատկացվի 4.450.000 մլն ԱՄՆ դոլար:

Երրորդ բաղադրիչը չնախատեսված արտակարգ իրավիճակների արձագանքում.

Օժանդակել համայնքային ծառայություններին և ենթակառուցվածքի վերականգնմանը և վերակառուցմանը՝ ընտրված շրջաններում անհրաժեշտության դեպքում թույլատրելի արտակարգ իրավիճակներին արձագանքելու նպատակով: Այն Ծրագրում ընդգրկելը կանխարգելիչ դեր է կրում, որը թույլ կտա ՀՀ կառավարությանը և Համաշխարհային բանկին բնական կամ մարդածին աղետներ տեղի ունենալու և կառավարության կողմից արտակարգ իրավիճակ հայտարարելու դեպքում արագորեն վերահասցեագրել վարկային միջոցներն անհապաղ վերականգնման միջոցառումների ֆինանսավորմանը: Այս բաղադրիչը և դրանից բխող ֆինանսավորման հատկացման նոր կատեգորիան թույլ կտա ՀՀ կառավարությանը դիմել Համաշխարհային Բանկին՝ վարկային միջոցները վերաբաշխելու համար հօգուտ այդ ենթաբաղադրիչի՝ արտակարգ իրավիճակի դեպքում Ծրագրում ընդգրկված Փոխառուի տարածքի 5 մարզերի ենթակառուցվածքների անհապաղ վերականգնման նպատակով: Նոր ֆինանսավորման կատեգորիան նախատեսում է ոչ արտակարգ պայմաններում զրոյական գումարային հատկացում և նրա ամբողջական ֆինանսավորումը կատարվում է ՎԶՀԲ-ի միջոցներով»,-ասվում է  ՀՀ ՏԶՆՆ-ի պատասխանի մեջ:

Հարցին, թե երբ են մեկնարկում աշխատանքները, նախարարությունից հայտնեցին, որ ներկա փուլում «Տեղական տնտեսության և ենթակառուցվածքների զարգացում» վարկային ծրագրի նախապատրաստման դրամաշնորհով նախատեսված միջոցառումների իրականացման շրջանակներում կատարվում են ընտրված ենթածրագրերի նախագծային աշխատանքներ: