Առաջնագիծն ապրիլյան պատերազմից հետո

ИНТЕРВЬЮ 18 Ноябрь, 2016 21:53

ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովը եռօրյա աշխատանքային այց է իրականացրել ԼՂՀ, ինչի կապակցությամբ Past.am-ը զրուցեց հանձնաժողովի նախագահ Կորյուն Նահապետյանի հետ:

Ինչպես իր խոսքում նշեց պարոն Նահապետյանը, այցը բավական հագեցած էր:

«Հանդիպումները և քննարկման թեմաները ընդգրկուն էին: Այցի հիմնական նպատակը առաջնագծում տիրող իրավիճակի դիտարկումն էր: Մենք այցելեցինք հյուսիսային և հարավային ուղղությամբ մեր մարտական դիրքերը՝ տեղում ծանոթանալով դիրքերի կահավորվածությանը, անվտանգության պահանջների ապահովմանը: Տեսել ենք, թե ռազմատեխնիկական ինչ միջոցներով են համալրված համապատասխան զորային օղակները: Զրույցներ ենք ունեցել զինվորականների, դիրքապահների, հրամանատարական կազմի հետ:

Այցի ընթացքում հանձնաժողովին ուղեկցել են ԼՂՀ ԱԺ պաշտպանության, անվտանգության և օրինապահության հարցերի հանձնաժողովի նախագահը և ԼՂՀ անվտանգության խորհրդի նորանշանակ քարտուղարը:

«Երկրորդ կարևոր ուղղությունը, որի շուրջ խոսել ենք, վերաբերում էր բնակչության քաղաքացիական պաշտպանության վիճակին: Այդ նպատակով Մարտակերտում՝ շրջանի վարչակազմի ղեկավարի մոտ, հանդիպում կազմակերպեցինք մի քանի համայնքների ղեկավարների ու ԼՂՀ արտակարգ իրավիճակների պետական ծառայության տնօրենի հետ: Խոսվել է ինչպես ապաստարանների, թաքստոցների, այնպես էլ քաղաքացիական պաշտպանության արդյունավետ կառավարում իրականացնելու մասին: Այս ուղղությունը մեզ համար ունի կարևոր նշանակություն: Թեպետ խնդիրներ կան, բայց ապրիլյան պատերազմից հետո որոշակի աշխատանքներ տարվել են այս ուղղությամբ, ընթացքում բացահայտվել են նաև հարցեր, որոնց կապակցությամբ այսօր արդեն լուծումներ են տրվում»,– ասաց Կորյուն Նահապետյանը՝ հավելելով, որ այցը կարևորում է 2017 թվականի բյուջեի քննարկման համատեքստում:

Նշենք, որ հանձնաժողովի անդամներ հանդիպումներ են ունեցել նաև ԼՂՀ բարձրագույն իշխանության ներկայացուցիչների հետ: Ինչպես նշեց Կ. Նահապետյանը, ԼՂՀ նախագահի, պաշտպանության բանակի հրամանատարի հետ խորքային և առողջ քննարկումներ են ծավալվել ամենասուր հարցերի շուրջ: Կարևորվել են մոբիլիզացիոն ռեսուրսների ճիշտ պլանավորման, դրանց արդյունավետ կառավարման հետ կապված խնդիրները: Քննարկվել են նաև ռազմատեխնիկական քաղաքականության, առաջնագծի կահավորման, համապատասխան միջոցներով ապահովելու հետ կապված հարցեր: Հատուկ քննարկման առարկա են եղել պաշտպանության ոլորտի գնումները, ռազմակրթական բաղադրիչը, զինծառայողների, մասնավորապես սպաների սոցիալական ապահովության խնդիրները:

Ըստ Նահապետյանի՝ և՛ հյուսիսային, և՛ հարավային ուղղություններով հանդիպումները տպավորիչ էին այն իմաստով, որ նկատվել է պատրաստականության շատ բարձր աստիճան: «Զինվորական առաջադրանքները կատարելու ցանկացած սցենարի դեպքում և՛ ժամկետային, և՛ պայմանագրային զինծառայողների մոտ կա բարձր ոգի, որը չափազանց կարևոր է զորքերի մարտունակության համար, սակայն պետք է նշեմ, որ նույնքան կարևոր է նաև ամուր թիկունքը: Առաջնագծում կանգնած զինվորը պետք է ունենա վստահություն այդ հարցում»,– ասաց հանձնաժողովի նախագահը:

«Կարող ենք փաստել, որ առաջնագծում կատարվել և կատարվում են մեծածավալ աշխատանքներ: Մեր զինվորների անվտանգության ապահովումն ունի գերակա նշանակություն: Նոր միջոցների, այդ թվում՝ տեխնիկական միջոցների ներդրմամբ նպաստում ենք զինծառայողների անվտանգության մակարդակի բարձրացմանը: Այս ուղղությամբ աշխատանքները շարունակական բնույթ են կրում և պահանջում են հետևողական ջանքեր»,– ասաց նա:

Կորյուն Նահապետյանն ընդգծեց միջխորհրդարանական ձևաչափով նման հանդիպումների և քննարկումների կարևորությունը երկրի անվտանգության մարտահրավերներին ժամանակին և համարժեք արձագանքելու տեսանկյունից: