Օվկիանոսի հատակին բնակվող անհայտ կենդանիները (լուսանկարներ)

Shabat.am-ը գրում է.

1. Բազմաշոշափուկավոր որդ (Polychaete Worm)

Այս որդը հայտնաբերվել է 2012 թ.-ին, Նոր Զելանդիայի հյուսիսային ափերի մոտ՝ օվկիանոսում` 1200 մետր խորության վրա: Այն վարդագույն է և լույսն անդրադարձնում է ծիածանի գույներով: Բազմաշոշափուկավոր որդը գիշատիչ է: Գլխի վրայի նրա շոշափուկները զոհին հայտնաբերելու համար են: Որդը հազվադեպ է 10 սմ-ից ավելի մեծանում և հազվադեպ է հանդիպում: Բնակվում է օվկիանոսի հատակին:

 

2. Կծկված ծովախեցգետին (Squat Lobster)

Այս ծովախեցգետինը հայտնաբերվել է նույն ժամանակ, երբ բազմաշոշափուկավոր որդը, սակայն 1400 մետր խորության վրա: Նրանց մարմինը կծկված է, իսկ առջևի չանչերը շատ մեծ են: Ծովախեցգետինները բնակվում են մինչև 5000 մետր խորության վրա, լինում են դետրիտոֆագներ, գիշատիչներ կամ ջրիմուռներով սնվող բուսակերներ:

3. Մսակեր կորալ կամ «Սպունգ-Արֆա» կորալ (Carnivorous Coral)

Կորալների մեծ մասը բնակվում են մինչև 60 մետր խորության վրա, և նրանց համար որպես սնուցիչ են ծառայում են ջրիմուռները: Սակայն այս տեսակը, որ հայտնաբերվել է 2012 թ.-ին, բնակվում է 2000 մետր խորության վրա և սնվում է մսով: Այն գիշատիչ է և որպես սնունդ օգտագործում է մանր խեցգետնանմաններին: Սպունգ-Արֆան բազմանում է յուրօրինակ ձևով՝ սերմնահեղուկի պարկերի միջոցով: Յուրաքանչյուր ասեղիկի ծայրի սպիտակ գնդիկները հենց այդ պարկերն, որոնք ժամանակ առ ժամանակ պոկվում և լողում են՝ բազմանալու համար այլ կորալ փնտրելու նպատակով:

4. Լեզվաձուկ (Tonguefish)

Այս ձուկը հայտնաբերվել է 2012 թ.-ի սկզբերին՝ Խաղաղ օվկիանոսի արևմտյան մասի խորը ջրերում: Լեզվաձկան երկու աչքերը գտնվում են գլխի նույն հատվածում:

5. Շնաձուկ Գոբլին (Goblin Shark)

Գոբլին շնաձուկը սարսափազդու կենդանի է, որ առաջին անգամ հայտնաբերվել է 1985 թ.-ին` Ավստրալիայի արևելյան ափերին: 2003 թ.-ին ավելի քան 100 առանձնյակ որսացել են Թայվանում՝ երկրաշարժից հետո: Այս յուրօրինակ շնաձկան մասին շատ քիչ բան է հայտնի: Խորջրյա, դանդաղաշարժ կենդանի է, որ զոհին գտնում է էլեկտրազգայուն օրգանների միջոցով: Մինչ այժմ հայտնի ամենամեծ առանձնյակը 3,8 մետր երկարություն է ունեցել: Գոբլին շնաձուկը ատամների մի քանի շարք ունի, և, ի տարբերություն այլ շնաձկների, նա և՛ որսին բռնելու, և՛ խեցգետնանմանների խեցիները պատռելու համար նախատեսված ատամներ ունի:

6. Փափկամարմին կետանման ձուկ (Flabby Whalefish)

Այս առանձնյակին որսացել են Նոր Զելանդիայի ափերի մոտ՝ ավելի քան 2000 մետր խորության վրա: Այս ձկները սովորաբար բնակվում են 3500 մետր խորության վրա, ունեն վառ գունավորում և փոքր, աննշան աչքեր, որոնք, կարելի ասել, որևէ դերակատարություն չունեն: Փոխարենը փափկամարմին կետանման ձկան մոտ յուրօրինակ կերպով զարգացած են կողային հատվածները, որոնք զուրկ են ոսկրերից, և որոնց միջոցով ձկները զգում են ջրի տատանումները:

7. Դումբո ութոտնուկ (Dumbo Octopus)

Այս ութոտնուկների մասին առաջին անգամ խոսվել է 1999 թ.-ին, ապա 2009 թ.-ին այն նկարահանվել է: Ութոտնուկների այս տեսակը կարող է բնակվել մինչև 7000 մետր խորության վրա, որն այս տեսակին դարձնում է գիտությանը հայտնի ամենախորքային ջրերում բնկավող ութոտնուկը: Այս կենդանին երբեք լույս չի տեսնում և կայծակնային արագություն ունի: Սնվում է օվիկանոսի հատակում բնակվող մանր խեցգետիններիով, խեցգետնանմաններով և խխունջներով:

8. Վամպիր կաղամար կամ դժոխային վամպիր (Vampire Squid or Vampyroteuthis infernalis)

Այս կաղամարը բնակվում է 600-900 մետր խորության վրա: Նրա բնակության վայրի ամենավերին հատվածում դեռ թափանցում են արևի շողերը, և այդ պատճառով այս կենդանին` իր մարմնի համեմատ, աշխարհի ամենամեծ աչքերն ունի, որպեսզի կլանի արևի լույսը: Շատ հետաքրքիր է այս կենդանու պաշտպանական համակարգը. այն թանաքանման հեղուկ է արտազատում, որը կուրացնում է թշնամուն և շեղում նրա ուղղությունը:

9. Արևելախաղաղօվկիանոսյան ուրվական սև շնաձուկ (Eastern Pacific Black Ghost Shark)

Հայտնաբերվել է 2009 թ.-ին` Կալիֆոռնիայի ափերի մոտ՝ խորը ջրերում: Շնաձկան այս տեսակը պատկանում է ամենահին ժամանակներից առ այսօր գոյատևած ձկների դասին: Ոմանք կարծում են, որ ուրվական սև շնաձուկը ավելի քան 400 միլիոն տարի գոյատևում է` միայն նման խորության վրա բնակվելու շնորհիվ: Շնաձկան արուն ճակատից բուսնող սեռական օրգան ունի, որ նման է սրածայր մահակի: Կարծիքներ կան, որ այն օգտագործում է էգերին գրգռելու կամ իր մոտ գրավելու համար, սակայն իրական նշանակությունը հայնտի չէ, քանի որ այս շնաձկան մասին չափազանց քիչ տեղեկություններ կան:

10. Հսկայական կաղամար (Colossal Squid)

Հսկայական կաղամարի մարմնի երկարությունը հասնում է 12-14 մետրի: Այս կենդանին առաջին անգամ հայտնաբերվել է 1925 թ.-ին: Այդ ժամանակ նրա շոշափուկների մնացորդները հայտնաբերվել են կաշալոտի ստամոքսում: Առաջին ամբողջական առանձնյակին որսացել են 2003 թ.-ին: Դեռևս հայտնի ամենամեծ առանձնյակը, որի երկարությունը կազմել է 10 մետր, որսացել են 2007 թ.-ին՝ Ռոսի ծովում: Այն ցուցադրված է Նոր Զելանդիայի Ազգային թանգարանում: Կարծիքներ կան, որ կաղամարները գիշատիչներն են և սնվում են խոշոր ձկներով և այլ կաղամարներով, որոնց վրա հարձակվում են թաքստոցից: Ամենասարսափելի փաստը, որ հայտնի է այս կենդանիների մասին, այն է, որ կաշալոտների վրա հայտնաբերվել են հսկայական կաղամարների շոշափուկներից առաջացած սպիներ: