Թուրքիան ԵՄ-ին անդամակցելու ապագա չունի. Սարկոզի

Ֆրանսիայի նախկին նախագահ Նիկոլա Սարկոզին մեկ անգամ եւս հայտարարել է Թուրքիայի` Եվրամիությանն անդամակցության անհնարինության մասին:

Այս մասին, ինչպես հաղորդում է «Արմենպրես»-ը` վկայակոչելով թուրքական «Միլիեթ» թերթը, Ֆրանսիայի հանրապետական կուսակցության առաջնորդ Սարկոզին հայտարարել է գերմանացի գործարարների Wirtschaftsrat կազմակերպության կողմից Բեռլինում կազմակերպված հավաքում ունեցած ելույթում:

«Թուրքիայի հետ բանակցությունները կարեւոր են, սակայն, միանգամայն համոզված եմ, որ Թուրքիան չի համապատասխանում Եվրամիության կազմում լինելուն, -ասել է նա` հավելելով, որ ԵՄ անդամակցության փոխարեն, Թուրքիայի հետ այլընտրանքային համագործակցությունը հնարավոր է:

«Կարծում եմ, որ Թուրքիան ԵՄ-ին անդամակցելու ապագա չունի», -ասել է Ֆրանսիայի նախկին նախագահը:

Նիկոլա Սարկոզին նաեւ համոզմունք է հայտնել, որ առաջիկա հանրաքվեում Մեծ Բրիտանիայի բնակչությունը կքվեարկի ԵՄ-ից չառանձնանալու օգտին:

Բրիտանական The Guardian թերթն իր` «Թուրքիայի ԵՄ անդամակցության հնարավորության հարցում իրականությունը երեւակայությունից տարբերելը» վերնագրով հոդվածում նշում է, որ միանգամայն հիմնավորված է անդամակացության դեպքում 79 մլն թուրքերի միանգամից Եվրոպա մուտք գործելու իրավունքի հետ կապված եվրոպացիների վախը, քանի որ դեռեւս 1963 թվականին ԵՄ կողմից Թուրքիային տրված անդամակցության հեռանկարի իրականացման հարցում Անկարան ոչ մի ազդանշան չի տվել եւ շարունակում է չտալ:

«Պնդել հակառակն այն բանի, որ Եվրոպայում ոչ մեկը տեսանելի ապագայում պատրաստ չէ Թուրքիային ընդունել ԵՄ կազմ, առնվազն հիմարություն եւ սխալ ուղղորդում է: Նախագահ Թայիփ Էրդողանի գլխավորությամբ Թուրքիայի իշխող «Արդարություն եւ զարգացում» կուսակցության 2002 թվականին իշխանության գալուց հետո Թուրքիայի ԵՄ անդամակցության գործընթացն ամբողջությամբ դադարել է, եւ այդ երկիրը շարժվում է դեպի ավտորիտարիզմ ու իսլամ: Երազանք կմնա նաեւ թուրքերի` ԵՄ առանց վիզայի մուտք գործելու հնարավորությունը, որովհետեւ Թուրքիան ցանկություն չունի կատարելու նրա համար Բրյուսելի առաջադրած 72 պայմանները, այդ թվում` Էրդողանի ռեժիմի կողմից քաղաքական ընդդիմությանը ճնշելու համար կիրառվող ահաբեկչության դեմ պայքարի օրենքի փոփոխությունը», -գրում է թերթը:

Թերթը նաեւ հիշեցնում է, որ Թուրքիայի ԵՄ անդամակցությանը կարող է վետո դնել ԵՄ անդամ յուրաքանչյուր երկիր, ինչը գործնականում անհնարին է դարձնում ԵՄ պահանջներին չհամապատասխանող Թուրքիայի անդամակցությունը միությանը:

The Financial Times թերթն իր խմբագրական հոդվածում գրել է, որ Թուրքիայի ԵՄ անդամակցության հնարավորությունը համադրելի է Ստամբուլը Կոնստանդնուպոլսի վերանվանվելու հավանականության հետ:

«Թուրքիան այնքան շանսեր ունի ԵՄ մտնելու մինչեւ 2020 թվականը, ինչքան եթե Ստամբուլը վերանվանվի Կոնստանդնուպոլսի», -գրել է բրիտանական թերթը:

Մեծ Բրիտանիայի վարչապետ Դեվիդ Կեմերոնն ավելի վաղ հայտարարել էր, որ 28 երկրների հանրակցությանը միանալու մասին բանակցությունների ներկայիս տեմպերի պահպանման դեպքում Թուրքիան ԵՄ անդամ չի դառնա մինչեւ 3000 թվականը:

«Անգամ մոտ ապագայի ծրագրերում հնարավորություն չկա, որպեսզի Թուրքիան մոտ ժամանակում դառնա ԵՄ անդամ», -ասել է նա ITV հեռուստաալիքի եթերում:

Մեծ Բրիտանիայի վարչապետը նաեւ հոռետեսորեն է արտահայտվել ԵՄ տարածք Թուրքիայի քաղաքացիների առանց վիզայի մուտքի առնչությամբ՝ հայտարարելով, որ Լոնդոնը նման քայլը չի պաշտպանի, եթե դրան համաձայնվի Բրյուսելը:

The Guardian թերթն էլ իր վերոնշյալ հոդվածում գրել է, որ «պարզ ասած` Եվրոպայում ոչ մեկն էլ պատրաստ չէ այժմ կամ էլ տեսանելի ապագայում Թուրքիային ներառել Եվրամիության կազմ»: