Հերթական լոբբիստական համաձայնագիր Բաքվի եւ Վաշինգտոնի միջեւ

Ամերիկյան լոբբիստական Greenberg Trauring ընկերությունը մայիսի սկզբին Վաշինգտոնում Բաքվի «իրավապաշտպան խմբի» հետ «ԱՄՆ-ում պետական մարմինների հետ շփումներ» ապահովելու համար ծառայություններ մատուցելու գծով պայմանագիր է ստորագրել:

Այս մասին հայտնում է «Թուրան» լրատվական գործակալությունը:

«Ադրբեջանում քաղաքացիական հասարակության  զարգացման օժանդակման միություն» անվանունով իշխանամետ խումբը Greenberg Trauring ընկերությանը պետք է ամսական 25 հազար դոլար վճարի երեք ամիսների ընթացքում, ասվում է փաստաթղթում, որը հրապարակվել է ԱՄՆ-ի արդարադատության նախարարության կայքում:

Պայմանագիրը ստորագրվել է հիշյալ խմբի նախագահ, Ադրբեջանի խորհրդարանի պատգամավոր Էլխան Սուլեյմանովի եւ Էլան Բրոյթմանի միջեւ, որը նակինում ծառայել է Քլինթոնի վարչախմբում որպես USAID-ի ավագ խորհրդական:

«Երկու ընկերությունների միջեւ ստորագրված պայմանագրի համաձայն` ամերիկյան կողմը պետք է ադրբեջանական կողմին «խորհուրդներ եւ հանձնարարականներ տա, կապված դեռեւս չավարտված օրենսդրության հետ, ինչպես նաեւ տեղեկացնի կառավարությանն ու այլ առաջանորդներին ԱՄՆ-ում հասարակական կարծիքին»:

«Թուրան»-ին չի հաջողվել մեկնաբանություններ ստանալ Grrenberg Trairing-ից:

Էլխան Սուլեյմանովը, որը, ինչպես հաղորդվում է, շատ մոտ է նախագահ Իլհամ Ալիեւի հետ, Ադրբեջանում լավ հայտնի է միջազգային ռազմավարության մեջ իր դերով, որը նկարագրվել է որպես «խավիարային դիվանագիտություն», այսինքն` առատ նվերներ, ճանապարհորդություններ, եւ միջազգային քաղաքական գործիչների համար այլ առավելություններ:

«Եվրոպական կայունության նախաձեռնության» 2012 թվականի զեկույցի համաձայն` խավիարը, մետաքսե գորգերը, ինչպես նաեւ դրամական միջոցները ԵԽԽՎ-ում Ադրբեջանի բարեկամներին հասցվել են Բաքու նրանց այցի ժամանակ:

2007 թվականին Ադրբեջանից Վաշինգտոն էր ժամանել հատուկ պատվիրակություն քարոզչական գործունեություն կազմակերպելու գծով խորհրդատվությունների համար, «Թուրան»-ին հայտնել է անունը հրապարակել չցանկացած ամերիկացի նախկին լոբբիստը:

Նրա խոսքով` ճանապարհորդությունը կազմակերպվել էր Bob Lawrence & Associates լոբբիստական խմբի կողմից:

Ադրբեջանին արդեն վաղուց են լայնորեն քննադատում երկրում անկախ ձայների դեմ բռնաճնշումների ֆոնին Արեւմուտքում իր լոբբիստական ջանքերի համար:

Չնայած դրան, վերջին տարիներին Ադրբեջանի մասին իրականության եւ երեւակայականի միջեւ հակադրությունը մեղմացնելու նպատակով Բաքուն Վաշինգտոնում մի շարք համաձայնագրեր է ստորագրել լոբբիստական խմբերի հետ, ինչպիսին է, օրինակ, Podesta Group-ը, որը պետք է օգնի խուսափել մարդու իրավունքները եւ ժողովրդավարությունը խախտելու համար Ադրբեջանի պաշտոնատար անձանց դեմ պատժամիջոցներ մտցնել նախատեսող ամերիկյան օրենքի ընդունումից:

Ադրբեջանի կառավարությունը միջոցներ է ձեռնարկում, որպեսզի թույլ չտա ԱՄՆ-ի Կոնգրեսի կողմից «Ադրբեջանում ժողովրդավարության համար ակտ» (HR 4264) օրինագծի ընդունումը, որը փետրվարի սկզբին առաջադրվել է կոնգրեսական, ԱՄՆ կոնգրեսի Հելսինկյան հանձնաժողովի ղեկավար Քրիս Սմիթի կողմից:

Պատժամիջոցները նաեւ սահմանափակումներ են նախատեսում ԱՄՆ-ի կողմից Ադրբեջանի ֆինանսավորման, վարկավորման եւ ապահովագրական ոլորտներում: Դրան զուգահեռ` օրինագծում նախատեսվում է շրջափակել ԱՄՆ-ում Ադրբեջանի բարձրագույն ղեկավարների եւ նրանց ընտանիքների ակտիվները:

«Ազատություն» ռադիոկայանի ադրբեջանական ծառայությունը 2016 թվականի մարտի սկզբին հայտնել էր, որ Վաշինգտոնում Ադրբեջանի համար առանցքային լոբբիստ համարվող Դեն Բարթոնը հրաժարվել է շարունակել պաշտպանել Ադրբեջանին, քանի որ Բաքուն արդեն մեկ տարի է` չի վճարում խոստացված աշխատավարձը:

Ներկայացուցիչների պալատի հանրապետական նախկին անդամը (Ինդիանա նահանգ) մարտի 1-ին ԱՄՆ-ի ադրբեջանցիների դաշինքին լոբբիստական ծառայություն մատուցող ընկերության ղեկավար Ջեյմս Ֆաբիանիին հղած նամակում գրել է. «Արդեն մեկ տարի է` Անար Մամեդյարովը չի շփվում ինձ հետ: Իմ այս նամակն ընդունեք որպես Ադրբեջանա-ամերիկյան դաշինքի (AAA) նախագահի պաշտոնից հրաժարական»:

Այդ խմբի ղեկավարը Ադրբեջանի տրանսպորտի նախարար Զիյա Մամեդովի որդին` Անար Մամեդովն է: «Ազատություն» ռադիոկայանի թղթակից Կարլ Շրեկը նշել է, որ 2011 թվականից Անար Մամեդովը ԱՄՆ-ի լոբբիստների վրա 12 մլն դոլարից ավելի փող է ծախսել:

2015 թվականի սեպտեմբերին ադրբեջանական ԶԼՄ-ները հայտնել էին, որ ֆինանսական խնդիրների պատճառով Անար Մամեդովը դադարեցրել է ԱՄՆ-ում AAA-ի գործունեությունը` փակելով Վաշինգտոնում դաշինքի գրասենյակը եւ պաշտոնապես ցրելով կոլեկտիվը: Նշվում է, որ Անար Մամեդովը մեծ պարտքեր է կուտակել, ինչի արդյունքում, այլեւս չի կարողանում «կերակրել» ԱՄՆ-ի սենատորներին: