«Եվրալիգայում» շատ հարցեր անպատասխան մնացին

«Եվրալիգայի» խաղարկության քառորդ եզրափակիչ փուլի առաջին հանդիպումները դեռևս ոչինչ չեն հստակեցրել:

«Արմենպրես»-ը հայտնում է, որ ապրիլի 7-ին կայացել են եվրոպական ֆուտբոլի երկրորդ խոշոր մրցաշարի 1/4 եզրափակիչի հանդիպումները` անգլիական «Լիվերպուլը» հյուրընկալվել է Դորտմունդի «Բորուսիային», Բիլբաոյի «Ատլետիկը» սեփական հարկի տակ ընդունել է «Սևիլիային», պորտուգալական «Բրագան» հյուրընկալել է Դոնեցկի «Շախտյորին», իսկ իսպանական «Վիլյառեալը» ուժերը չափել է Պրահայի «Սպարտայի» հետ:

Հայ ֆուտբոլասերների ուշադրության կենտրոնում հիմնականում Հենրիխ Մխիթարյանի թիմի` «Բորուսիայի» մրցելույթն էր: Ներկայում «Լիվերպուլը» գլխավորող Յուրգեն Կլոպի համար այս խաղն առաջինն էր «Սիգնալ Իդունա Պարկ» մրազադաշտում որպես «Բորուսիայի» նախկին մարզիչ, ինչն էլ լրացուցիչ հետաքրքրություն ու ինտրիգ էր ապահովել:

«Բորուսիան» առաջին խաղակեսը բավականին ակտիվ սկսեց` փորձելով արագ գոլ հեղինակել, սակայն առաքելությունը չիրագործվեց: Որոշ ժամանակ անց «Լիվերպուլը» հավասարեցրեց խաղը` փորձելով սեփական գրոհները ձեռնարկել:

Առաջին խաղակեսում ուշադրության կենտրոնում Մխիթարյան-Մարկո Ռոյս-Օբամեյանգ տրիոն էր, որն ընթացիկ մրցաշրջանում արդեն 75 գոլի հեղինակ է դարձել: Հանդիպման արդեն 17-րդ րոպեին Մխիթարյանը կարող էր աչքի ընկնել, սակայն նրա հարվածից հետո դեպի դարպասը սլացող գնդակի առջև կանգնեց անգլիական ակումբի պաշտպան Մամադու Սախոն: Առաջին խաղակեսում գերազանց մրցաշրջան անցկացնող Մխիթարյանը ևս երկու անգամ անհանգստացրեց «Եվրալիգայի» մրցաշարի վերջին 5 խաղերից 4-ում սեփական դարպասն անառիկ պահած «Լիվերպուլի» դարպասապահին. մի դեպքում Մխիթարյանը սայթաք եց ու թույլ հարվածեց, մեկ այլ դեպքում գնդակը փոքր շեղությամբ անցավ դարպասաձողի կողքով:

«Լիվերպուլը» փորձեց հակագրոհներ ձեռնարկել, սակայն «Բորուսիայի» պաշտպանությունը հուսալի խաղ էր ցուցադրում: Հանդիպման 36-րդ րոպեին, այնուամենայնիվ, անգլիական ակումբին հաջողվեց գնդակը խաղարկելով հասնել մինչև մրցակցի տուգանային հրապարակի մատույցներ: Այդտեղ էլ իր արագության հաշվին Դիվոկ Օրիժին կարողացավ մեկ քայլ առաջ մտածել և հարվածեց «Բորուսիայի» դարպասին` գնդակը գլորելով դաշտի տերերի դարպասից ներս:

Սեփական դարպասին գոլ ընդունելուց հետո «Բորուսիան» չընկճվեց. մինչև առաջին խաղակեսի ավարտը մի քանի վտանգավոր պահեր ստեղծեց, սակայն բոլորն էլ ապարդյուն էին: Մրցավարի՝ առաջին խաղակեսին ավելացրած 4-րդ րոպեին «Լիվերպուլը» կարող էր կոտրել մրցակցին, սակայն դարպասապահի դեմ մեն-մենակ մնացած Օրիժին որոշեց «բարեգործությամբ» զբաղվել:

Երկրորդ խաղակեսի մեկնարկային րոպեներին Մխիթարյանի փոխանցումից հետո «Լիվերպուլի» դարպասը գրավեց Մաթս Հյումելսը` հավասարեցնելով հանդիպման հաշիվը և հանգստացնելով իր թիմակիցներին: «Լիվերպուլի» խաղացողներին բավականին զայրացրեց բաց թողած գոլը, և նրանք առաջ նետվեցին. հանդիպման 49-52-րդ րոպեներին 3 հիանալի սեյվ գործեց «Բորուսիայի» դարպասապահը` իր թիմին փրկելով նախ Ադեմ Լալանայի, ապա նաև Մաթանիել Քլայնի ու Ֆիլիպ Կոուտինյոյի հարվածներից:

Մինչև խաղավարտ այլևս գոլեր չգրանցվեցին, թեև թե՛ «Բորուսիան», թե՛ «Լիվերպուլը» շատ մոտ էին նոր գնդակներ հեղինակելուն և հաղթանակի հասնելուն:

«Եվրալիգայի» քառորդ եզրափակիչի մյուս հանդիպումներում գրանցվեցին բավականին հետաքրքիր, ինչ-որ տեղ մի փոքր անսպասելի արդյունքներ: Սեփական հարկի տակ «Սևիլիային» ընդունած Բիլբաոյի «Ատլետիկը» ողջ հանդիպման ընթացքում տարածքային առավելություն ուներ, 2-րդ խաղակեսի սկզբում Արիս Ադուրիցի օգնությամբ առաջ էր անցել հաշվի մեջ, սակայն «Եվրալիգայի» մրցաշարի գործող չեմպիոնը փորձառության շնորհիվ նախ 56-րդ րոպեին վերականգնեց հաշվի հավասարակշռությունը, ապա խաղի վերջնամասում` 83-րդ րոպեին Իբորայի գնդակի շնորհիվ շատ կարևոր հաղթաÕ �ակի հասավ մրցակցի դաշտում:

Մրցակցի դաշտում 2-1 հաշվով հաղթանակի հասավ նաև Դոնեցկի «Շախտյորը»: Չնայած «Բրագան» ավելի շատ էր տիրում գնդակին ու գրոհում, սակայն առաջին խաղակեսի վերջում ուկրաինական թիմին հաջողվեց առաջ անցնել հաշվի մեջ. գոլն իր ակտիվում գրանցեց պաշտպան Յարոսլավ Ռակիցկին: Երկրորդ խաղակեսում «Շախտյորը» շարունակեց գրոհել և կրկին հաջողության հասավ. հանդիպման 75-րդ րոպեին Մարլոսի փոխանցումով գոլ հեղինակեց Ֆակունդո Ֆերեյրան: «Բրագան» միայն հանդիպման վերջում` 89-րդ րոպեին կարողացավ մեկ գնդակ հեղինակել, որն էլ իր հաշվին գրանցեց 25-ամյա hարձակվող Վիլսոն Էդուարդոն:

Իսպանական «Վիլիառեալը» սեփական հարկի տակ դժվարությամբ հաղթանակի հասավ Պրահայի «Սպարտայի» նկատմամբ: Արդեն հանդիպման 3-րդ րոպեին Սեդրիկ Բակամբուն առաջ էր մղել «դեղին սուզանավին», սակայն «Պրահայի» ֆուտբոլիստներին հաջողվել էր մինչև ընդմիջում գոլ հեղինակել. աչքի էր ընկել 23-ամյա պաշտպան Յակուբ Բրաբեկը: Երկրորդ խաղակեսը դաշտի տերերը շատ ակտիվ սկսեցին, սակայն Մարիո Գասպարի հարվածից հետո գնդակը հետ մղվեց դարպասաձողից: «Վիլյառեալը» չհիասթափվեց և հանդիպման 63-րդ րոպեին Բակամբուի շնորհիվ առաջ անցավ հաշվի մեջ: Իհարկ ե, մինչև խաղավարտ ևս մի քանի հնարավորություններ ստեղծեցին «դեղին սուզանավի» ֆուտբոլիստները, սակայն այդպես էլ ոչ Բակամբուն, ոչ էլ Ռոբերտո Սոլդադոն չկարողացավ մեծացնել հաշվի առավելությունը:

Բնականաբար, առաջին հանդիպումներում գրանցված արդյունքները հնարավորություն են տալիս բոլոր թիմերին հույս ունենալ, որ ընդամենը մեկ շաբաթ անց կայանալիք պատասխան խաղերում բախտը կժպտա իրենց և հաջորդ փուլի ուղեգիրը կնվաճվի անկախ այն հանգամանքից, թե որտեղ է խաղալու թիմը` սեփական, թե մրցակցի հարկի տակ: