Երևանում մեկնարկեց 17-րդ «ՌեԱ» փառատոնը

CULTURE 20 October, 2025 23:35

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կինոյի տանը՝ հոկտեմբերի 19-ին, մեկնարկեց 17-րդ «ՌեԱ» (Ռեանիմանիա անիմացիոն ֆիլմերի և պատկերապատման արվեստի միջազգային) փառատոնը։
Բացմանը ցուցադրվեց «Սիլվեն Շոմեի ֆրանկո-բելգիական «Մարսել Պանյոլի փառահեղ կյանքը» ֆիլմը:
«ՌեԱ»-ի հիմնադիր տնօրեն Վրեժ Քասունին կարևորեց պատկերապատման արվեստում փառատոնի ունեցած ներդրումը և խթանումը.

«Վերջին երեք տարվա ընթացքում մենք թարգմանել և հրատարակել ենք մի քանի միջազգային գիրք: Այս տարվա փառատոնի շրջանակում կներկայացվեն Շառլ Բերբերյանի «Արևելյան դաստիարակությունը», Ֆերմին Սոլիսի «Բունյուելը կրիաների լաբիրինթոսում» և , Լորենցո Մատոտտիի «Կրակներ և շշունջը»: Մեր նպատակն այն է, որ միջազգային պատկերապատման արվեստը ներկայացնենք նաև մեր հայ հասարակությանը, բայց նաև, պատկերապատման արվեստի մեջ ազգային մրցույթ կազմակերպելով, աջակցում ենք այդ ուղղության զարգացմանը: Այս տարի մենք ֆինանսավորել ենք նախանցած տարվա հաղթողին եւ ներկայացնում ենք Լենա Դերունցի «Մխիթարանքը»:

Քասունու խոսքով՝ տարեցտարի ReA-ն դառնում է մասնագիտական երկխոսության հարթակ, իսկ MarAni հարթակը միավորում է անիմատորներին, ռեժիսորներին, պրոդյուսերներին և ոլորտի այլ ներկայացուցիչներին:

«ՄարԱնի» ֆորումը տեղի կունենա հոկտեմբերի 22-24-ը Հայ բարեգործական ընդհանուր միությունում, որի ընթացքում միջազգային և տեղի առաջատար մասնագետները կփոխանցեն իրենց փորձը և գիտելիքները, կիրականացնեն պանելային քննարկումներ։ Ֆորումի հատուկ հյուրերից են Netflix-ի աշխարհահռչակ Arcane սերիալի ստեղծագործական թիմի անդամներ Պասկալ Շարյուն, Սեսիլ Էրգո-Էսեյմը և Օրելիան Ռեսանկուրը։

ՀՀ կրթության, գիտության, մշակույթի և սպորտի նախարարի տեղակալ Դանիել Դանիելյանի խոսքով՝ «ՌեԱ» փառատոնն իր շուրջը համախմբելով արվեստագետների աշխարհի տարբեր ծայրերից, հիշեցնում է, որ անիմացիան միայն կինո չէ, այն պատմություններ ստեղծելու արվեստ է, երազելու հնարավորություն:

«Վերջին 2 տարվա ընթացքում պետությունը հատկացրել է մոտ 170 մլն դրամ՝ անիմացիոն ֆիլմերի և նախագծերի ստեղծման ու զարգացման համար»,-հավելեց փոխնախարարը:

Փառատոնի շրջանակում, TUMO ստեղծարար տեխնոլոգիական կենտրոնի աջակցությամբ, առաջին անգամ Հայաստան է ժամանել ճանաչված անիմատոր, Pixar-ի «Elio» ֆիլմի ռեժիսոր Մադլեն Շարաֆյանը։ Հանդիսատեսը բացմանը հնարավորություն ունեցավ վայելելու նրա՝ Օսկարի նոմինացված «Որջը» կարճամետրաժ ֆիլմը:

«ԵՄ–ն մշտապես աջակցել է այս փառատոնին, քանի որ սա հարթակ է, որը ներկայացնում է բարձրորակ և նորարարական ստեղծագործություններ՝ ընդգծելով անիմացիայի կարևորությունը, և մեզ տալիս է երազելու, մտածելու և պատկերացնելու հնարավորություն:
Անիմացիոն ֆիլմերի մեծանուն ռեժիսոր, սցենարիստ, մուլտիպլիկատոր Ռոբերտ Սահակյանցն ասել է, որ անիմացիան հեքիաթ է ոչ թե երեխաների, այլ մեծերի համար: Սահակյանցը ժառանգել է ոչ միայն ֆիլմեր, այլև ամբողջական աշխարհընկալում, որտեղ առասպելն ու մանկության հիշողությունները, գեղարվեստական ազատությունը միաձուլվում են շարժանկարի լեզվի շուրջ»,-ասաց Հայաստանում ԵՄ պատվիրակության ղեկավար Վասիլիս Մարագոսը:

Այս տարի նշվում է հայ անիմացիայի երկու նշանավոր գործիչների՝ Լև Ատամանովի և Ռոբերտ Սահակյանցի հոբելյանները, որոնց կարճամետրաժ ֆիլմերից ևս ցուցադրվեց փառատոնի բացման ժամանակ: Վրեժ Քասունին մրցանակ հանձնեց մուլտիպլիկատոր նկարիչ Իգոր Պատրիկին:

Նշենք, որ այս տարի ևս կանցկացվի CoReAct համարտադրության հարթակը, որտեղ ներկայացված է հայաստանյան անիմատորների 11 նախագիծ։ Մասնակիցներն իրենց աշխատանքները կներկայացնեն միջազգային փորձագետներին, որոնք կընտրեն լավագույն աշխատանքները, հաղթողները կստանան դրամական պարգևներ։ Ծրագրին աջակցում է «Հայաստան» համահայկական հիմնադրամը:
Փառատոնն այս տարի հյուրաշատ է. Հայաստան է ժամանելու հանրահայտ իտալացի կոմիքս արտիստ, սցենարիստ, ռեժիսոր և իլյուստրատոր Լորենցո Մատոտտին, որը «ՌեԱ» 17-րդ միջազգային փառատոնի պաստառի հեղինակն է։ Փառատոնի այցելուները հնարավորություն կունենան մասնակցել Մատոտտիի աշխատանքների ցուցահանդեսին ReA Comics-ի շրջանակում։ Հայաստան է ժամանել նաև ծագումով հայ մուլտիպլիկատոր, կոմիքսների հեղինակ Շառլ Բերբերյանը, որն ամենաանվանի հեղինակներից մեկն է Իններորդ արվեստի ժանրում։

«ՌեԱ» անիմացիոն ֆիլմերի և պատկերապատման արվեստի միջազգային փառատոնի գլխավոր հովանավորը Երևանի քաղաքապետարանն է, իսկ գլխավոր աջակիցը՝ ՀՀ ԿԳՄՍ նախարարությունը: Փառատոնին աջակցում են նաև «Հայաստան» համահայկական հիմնադրամը, Հայաստանում ԵՄ պատվիրակությունը, Հայաստանում Ֆրանսիայի դեսպանատունը, Հայաստանում ֆրանսիական ինստիտուտը, Հայաստանում ԵՄ պատվիրակությունը, Երևանի Գյոթե ինստիտուտը, Հայաստանում Իսպանիայի թագավորության գրասենյակը։

Հետևեք մեզ՝ այստեղ