Թրամփը Նեթանյահուին ասել է, որ նա «միշտ անտանելի բացասաբար է տրամադրված». Axios

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երբ ուրբաթ օրը պաղեստինյան ՀԱՄԱՍ խմբավորումը ԱՄՆ նախագահ Դոնալդ Թրամփի՝ Գազայի շուրջ խաղաղության առաջարկին պատասխանեց «այո, բայց․․․», Թրամփը զանգահարեց Իսրայելի վարչապետ Բենիամին Նեթանյահուին՝ քննարկելու այն, ինչ նա լավ լուր էր համարում, հաղորդում է Axios-ը։

Սակայն Նեթանյահուն այլ կարծիք է ունեցել։

«Բիբին ասել է Թրամփին, որ այստեղ տոնելու բան չկա և որ դա ոչինչ չի նշանակում», — Axios-ին հայտնել է խոսակցության ընթացքին ծանոթ ամերիկացի պաշտոնյան։

Թրամփը պատասխանել է. «Չեմ հասկանում, թե ինչու ես միշտ այդքան անտանելի բացասաբար տրամադրված։ Սա հաղթանակ է։ Ընդունիր դա»։

Այս կարծիքների փոխանակումը, որը հաստատել է նաև երկրորդ ամերիկացի պաշտոնյան, արտահայտում է Թրամփի վճռականությունը՝ հաղթահարելու Նեթանյահուի վերապահումները և համոզելու նրան դադարեցնել պատերազմը, եթե ՀԱՄԱՍ-ը համաձայնի գործարքին։

Թրամփի ծրագրի պաշտոնական պատասխանում ՀԱՄԱՍ-ը հայտարարել է, որ պատրաստ է ազատել բոլոր մնացած պատանդներին՝ պատերազմի դադարեցման և Գազայի հատվածից Իսրայելի զորքերի լիակատար դուրսբերման դիմաց։ Սակայն խմբավորումը պահանջել է բանակցություններ բազմաթիվ մանրամասների շուրջ։

Ուրբաթ օրը մասնավոր խորհրդակցությունների ընթացքում Նեթանյահուն ընդգծել է, որ ՀԱՄԱՍ-ի արձագանքը համարում է Թրամփի ծրագրի մերժում։ Նա նշել է, որ ցանկանում է համակարգել իր քայլերը ԱՄՆ-ի հետ՝ կանխելու համար այն տպավորությունը, թե ՀԱՄԱՍ-ը դրական պատասխան է տվել, հայտնել է Axios-ին իսրայելցի պաշտոնյան։

Թրամփի տրամադրությունը բոլորովին այլ է եղել։ Բարձրաստիճան ամերիկացի պաշտոնյայի վկայությամբ, նա մտահոգված է եղել, որ ՀԱՄԱՍ-ը կտրականապես կմերժի ծրագիրը, և խմբավորման փաստացի արձագանքը դիտարկել է որպես գործարքի հնարավորություն։

Երբ Թրամփը զանգահարել է Նեթանյահուին, իսրայելցի վարչապետի արձագանքը եղել է ոչ այնպիսին, ինչպիսին նա սպասում էր, հայտնել են երկու ամերիկացի պաշտոնյաներ։ Դրա հետևանքով էր Թրամփի կտրուկ արձագանքը։ Թրամփը նաև անդրադարձել է այդ զանգին՝ շաբաթ օրը Axios-ին տված կարճ հարցազրույցում՝ նշելով, որ ասել է Նեթանյահուին, թե դա նրա «հաղթանակի հնարավորությունն» է, և որ ի վերջո Նեթանյահուն համաձայնել է։

«Դա նրան ձեռք է տալիս։ Նա պետք է համաձայնի։ Նա ընտրություն չունի։ Ինձ հետ քեզ համար ամեն ինչ պետք է լավ լինի», — ասել է Թրամփը։ Զանգից երեք ժամ անց Թրամփը հանդես է եկել հայտարարությամբ՝ կոչ անելով Իսրայելին դադարեցնել Գազայի օդային հարվածները։ Երեք ժամ անց Նեթանյահուն տվել է համապատասխան հրահանգը։

Շաբաթ օրը Նեթանյահուի օգնականները ընդգծել են, որ նա և նախագահը լիովին համերաշխ են։ Նեթանյահուն տեսաուղերձ է հրապարակել, որտեղ գովաբանել է Թրամփին և ընդգծել նրա վերջին հայտարարությունների այն հատվածները, որոնց հետ համաձայն է։

Ամերիկացի պաշտոնյան նշել է, որ ուրբաթ օրվա հեռախոսազրույցի ընթացքում նրանց միջև հարաբերությունները շատ ավելի լարված են եղել, և որ Թրամփը նյարդայնացած է եղել։ Չնայած «կոշտ և վճռական» քննարկմանը, երկու պաշտոնյաներն ընդգծել են, որ հաջողվել է հասնել համաձայնության։

«Ի վերջո, նախագահ Թրամփը խաղաղություն է ցանկանում, և դա ամենակարևորն է։ Վարչակազմն արդեն սերտորեն համագործակցում է Իսրայելի հետ՝ այդ նպատակին հասնելու համար», — ասել է պաշտոնյան։ Սպիտակ տունը հրաժարվել է մեկնաբանել այդ զանգը։

Շաբաթ օրը Թրամփը շարունակել է կողմերին մղել գործարքի կնքման։ Նա հրապարակային ուղերձ է հղել ՀԱՄԱՍ-ին՝ զգուշացնելով խմբավորմանը ձգձգման մարտավարություն չկիրառել։ Նա ընդգծել է, որ եթե ՀԱՄԱՍ-ը առաջ չընթանա պատանդների ազատման հարցում, գործարքը կչեղարկվի։

Հետևեք մեզ՝ այստեղ