«Ներկայացման մեջ ձիեր ու փղեր չկան, տանկեր չեն մտնում բեմ, մարդն է՝ իր բոլոր հույզերով». «Ջին խաղը». պրեմիերա՝ Համազգային թատրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ս. Սարգսյանի անվան Համազգային թատրոնում կայացավ Դ. Լ Կոբուրնի «Ջին խաղը» ներկայացման պրեմիերան՝ ՀՀ վաստակավոր արտիստներ Դավիթ Հակոբյանի և Գրետա Մեջլումյանի դերակատարմամբ:

Բեմադրիչը դերասան Արման Նավասարդյանն է, ում այս պիեսը վաղուց էր անհանգստացնում:

Tert.am Life-ը ներկայացման առաջնախաղից առաջ զրուցել է ռեժիսորի և դերասանների հետ: Բոլորն էլ սովորականից ավելի շատ էին հուզված, թեման բարդ էր ու պատասխանատու, իսկ Գրետա Մեջլումյանը 15 տարի անց նոր դերով էր բեմ բարձրանում...

Առավել լարված էր բեմադրիչ Արման Նավասարդյանը, ով խոստովանեց, որ բեմ բարձրանալիս երբեք այսքան չի հուզվում, որքան հիմա, երբ հանդիսատեսի դատին է հանձնում իր առաջին լուրջ բեմադրությունը, բացի այդ, բեմում են իր վարպետները...

«Դեռևս ուսանողական տարիներից սիրել եմ այս գործը: Աչքի տակ ունենալով երկու հրաշալի թեկնածու այս ներկայացման համար և չբեմադրել այն, ես համարեցի ժամանակի կորուստ ու որոշեցի, որ անպայման բեմադրվի հենց այս երկու հրաշալի վարպետների հետ: Ես եղել եմ իրենց սանը։

Եվ՛ տիկին Գրետայի, և՛ Դավիթ Հակոբյանի հետ ինձ համար շատ դժվար էր բեմադրելու ընթացքը, որովհետև դու ասում ու պահանջում ես մի բան քո վարպետներից, որը իրենք են քեզնից պահանջել շատ տարիներ առաջ:

Բայց այս գործն անպայման ուզեցի իրենց հետ անել, որովհետև կարծեցի, որ սա կլինի իմ ինչ-որ ձևով երախտիքի խոսքն իմ վարպետներին և խոնարհումս նրանց»,- Tert.am Life-ի հետ զրույցում պատմեց Արման Նավասարդյանը:

Բացի այդ, Արման Նավասարդյանը շատ էր ուզում նրանց միասին տեսնել բեմում: Վստահ էր, որ կհիացնեն հանդիսատեսին:

«Ես ուզում եմ, որ այս ներկայացումը երկար ապրի, որովհետև կարծում եմ՝ դերասանական լավ աշխատանք է կատարվել:

Կուզենամ, որ սերունդները երկար վայելեն այս վարպետաց դասը»,- նշեց բեմադրիչը:

Արման Նավասարդյանն ասաց, որ այս ներկայացման մեջ արտասովոր ոչինչ չկա, ակրոբատիկ էլեմենտներ չկան, ձիեր չկան, տանկեր չեն մտնում բեմ, ինչին որ հակված է ամբողջ աշխարհի թատրոնը:

«Ցավոք, դերասանը մղվել է երկրորդ պլան, իսկ սա շատ դերասանական ներկայացում է, մարդու մասին ներկայացում է, մարդ՝ իր բոլոր հույզերով, էմոցիաներով, հարաբերություններով, ստելով, կեղծելով, ճշմարիտ լինելով և այլն... բոլոր դրսևորումներով մարդն է:

Մենք վերադարձրել ենք մարդուն, այս ներկայացմամբ մենք բեմից ցույց ենք տալիս ոչ թե այծեղջյուրներ կամ փղեր, այլ հենց մարդուն»,- Tert.am Life-ի հետ զրույցում ասաց Արման Նավասարդյանը:

15 տարի անց նոր դերով բեմ վերադարձավ դերասանուհի Գրետա Մեջլումյանն, ով մեզ հետ զրույցում չթաքցրեց հուզմունքն ու անհանգստությունը:

«Արման Նավասարդյանը ժամանակին եղել է իմ հրաշալի ուսանողը, ինքը բազմաժանր ստեղծագործող է:

Ես միշտ իրենով հիացել եմ և ինքն ինձ համար դեմք է։ Ես նախ ուզում եմ իմ շնորհակալությունը հայտնել, որ 15 տարի դեր չխաղալուց հետո Արմանն ինձ նվեր արեց այս դերը:

Ես սկզբից, իհարկե, անակնկալի եկա, բայց հետո համաձայնեցի։

Ես երեխայի նման լսել եմ և արել նրա բեմադրական պահանջները, որովհետև ինքն է բեմադրող ռեժիսորը և ունի իր մտահղացումը, ինքը ունի իր ասելիքը, մենք պետք է աշխատենք նրա ձեռագրի մեջ»,- անկեղծացավ մեր զրուցակիցը:

Դերասանուհին իր մտահոգությունը հայտնեց, որ իր հասուն, լավագույն տարիները կարծես կորցրեց:

«Սիրով ընդունեցի առաջարկը ու հիմա հաճույքով պիտի խաղամ: Դավիթ Հակոբյանի նման խաղընկեր ունենալն էլ առանձնահատուկ հաճույք է»,- ամփոփեց Գրետա Մեջլումյանը:

 Պրեմիրայից առաջ ոչ պակաս հուզված էր Դավիթ Հակոբյանը: Նրա խոսքով՝ այս դերը ստանձնելու համար կյանքի փորձով պիտի հասնես դրան։  

«Դրանով է հետաքրքիր այս դերը: Սա վերջի մասին է։ Մենակ մարդկանց մասին է  այս ներկայացումը՝ անտեր, անընտանիք, մոռացության մատնված մարդկանց: Վերջին հաշվով մարդը մենակ ծնվում է, մենակ ապրում է, մենակ էլ մեռնում է»,- նշեց դերասանը:

Ժամանակին Դավիթ Հակոբյանն այս պիեսի բեմադրությունը նայել է  Խորեն Աբրահամյանի, Արմեն Ջիգարխանյանի և այլ դերասանների կատարմամբ, իսկ աշխատանքային պրոցեսի ժամանակ պարզապես խուսափել է այս գործը նայելուց:

«Ես չէի ուզում, Արմանն է համոզել, որ անենք այս ներկայացումը: Սկզբում ինչ- որ բան կարծես խանգարեր ինձ, բայց հետո սիրեցի, գտա խաղի հաճույքն ու հասկացա ինչ պետք է անել»,- ամփոփեց Դավիթ Հակոբյանը:

Հետևեք մեզ՝ այստեղ