Աշխատաժամանակը կկրճատվի, բայց ոչ «ստրուկների» համար

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ՀՀ աշխատանքի և սոցիալական հարցերի նախարարությունը նախագծերի «սևագիր» հարթակում՝ e-draft.am-ում, «Հայաստանի Հանրապետության աշխատանքային օրենսգրքում փոփոխություններ և լրացում կատարելու մասին» օրենքի նախագիծ է ներկայացրել, որով առաջարկվում է կրճատել աշխատաժամանակի տևողությունը՝ դարձնելով օրական 8-ից 7 ժամ, իսկ շաբաթական 40-ից 35 ժամ՝ պահպանելով աշխատավարձը։

Նախագծի հեղինակը աշխատանքի և սոցիալական հարցերի նախարարի տեղակալ Ռուբեն Սարգսյանն է, որը MediaHub-ի հետ զրույցում նշեց՝ նախագիծը մի քանի նպատակ ունի՝ աշխատանք-անձնական կյանք հարաբերակցությունը կարգավորելն է։

«Բոլորս գիտենք, որ այդ 8-8-8 հարաբերակցությունը գալիս է դեռ 1800-ականների կեսերից, իսկ այդ ժամանակահատվածից և՛ տեխնոլոգիաներն են զարգացել, և՛ աշխատանքի, արտադրության պրոցեսներն են զարգացել, այսինքն՝ ավելի արդյունավետ է սկսել իրականացվել աշխատանքը։ Բայց նախագիծն այդ նպատակից բացի այլ նպատակներ էլ ունի՝ առողջապահական իրավունքներն են, տնտեսական մասնակցության վրա դրական էֆեկտ է ունենալու, և բազմաթիվ այլ դրական էֆեկտներ կունենա թե՛ գործատուների, թե՛ աշխատողների համար»,- ասաց Ռուբեն Սարգսյանը։

-Դուք թե՛ պետական սեկտորի Ձեր գործընկերներից, թե՛ մասնավոր սեկտորի ներկայացուցիչներից, գործատուներից այդպիսի ազդակներ ստացե՞լ եք վերջին շրջանում, որ խնդրում կամ հորդորում են փոխել աշխատաժամանակի տևողությունը և 8 ժամը դարձնել 7 ժամ։ Թե՞ այլ հանգամանքներ են ձեզ դրդել այս նախագիծը կազմելուն։

-Բազմաթիվ  քննարկումներ եղել են, որի ընթացքում պարբերաբար եղել են հարցադրումներ աշխատաժամանակի ճկունության վերաբերյալ կամ փոփոխության մասով, զուգահեռաբար՝ գիտեք, որ հետևում ենք նաև միջազգային պրակտիկային և փորձին, ու փորձում ենք հասկանալ, թե ինչպիսի կարգավորումներ կարելի է բերել, որոնք քաղաքացիների օգտին կլինեն։ Նման մոդելները մարդկային կապիտալին նպաստող մոդելներ են համարվում, և միայն օգուտ են տալիս։ Բազմաթիվ ուսումնասիրություններ կան դրա վերաբերյալ, և տարբեր երկրներում արդեն օրենսդրական մակարդակում կիրառվում են։

-Ո՞ր երկրներում են, օրինակ, 7 ժամ աշխատում։

-Օրինակ՝ Ֆրանսիայում։

-Իսկ համապատասխան պաշտոնյաների, նաև պատգամավորների, նաև մասնավոր սեկտորի ներկայացուցիչների կամ այլ շահառուների հետ քննարկումներ ծավալե՞լ եք այս գաղափարի շուրջ։

-Այս պահի դրությամբ մենք գաղափարը դրել ենք հանրային քննարկման, որը զուգահեռաբար նշանակում է նաև թե՛ միջգերատեսչական քննարկումներ, թե՛ նաև Ազգային ժողովի հետ քննարկումներ։ Ու նաև կարևոր է տարբեր շահագրգիռ կողմերի հետ քննարկումը, դրանք գործատուների և աշխատողների շահերը ներկայացնողների հետ քննարկումն է։

-E-draft.am-ում տեսնում եմ, որ 96 տոկոսը կողմ է այս նախագծին, 4 տոկոսը՝ դեմ։ Իսկ անձնական շփումներում ի՞նչ պատկեր է, երբ քննարկում եք տարբեր անձանց հետ այս գաղափարը, իրենք ինչպե՞ս են վերաբերվում այս նախագծին։

-Կարելի է ասել՝ նույն համադրությամբ։

-Իսկ այն, որ աշխատող քաղաքացիները հաճախ ժամանակի խնդիր են ունենում պետական կառույցներ այցելելու, քանզի նույն աշխատաժամանակում չեն հասցնում գնալ և այս կամ այն պետական կառույցում իրենց հարցերը կարգավորել, Դուք այս մասով որևէ փոփոխություն նախատեսո՞ւմ եք, օրինակ՝ որոշ կառույցների աշխատանքը դարձնեք հերթափոխով։

-Ես նման ինֆորմացիա չունեմ, իհարկե, որ ժամանակի առումով չեն հասցնում, բայց եթե նման առաջարկ հնչի, բնական է, կքննարկվի։

-Եթե ես հիմա այդ առաջարկը հնչեցնեմ, կքննարկե՞ք։

-Անպայման կքննարկենք, ու նաև կառաջարկեմ Ձեզ e-draft.am-ում Ձեր առաջարկը ներկայացնել։

-Իսկ այն մարդիկ, որոնք իրենց աշխատանքի բնույթից ելնելով՝ միևնույն է, երկար են աշխատում, օրինակ՝ լրագրողները կամ նույն պետական ապարատի աշխատողները, ասենք՝ հենց Դուք, ձեր մյուս տեղակալները, ձեր մամուլի խոսնակը, որոշ վարչության պետեր և այլ նախարարությունների աշխատակիցներ, որոնք հաճախ ինքս էլ տեսնում եմ՝ ժամը 18:00-ից հետո էլի շարունակում են աշխատել, այդ մարդկանց մասով որևէ փոփոխություն լինելո՞ւ է, որ ձեր աշխատանքային իրավունքներն էլ հարգվեն։

-Շնորհակալություն, որ մտածում եք իմ և իմ գործընկերների իրավունքների մասին, բայց նրանք, որոնք ղեկավար պաշտոն են զբաղեցնում, իրենք չնորմավորված ռեժիմով են աշխատում, ու որոշ դրույթներ, որը վերաբերում է նույն աշխատաժամանակին, և այլ դրույթներ նրանց վրա չեն տարածվում։

-Այսինքն՝ շարունակելու եք «ստրուկի» ռեժիմո՞վ աշխատել պետական ապարատում։

-Ստրուկ չի, դա շատ երկրներում ընդունված մոդել է։ Եթե աշխատանք կա, ապա պետք է մնանք ինչքան պետք է։

 Հետևեք մեզ՝ այստեղ