Ադրբեջանի հայատառ քարոզչամեքենայի խայտառակ լրահոսը

Լրատվության ոլորտը վերջին տարիներին նոր թափ է ստացել՝ շնորհիվ համացանցի տարածման: Սակայն սա մեծ շանսեր է տալիս ոչ միայն լրատվության ոլորտում սկսնակ ու արդեն փորձ ունեցող լրագրողներին, այլև ջուր է լցնում ադրբեջանական քարոզչամեքենայի ջրաղացին:

Past.am-ը ներկայացնում է ադրբեջանական խորամանկությունը, որ շատերի համար անհասկանալի կարող է լինել:

Ադրբեջանական կայք՝ հայերեն լեզվով՝ Armenia.az, այսպես է կոչվում այն կայքը, որը ադրբեջանցիները պատրաստել են հայ ընթերցողի համար՝ հայալեզու, բայց ադրբեջանամետ բովանդակությամբ: Շատերին ոչինչ կարող է չասել .az մասնիկը, հատկապես, երբ կայքը կոչվում է armenia.az, բայց արի ու տես, որ ադրբեջանցի լրագրողները՚ լավ էլ սերտել են հայերենը ու գլխավոր նորությունների շարքում, գոնե այսօր, Իլհամ Ալիևի դստեր հոբելյանն է:

Կայքի խմբագրությունը հպարտությամբ է շեշտում, որ Լեյլա Ալիևան հանդիսանում է «Բաքու» ամսագրի գլխավոր խմբագիրը, Հեյդար Ալիևի հիմնադրամի փոխնախագահը, հիմնադրամի ռուսաստանյան ներկայացուցչության ղեկավարը, ԻՀԿ-ի Երիտասարդական ֆորումի գլխավոր համակարգողը, Ռուսաստանի ադրբեջանցիների երիտասարդական կազմակերպության նախագահը, IDEA կազմակերպության հիմնադիրը:

Հետաքրքիր է, որ խմբագրության մտքով անգամ չի անցնում, որ իրենց երկրում տիրող այս իրավիճակը ժողովրդավարության խիստ խախտում է, որ ժողովրդավարական երկրում այսքան պաշտոն մեկի ձեռքում, որպես կանոն, չի կենտրոնանում, և որ հայ ընթերցողին հիմնականում չի հետաքրքրում, թե Ալիևան ում հետ է նշելու իր ծննդյան տարեդարձը:

Այս կայքն այնուհետև շարունակում է իր լրահոսը նմանատիպ վերնագրերով.

• Ադրբեջանն արժանապատվորեն անցկացրեց Եվրոպական խաղերը

• Լոնդոնում կայացել է «Խոջալու. Հայաստանի գործած ռազմական հանցանքների ապացույցը» գրքի շնորհանդեսը

• Ադրբեջանը հույս ունի, որ ԱՄՆ-ն կակտիվացնի իր գործունեությունը ԼՂ խնդրի կարգավորման ուղղությամբ:

Այս ցանկը շարունակելն անիմաստ է, քանզի լրահոսն ամբողջությամբ հիմնված է ադրբեջանական գիտնականների ֆանտաստիկայի վրա, հատկապես, ստորև ներկայացված նախադասությունը՝ «Մեծ Բրիտանիա է այցելել ոմն Բակո Սահակյանը, ով իրեն ներկայացնում է, որպես Ադրբեջանի օկուպացված տարածքներում ստեղծված անջատողական ռեժիմի առաջնորդ»:

ԼՂՀ նախագահական ընտրություններց ու միջազգային դիտորդների բարձր գնահատականներից հետո, արի ու տես, որ ադրբեջանցի լրագրողները մեզ մեր մայրենիով են սովորեցնում, թե ով է Բակո Սահակյանը:

Այս զավեշտի մասին տեղեկացնելու նպատակն այն է, որ մեր հանրությունն ուշադիր լինի, թե ինչ է կարդում, և թե ինչ է մատուցվում իրեն հայատառ ափսեի մեջ:

Արուսիկ Տիգրանյան