«Ուսանողի տանը» հնարավորություն կունենա բնակվել 50-60 ուսանող. «Փաստ»

«Փաստ» օրաթերթը գրում է

Դեռևս նախորդ տարեսկզբին «Փաստ» օրաթերթն անդրադարձել էր «Ուսանողի տուն» ծրագրին: Այն իրականացնում է «Հզոր միտք» հասարակական կազմակերպությունը: Դրա իրականացումը մոտենում է իր տրամաբանական ավարտին, ուստի ծրագրի համակարգող Սոնա Պապիկյանի հետ զրույցում անդրադարձել ենք մի քանի կարևոր հարցերի, մասնավորապես՝ ովքեր կարող են օգտվել ծրագրից, ինչ նպատակ ունի դրա կյանքի կոչումը և այլն: Բայց ամեն ինչի մասին հերթով: Սոնան նշում է, որ ծրագրի սկիզբը դրվել է 2019 թվականի ձմռանը, այնուհետև սկսվել են շինարարական աշխատանքները:

«Ծրագրի առաջնային նպատակը Երևանում մարզերից եկած ուսանողների համար մատչելի բնակության վայր ապահովելն է, դրա հետ մեկտեղ նրանց ոչ ֆորմալ կրթական ծրագրեր տրամադրելը: Որտեղի՞ց առաջացավ այս գաղափարը: Երբ տարբեր սեմինարներ էինք իրականացնում, նկատում էինք, որ մարզերի ուսանողները դրանցից հետ են մնում, իրենք խնդիր էին ունենում մարզերից գալ և մասնակցել սեմինարներին՝ ժամերը հարմար չէին, տուն վերադառնալիս տրանսպորտի խնդիր էին ունենում և այլն: Հենց այդ ժամանակ որոշեցինք ստեղծել մի վայր, որտեղ նրանք կբնակվեն, այսինքն՝ կարիք չեն ունենա բնակարան վարձելու: Գիտենք, որ վարձով բնակարանները բավականին թանկ են լինում, մատչելի լինելու պարագայում էլ լավ պայմաններ չեն լինում: Այդ դեպքում մի քանի համակուրսեցիներով փնտրում և գտնում են մեկ բնակարան, որ վճարվելիք գումարն ավելի քիչ լինի: Որոշեցինք հիմնել կենցաղային լավ պայմաններով ու մատչելի բնակության վայր, դրա հետ մեկտեղ ուսանողներին տրամադրելու ենք ոչ ֆորմալ կրթական ծրագրեր»,-«Փաստի» հետ զրույցում ասում է Սոնան:

Նշում է՝ կազմակերպվելու են տարբեր վեբինարներ ու սեմինարներ, անցկացվելու են տարբեր դասընթացներ: «Լինելու է փորձի փոխանակում բիզնես ոլորտի մարդկանց հետ ու գաղափարների գեներացում: «Ուսանողի տան» հիմնական նպատակն ուսումն ավարտելուց հետո նրանց վերադարձն է իրենց համայնք, գյուղ: Ցանկանում ենք ամեն ինչ անել, որ մարզերից մայրաքաղաք եկած ուսանողները, որոնք այստեղ սովորում են չորս տարի, հետո աշխատանք գտնում Երևանում և հաստատվում այստեղ, հակառակը՝ վերադառնան իրենց համայնքներ և զարգացնեն դրանք: Ցանկանում ենք այնպես անել, որ նրանք իրենց հեռանկարը, ապագան տեսնեն իրենց գյուղում: Այդ պատճառով իրենց այնպիսի մարդկանց հետ ենք ծանոթացնելու, նրանց հետ կապ ստեղծելու, որ հետագայում իրենց բոլոր գաղափարներն իրագործեն իրենց մարզերում»,-նշում է մեր զրուցակիցը:

Երբ սկսվել են «Ուսանողի տան» շինարարական աշխատանքները, դրամահավաք է կազմակերպվել:«Բայց դրամահավաքը կասեցվեց կորոնավիրուսի համաճարակի պատճառով: Բոլոր այն կազմակերպությունները, որոնք համագործակցելու էին մեզ հետ և պատրաստ էին աջակցել, հայտնեցին, որ համաճարակն իրենց ֆինանսական վնասներ է հասցրել և այդ պատճառով չեն կարող մեզ օժանդակել: Համաճարակից հետո եկավ մի շրջան, երբ թափ էինք հավաքում, որպեսզի շարունակենք շինարարությունը, անգամ սկսեցինք որոշ աշխատանքներ, բայց Արցախում սկսվեց պատերազմը: Այդ ընթացքում ողջ թիմով մեր ռեսուրսներն ուղղեցինք պատերազմի կարիքներին, դրան զուգահեռ կառուցում էինք «Ուսանողի տունը» ընտանիքների համար, որոնք բնակության տեղի խնդիր ունեին: Պատերազմն ավարտվեց, բնակության խնդիր Արցախի ընտանիքների համար էլ չկար: Վերադարձանք բնականոն հուն և սկսեցինք կառուցել «Տունը» ուսանողների համար: Բավականին աշխատանք է կատարվել, պլանավորում ենք բացվել սեպտեմբերին: Մնում է կահավորումը և վերանորոգման մի քանի դետալներ: Աշխատանքի մեծ մասն արված է: Հիմա կրկին դրամահավաք ենք կազմակերպել, որպեսզի ավարտենք աշխատանքները:

Տարբեր ընկերություններ և անհատներ այս ընթացքում եղել են ու հիմա էլ մեր կողքին են: Մեկը կարող է գումար տրամադրել, մյուսն՝ ամենատարբեր իրեր: Յուրաքանչյուրն օգնում է իր հնարավորությունների սահմանում: Պարտադիր չէ, որ գումար փոխանցի դրամահավաքին, օրինակ՝ հնարավոր է համակարգիչ ունենա, դա նվիրի «Ուսանողի տանը», այն ևս շատ օգտակար է»,-ընդգծում է Սոնան: «Ուսանողի տունը» նախատեսված է մոտ 50-60 ուսանողի համար, սա միայն բնակվելու դեպքում, իսկ կրթական ծրագրերի դեպքում կարող է դիմել մինչև 100 ուսանող: «Ուսանողները վճարելու են կոմունալների ու աշխատակիցների համար: Այսինքն՝ այս երկու ծառայությունների գումարը մեկտեղվելու է, այնուհետև բաժանվելու բոլոր ուսանողների միջև: Բնականաբար, ավելի մատչելի է լինելու, քան եթե նրանք բնակվեն վարձով»,-ասում է ծրագրի համակարգողը:

Իսկ վերջում հետաքրքրվում ենք ՝ ենթադրենք «Ուսանողի տանը» բնակվելու համար դիմեց 100 ուսանող, իսկ տեղերը փաստորեն սահմանափակ են, այս դեպքում ինչպե՞ս է կատարվելու ընտրությունը: «Պլանավորում ենք մի քանի փուլով ընտրություն կատարել: Ամենասկզբում հարցաթերթիկների միջոցով կփորձենք հասկանալ, թե ովքեր են գաղափարակից մեր ծրագրին, այսինքն՝ ցանկանում են զարգացնել իրենց մարզը, գյուղական համայնքը: Սկզբում հարցաթերթիկների միջոցով կֆիլտրենք դիմողներին, այնուհետև կլինի հարցազրույց, որն անցկացնող հանձնաժողովն էլ կորոշի, թե ով է բնակվելու «Ուսանողի տանը»: Եվս մեկ դիտարկում: Առավելություն է տրվելու այն ուսանողներին, որոնք ավելի հեռու մարզերից են գալու Երևանում բնակվելու»,-եզրափակում է Սոնա Պապիկյանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում