Նրա ծնունդով մեր տանը տիրում է ավելի տաքուկ տրամադրություն. ծնվել է Նարինե Պետրոսյանի երրորդ դուստրը

LIFE 14 December, 2015 17:05

Դերասանուհի Նարինե Պետրոսյանի ընտանիքում արդեն 15 օր է, ինչ ապրում է նրանց երրորդ երջանկությունը. Ճիշտ կես ամիս առաջ ծնվել է նրա երրորդ դուստրը՝ Ադելը, ով իր հետ ձմռան այս ցուրտ եղանակին անասելի ջերմացրել է դերասանուհու ընտանիքը:

Life.panorama.am-ը զրուցել է դերասանուհու հետ. «Մեր տան ամենագլխավոր փոփոխությունը մեկ հոգով ավելանալն է,- նկատեց դերասանուհին ու շարունակեց, - Որպես բազմազավակ ծնողներ՝ զգացողությունների մասին առանձնապես չեմ կարող խոսել, միայն կասեմ, որ կարծես թե կյանքի նոր էտապ է սկսվել մեր փոքրիկի հետ, նրա ծնունդով մեր տանը տիրում է նրբության, ավելի տաքուկ տրամադրություն: Մեր Ադելի ծնունդով մի տեսակ ձմեռն էլ է ջերմացել. Ընդհանրապես ես տարվա այս եղանակը չեմ սիրում, ուստի ինձ համար ուրախալի է, որ նա հենց այս եղանակին է ծնվել, քանի որ իմ չսիրված եղանակին ես միշտ կունենամ իմ տաքուկ անկյունը»:

Արդեն 3 երեխայի մայր Նարինեն նկատեց նաեւ. «Իհարկե, առաջնեկի ծնունդի ժամանակ մոր համար ամեն բան նոր է, անսովոր, բայց ամեն երեխայի ծնունդով նոր զգացողություններ ես ունենում, նրանց ամեն ծնունդը նոր տոն է դառնում, բացի այդ, որպես մայր, տարիքի հետ ուրիշ, ավելի հասուն կերպով ես ընկալում եւ վերաբերվում: Օրինակ իմ առաջնեկը ինձ համար շատ հեշտ մեծացավ, որովհետեւ այն ժամանակ նույն տարիքից ելնելով շատ թեթեւ էի նայում ամեն բանի, բայց հիմա մի տեսակ թե պատասխանատվությունն է մեծանում, թե հասկանում ես, որ երեխայի համով շրջանը շուտ է ավարտվում եւ պետք է հասցնես վայելել…Մի խոսքով հասուն տարիքում երեխա ունենալն էլ իր առավելությունն ունի»:

Նարինե Պետրոսյանը երեխաների խնամքի հարցում դեռեւս ինքնուրույն է գլուխ հանում. «Ճիշտ է երեք երեխաների հետ այնքան էլ հեշտ չէ, բայց փորձում եմ դեռեւս ինքնուրույն գլուխ բերել: Ուզում եմ մեկ, երկու ամիս վերականգնվել, քանի որ կեսարյան հատումով եմ երեխա ունեցել, բայց հետո կդիմեմ դայակի, ով ինձ օգնել է նաեւ առաջին երկու երեխաներիս հարցում»,- նշեց նա:

Ի դեպ, նորաթուխ մայրիկը պատմեց, որ փոքրիկի անվան հարցում բավականին «տանջվել» են. «Մի քանի անուն էինք մտածում, բայց ոչ մի կերպ չէինք կարողանում կողմնորոշվել, անգամ, երբ ծնվել էր, դեռ հիվանդանոցում նայում էի դեմքին ու տարբեր անուններ տալիս՝ ցանկանալով իր ռեակցիան տեսնել, արդյունքում որոշեցինք պահպանել մեր «Ա» տառերի շարունակությունն ու ընտրեցինք Ադել անունը»,- պատմեց Նարինեն:

Հետաքրքրվելով, թե ընտանիքի նոր անդամի գալուստը ինչպե՞ս ընդունեցին դերասանուհու դստրերը՝ Անին եւ Աելիտան, Նարինե Պետրոսյանը պատմեց.

«Պատկերացրեք, որ իրենք շատ երկար ժամանակ էին սպասում փոքրիկ քույրիկին: Մինչ Ադելի ծնունդը ես ու ամուսինս շատ էինք խոսում մեր աղջիկների հետ, որպեսզի ոչ մի խնդիր չունենանք: Կարծում եմ, այդ բարիերը մենք չունեցանք, որովհետեւ նրանք արդեն մեծ են, փորձում եմ շատ հասուն կերպով մոտենալ, անգամ Աելիտան, ով գրեթե 5 տարեկան է, շատ խնամքով է վերաբերվում քույրիկին, ուզում է անընդհատ գրկել, սիրել»:

Հետաքրքրվելով, թե արդեն փորձառու մայրիկը կցանկանա՞ ապագայում կրկին մայրանալ, Նարինեն ծիծաղելով նկատեց. «Բացի ինձնից, բոլորը այդ մասին մտածում են, թող բոլորը գան ինձ օգնեն, գուցե այդ ժամանակ մտածեմ այդ մասին: Իհարկե, ամուսինսն յուրաքանչյուր հայ տղամարդու նման մտածում է որդու մասին, բայց մենք շատ երջանիկ ենք նաեւ մեր աղջիկներով: Գուցե հետագայում կրկին մայրանամ, դա մեր որոշելիքը չէ, Աստված առաջ»:

Դերասանուհին նախատեսում է աշխատանքին վերադառնալ փետրվարից: Մեր այն նկատառմանը, թե ինչպե՞ս է կարողանում երեխաներից հետո վերադառնալ իր նախկին կազմվածքին, Նարինե Պետրոսյանը կիսվեց իր տարբերակով. «Պատկերացրեք հիմա էլ ով ինձ տեսնում է, զարմացած ասում են՝ «Ու դու պետք է ասես, որ 3-րդ երեխա՞ն ես ունեցել»: Իրականում ես շատ եմ կարդում հղի կանանց համար համապատասխան գրականություն, հետեւում եմ մարդկանց փորձին, հղիության ընթացքում փորձում եմ նորմայից ավել չգիրանալ, բացի այդ հղիության առաջին 4 ամիսը հաճախում եմ հատուկ խորեգրաֆիկ դասընթացների, ինչը եւս ազդում է կազմվածքը պահպանելու հարցում: Պետք է սիրես ինքդ քեզ, հետեւես եւ ապրես առողջ ապրելակերպով»,- նշեց նա:

Հեղինակ՝ Անուշիկ Մելքոնյան