Սկզբում ընկերական հարաբերություններ էինք պահում, հետո զգացմունքները տեղի տվեցին. Նարե Գրիգորյանն՝ ամուսնանալու և երկրից գնալու մասին

LIFE 23 November, 2015 20:15

Aysor.am-ը գրում է.

Երգչուհի Նարե Գրիգորյանը՝ Սամվել Գրիգորյանի դուստրը, շուտով պատրաստվում է մեկնել ԱՄՆ: Ըստ շրջանառվող խոսակցություններչի՝ երգչուհին մեկնում է ամուսնության նպատակով: «Իսկապես, շուտով մեկնելու եմ ԱՄՆ, բայց ոչ թե ամուսնության, այլ նշանածիս հետ տեսակցության: Սա իմ առաջին այցելությունը չէ, հաճախ եմ այնտեղ լինում և մինչ ամուսնությունն էլի կգնամ: Ինչ արած՝ մենք հեռավորության վրա ենք բնակվում և պետք է փորձենք գոնե ժամանակ առ ժամանակ տեսնվել: Դեռ չեմ ցանկանում այնտեղ մշտական բնակություն հաստատել»,-Aysor.am-ի հետ զրույցում նշեց երգչուհին:

Երկարատև լռությունից հետո նա վերջապես բարձրաձայնեց, որ իրենք նշանադրվել են օգոստոսի 14-ին, սակայն մինչ այս գաղտնի են պահել այդ ուրախ լուրը: Երգչուհու ընտրյալը Ամերիկայում ծնված և մեծացած Մովսեսն է, ով, ի դեպ, անծանոթ չէ շոուբիզնեսի աշխարհի ներկայացուցիչներին: «Ճիշտ է, կայքերը մեր նկարները գտնում էին, տեղադրում, գրում այս մասին, բայց մենք երբեք չենք հայտարարել, որ նշանվել ենք: Նա մասնագիտությամբ հոգեբան է, բայց ազատ ժամանակ երգեր, բանաստեղծություններ է գրում, որոնցից մի մասը նվիրել է մեր երգիչներին, ովքեր սիրով կատարում են»,-տեղեկացրեց նա:

Զույգը ծանոթացել է նախորդ տարի, երբ Մովսեսն առաջին անգամ Հայաստան է եկել: «Թեև նա իմ տարիքին է՝ 23 տարեկան, բայց մինչ այդ Հայաստանում չէր եղել: Ճիշտ է, ընդհանուր ընկեր ունեինք, բայց մեր ծանոթությունը շատ պատահականությունների հետ է կապված: Ի դեպ, ծանոթությունից երկու օր անց նա մեկնեց: Սոցիալական ցանցերով ինձ գտել և ընկերության հրավերներ էր ուղարկել, բայց ես չէի նկատել… Մոտ 6 ամիս անց նոր սկսեցինք շփվել: Սկզբում ընկերական հարաբերություններ էինք պահում, սակայն հետո զգացմունքները տեղի տվեցին և հարաբերությունները փոխվեցին: Նա Հայաստան եկավ ու անակնկալ հայտարարեց նշանադրության մասին»,-ժպիտով վերհիշեց Նարեն:

Մեր զրուցակիցն, ի դեպ, իր իսկ նշանադրության մասին իմացել է արարողության օրը, իսկ թե երբ կլինի հարսանիքը, դեռևս հայտնի չէ. «Նա ինձ անակնկալի բերեց՝ ասելով, որ նշանվում ենք հենց այդ օրը: Ինչևէ, գեղեցիկ էր անակնկալը: Ինչ վերաբերում է ամուսնությանը, դեռ չգիտեմ, թե երբ կլինի: Նա դեռ չի ավարտել համալսարանը: Ես կսպասեմ, մինչև ավարտի, որպեսզի ավելի հեշտ լինի նոր կարգավիճակում ապրելը: Ինքս էլ դեռ անավարտ գործեր ունեմ… Հարսանիքի հետ կապված մի քիչ բարդ է, քանի որ նա այստեղ չունի հարազատներ, ես՝ այնտեղ: Բայց, ամեն դեպքում, գեղեցիկ արարողություն կլինի և՛ Հայաստանում, և՛ ԱՄՆ-ում: Բայց դեռ օր, ամիս, տարի չենք որոշել»:

Ինչ վերաբերում է այնտեղ մշտական բնակություն հաստատելուն, ապա Ն. Գրիգորյանը նշեց. «Այնպես չի, որ ես Հայաստանից ընդմիշտ եմ մեկնելու, մենք և՛ այստեղ կապրենք, և՛ այնտեղ: Աստծո կամոք՝ ամեն ինչ կլինի այնպես, ինչպես պետք է, ոչ-ոք չգիտի, թե իրեն ինչ է սպասվում հաջորդ օրը: Միայն կարող եմ ասել, որ ես առանց Հայաստանի ապրել չեմ կարող: Իմ ընտրյալն էլ դեմ չէ, որ մենք նույնիսկ մշտական բնակությամբ տեղափոխվենք Հայաստան»:

Նելլի Մարգարյան