Ռուզաննա Հարությունյանն՝ անձնական կյանքի ու ապագա ծրագրերի մասին (լուսանկարներ)

Life.panorama.am-ը գրում է.

Life.panorama.am-ի այսօրվա զրուցակիցն է դերասանուհի Ռուզաննա Հարությունյանը, ում հեռուստադիտողը ճանաչեց տարբեր հեռուստասերիալներից, այսօր դերասանուհին հանդես է գալիս «Երկիր մեդիա» հեռուստաընկերությամբ հեռարձակվող «Բարև երկիր» հաղորդաման շրջանակներում որպես հաղորդավարուհի: Դերասանուհի-հաղորդավարուհին մեզ է պատմել իր այսօրվա աշխատանքի, նախասիրությունների, առաջիկա պլանների, ընտանիքի եւ այլ թեմաների մասին:

-Ռուզաննա, տարիներ առաջ հեռուստադիտողը Ձեզ ճանաչեց որպես դերասանուհի, բայց վերջին շրջանում այս ոլորտում Ձեզ չենք տեսնում, հետաքրքիր է` ինչու:

-Կարծում եմ, առանց դադարի միևնույն ոլորտում հեռուստաէկրաններից երևալը իրենից վտանգ է ներկայացնում հենց դերասանի համար. կրկնվելու և հեռուստադիտողին ձանձրացնելու մտավախություն կա: Դադար վերցնելուս պատճառներից մեկն էլ թերևս դա էր: Իհարկե կային նաև օբյեկտիվ այլ պատճառներ: Չնայած դադար ասվածը մի քիչ հարաբերական է: Ես շարունակել եմ աշխատել, պրպտել, ստեղծագործել, նկարահանվել, և վերջին նկարահանումս, որ եղավ` Մեծ եղեռնի 100-րդ տարելիցին նվիրված «Геноцид Начало»  գեղարվեստա-վավերագրական ֆիլմն էր, որի պրեմիերան տեղի ունեցավ ռուսական «НТВ» հեռուստաալիքով: Ֆիլմում մարմնավորել եմ Ցեղասպանության զոհ դարձած երիտասարդ մի կնոջ: Ի դեպ, նշեմ նաև, որ  ֆիլմի ռեժիսորներն են Ստանիսլավ Սիդորովը և Հայկ Օրդյանը: Այժմ կրկին պատրաստ եմ հեռուստադիտողին ներկայանալ որպես դերասանուհի: Հետաքրքիր, շահավետ առաջարկի դեպքում սիրով կարձագանքեմ:

-Հիմա դուք կրկին հեռուստաէկրաններին եք, բայց արդեն հաղորդավարուհու կարգավիճակում, կպատմեք, թե ինչպես հայտնվեցիք այս ոլորտում:

- Ստացածս  դերասանի, ապա  ռեժիսորի մասնագիտությունները թույլ են տալիս դրսևորվել նաև որպես հաղորդավարուհի: Եվ երբ առաջարկ ստացա վարել նախ երաժշտական, ապա առավոտյան «Բարև երկիր» հաղորդումը «Երկիր Մեդիայի» եթերում, սիրով համաձայնեցի, քանի որ հնարավորություն ստացա ինձ համար բացահայտել նոր աշխարհ և հեռուստադիտողին ներկայանալ բոլորովին նոր կերպարով ու նոր ասելիքով: Սրանից մի քանի տարի առաջ ևս ստացել էի հաղորդում վարելու առաջարկ, իհարկե այլ հեռուստաընկերությունից, բայց (հրաժարվելը մի քիչ սխալ կհնչի) այդ ժամանակ համարձակությունս չներեց ընդունել առաջարկն ու անցնել գործի: Ստացվում է, որ այսօր ավելի համարձակ եմ դարձել, և պատճառը տարիների փորձն ու պատրաստվածությունն է:

-Ոչ միայն հաղորդավարուհի, այլ նաեւ լրագրող, ինչպես սկսվեց այս աշխատանքը, հետաքրքիր է` սիրով եք զբաղվում այս աշխատանքով, դժվարություններ չկա՞ն արդյոք:

- Երբևէ ձգտում ու ցանկություն չեմ ունեցել դառնալ լրագրող: Իհարկե յուրաքանչյուր մասնագիտություն ունի իր դժվարություներն ու առանձնաատուկ մոտեցում է պահանջում, բայց լրագրողի աշխատանքն առավել պատասխանատու է և հետևաբար, իմ սուբյեկտիվ կարծիքով, պարտադիր նախապայման է համապատասխան կրթությունը: Չնայած ասում են լրագրողի մտածելակերպ ձեռք բերելու համար պարտադիր չէ ունենալ հատուկ կրթություն ու հմտություններ, պարզապես պետք է լինել հետաքրքրասեր: Իմ դեպում հետաքրքրասիրությունն, իհարկե, առկա է, բայց ոչ ցանկացած ոլորտի նկատմամբ: Իսկ լրագրողին պետք է հետաքրքրի յուրաքանչյուր տարր։

-Հետաքրքիր է` էլ ի՞նչ հետաքրքրություններ կամ նախասիրություններ ունեք:

- Ես այն երջանիկ մարդկանցից եմ, ովքեր սիրում են իրենց մասնագիտությունը և որոնց բախտ է վիճակվել աշխատելու իրենց մասնագիտությամբ: Ապագա դերասանն իր ուսուցման տարիներին անցնում է և պար, և վոկալ: Պետք է անկեղծ գտնվեմ և ասեմ, որ երգելն այնքան էլ լավ չի ստացվում ինձ մոտ, բայց պարել շատ եմ սիրում: Թերևս դա էր պատճառը, որ մեծ հաճույքով, մեծ պատասխանատվությամբ ու սիրով մասնակցեցի «Շանթ» հեռուստաընկերությամբ հեռարձակվող «Պարահանդես» նախագծին: Հետաքրքրություներ, նախասիրություններ շատ ունեմ, բայց հիմնականում բաց չեմ թողնում այն առիթներն ու հնարավորությունները, որոնք թույլ են տալիս թեկուզ  1/4  չափով մասնագիտական քայլ առաջ դնելու:

-Բացի ընթացիկ աշխատանքներից , առաջիկայում ի՞նչ ծրագրեր ունեք նախատեսած:

- Առհասարակ սնահավատ մարդ չեմ, բայց մի շատ հետաքրքիր փաստ եմ արձանագրել իմ կյանքում. երբ խոսում եմ ապագա ծրագրերիցս, դրանք երբեք չեն իրագործվում: Ասեմ ավելին,  ինքս ինձնից գաղտնի եմ պահում ապագա պլաններս.  երևի դրա  համար էլ իմ կյանքում երջանիկ պատահականություները  գերակշռում են:

-Ռուզաննա, կխնդրեմ մի փոքր պատմեք Ձեր ընտանիքի մասին:

- Փառք Աստծո, ունեմ  հայր, մայր, եղբայր, փիլիսոփա քույր: Դուք արդեն պատկերացնում եք չէ՞, թե ընտանիքի մնացած անդամների համար որքան  դժվար է տանն ունենալ փիլիսոփա և դերասան բնակիչներ, առավել ևս, երբ վերջիններս սկսում են վիճաբանել  որևէ հարցի շուրջ: Երբեմն մայրս կատակում է` դիմելով քրոջս, թե «մի՛ փիլիսոփայիր», ինձ էլ, թե «դերասանություն մի՛ արա»:  Շատ եմ սիրում եղբորս, ով ինձնից  ուղիղ ութ տարի փոքր է, ով իմ հպարտությունն է, իմ աշխարհը, ով այս պահին իր պարտքն է կատարում Հայոց Բանակում: Սիրում եմ ընտանիքս, մասնագիտական ոչ մի տեսակի վերելք չեմ գերադասի ընտանիքիցս:

-Չե՞ք պատրաստվում կազմել Ձեր սեփական ընտանիքը:

- Միշտ չեմ հասկացել` ինչ  է նշանակում «արդեն սեփական ընտանիք կազմելու ժամանակն է» նախադասությունը: Երբեք ոչ մի բանի վրա ժամանակ չեմ դնում և տանել չեմ կարողանում, երբ ինձ են ժամանակ տալիս: Երբ հանդիպեմ այն տղամարդուն, ով ինձ չի տա այդ ժամանակն ու պարտադրի, որ տեղավորվեմ այդքանի մեջ, ում ետևից ես վստահ կքայլեմ նույնիսկ աչքերս փակ ու չեմ վախենա, ով թույլ կտա իր կողքին երբեմն  ծուլանալ, թուլանալ, կին զգալ, այդ ժամանակ էլ կկազմեմ իմ սեփական ընտանիքը:

Հեղինակ՝ Անուշիկ Մելքոնյան