«Փարքինգ սիթի սերվիսի» տնօրենը ակնկալում է ընկերության հասույթից տոկոսներ ստանալ

Երևանի քաղաքապետարանն իր պաշտոնական կայքում հաղորդագրություն էր տարածել, որում ասված էր, թե ավարտվել են բանակցությունները «Փարքինգ սիթի սերվիս» և «Լոկատոր» ընկերությունների հետ՝ սեփականության ձևով պայմանավորված նրանց գործառույթները, այդ թվում` ֆինանսական հոսքերի տնօրինումն ու կառավարումը համայնքային կառույցներին անցնելու ուղղությամբ:

Past.am-ը կապ հաստատեց վճարովի ավտոկայանատեղերի մատուցման ծառայություն կազմակերպող «Փարքինգ սիթի սերվիս» ընկերության տնօրեն Վազգեն Հարությունյանի հետ՝ պարզելու, թե այդ քննարկումներն ի՞նչ արդյունք են տվել և, ի վերջո, ի՞նչ հայտարարի են եկել: Ըստ Հարությունյանի՝ ընկերության հետ կատարվող այս փոփոխություններից դժգոհելու կամ չդժգոհելու հիմնական փաստը կապված է լինելու ֆինանսական վերլուծությունների արդյունքներից, ընկերության պարտավորությունների և ակտիվների մասով կատարված հստակ եզրակացությունից:

«Այս պահի դրությամբ հանրաճանաչ համբավ ունեցող աուդիտորական ընկերությունը ուսումնասիրություն է իրականացնում մեր կազմակերպությունում, մոտ ժամանակներս կտա եզրակացություն: Եզրակացության արդյունքներից ելնելով արդեն հետագա քայլերը պարզ կլինեն, քանի որ քննարկումների արդյունքների տակ փաստացի հիմնավորումներ կլինեն: 

–  Ի՞նչ վերլուծություն պիտի կատարի այդ ընկերությունը:

–  Կազմակերպության ֆինանսական ակտիվների մասով: Երևանի փոխքաղաքապետը հայտարարել էր, որ ընկերությունը կփոխանցվի Երևանի քաղաքապետարանին, այդ գործընթացը սկսելու համար պիտի հիմնավորումներ լինեն ֆինանսական վերլուծության և պարտավորվածությունների մասով: Այդ պարտավորությունների վերլուծությունների արդյունքում ընկերությունը համապատասխան փաստաթղթեր կներկայացնի և նոր միայն հաջորդ քայլերը կիրականացվեն: 

Past.am-ի այն հարցին, թե մինչ այդ ինչպես է տնօրինվել ընկերության հասույթը Հարությունյանը պատասխանեց, որ գումարները միշտ էլ հավաքագրվել են Երևանի քաղաքապետարանի հաշվեհամարին, ուղղակի տարբերությունը այն է եղել, որ ծառայություն մատուցելիս Երևանի քաղաքապետարանն իրենց ծառայության դիմաց հավաքագրված գումարներից տոկոս է հատկացրել: 

«Կազմակերպությունը եղել է մեր սեփականությունը՝ այն եղել է ոչ թե քաղաքապետարանինը, այլ՝ հիմնադիրինը: Հիմա հիմնադիրի փոփոխություն է լինելու, հիմնադիրը դառնալու է Երևանի քաղաքապետարանը, այսինքն՝ կազմակերպության բաժնետոմսերը նվիրաբերվելու են Երևանի քաղաքապետարանին: Կարգավիճակը փոխվելու է՝ ընկերությունը դառնալու է պետական, և շահույթը ստանալու է պետությունը: Այժմ կառավարման խնդիր է լինելու, թե ընկերությունը ով է կառավարելու: Ենթադրում եմ, որ ընկերությունը կառավարելու համար ինչ–որ տոկոս կտրամադրվի մեզ զուտ կազմակերպչական՝ աշխատավարձերը և ընթացիկ ծախսերը հոգալու համար»,– նշեց մեր զրուցակիցը: 

–  Որքա՞ն ժամանակ կպահանջվի աուդիտորական կազմակերպության կողմից վերլուծությունն ավարտին հասցնելու համար:

–  Շատ կարճ ժամկետներում եզրակացությունը պատրաստ կլինի: Մեր մասով մենք բոլոր տեղեկությունները պիտի տրամադրենք, փաստաթղթերը դիտելու թույլտվություն կտրվի: Ենթադրում եմ, որ մինչև դեկտեմբերի կեսերը պատրաստ կլինի:

Նշենք, որ նույն հարցով Past.am-ը դիմել էր նաև «Լոկատոր» ընկերությանը: Ընկերության աշխատակցուհին մեզ փոխանցեց, որ տեղեկացրել է իր ղեկավարին՝ Արման Խաչատրյանին, ով սակայն մեզ հետ այդպես էլ կապ չհաստատեց:

Լիլի ԹԵՎՈՍՅԱՆ