Արամ Ավետիսյանը՝ «Քարե դարդ» սիթքոմում մասնակցության, հուսահատությունների, ընկերական խորհուրդների և քննադատությունների մասին

Այսօրվանից ATV-ի եթերում մեկնարկում է «Քարե դարդ» հումորային սիթքոմի նոր եթերաշրջանը, որին իր մասնակցությունն է ունենալու նաև սկսնակ դերասան Արամ Ավետիսյանը: «Երբեք չէի պատկերացնի, որ կհայտնվեմ այդքան բարձր վարկանիշ ունեցող սիթքոմում: Երբ մասնակցում էի քասթինգին, հույս էլ չունեի, թե կանցնեմ, բայց ոչ թե նրա համար, որ վատ դերասան եմ, այլ պարզապես մտածում էի, որ դեռ իմ ժամանակը չի եկել: Հետո ինձ զանգեցին ու ասացին, որ ես եմ խաղալու»,- Past.am-ի հետ զրույցում ասաց Արամ Ավետիսյանը:

 

Մեր զրուցակիցը դերի մասին մանրամասներ չհաղորդեց՝ խորհուրդ տալով դիտել նախագիծը: Արամը խոստացավ՝ հետաքրքիր է լինելու: Այլ նախագծերում զբաղվածության մասին նույնպես չխոսեց: Մեր հարցին՝ շո՞ւտ է հիասթափվում, երբ ստեղծագործական պլանները չեն իրականանում, երիտասարդ դերասանը պատասխանեց. «Ժամանակին արագ էի հուսահատվում, բայց դա առաջ էր, հիմա ես հույսս դնում եմ միայն ինձ վրա ու Աստծո: Նախկինում շատ էի հուսահատվում»:

 

Արամը խոսեց նաև քննադատությունների մասին: «Գիտեք, քննադատներ միշտ էլ կան, եղել են ու կլինեն՝ անկախ նրանից, թե դու լավն ես կամ վատը: Շատ կարևոր է, երբ լինում են քննադատություններ, բայց առողջ, եթե խոսքը գնում է մասնագիտական քննադատության մասին։ Ես սկսնակ դերասան եմ և այս ասպարեզում առաջին քայլերն եմ կատարում: Ես ունեմ ընկերներ այս ասպարեզում, որոնք արդեն բավական մեծ հաջողությունների են հասել ու միշտ կողքիս են: Իրենք կարող են քննադատել, խորհուրդ տալ, իսկ ես հաստատ դրանք կընդունեմ, որովհետև դրանք կլինեն իմ օգտին»,- նշեց Արամ Ավետիսյանը:

 

Լևոն Փանոսյան

 

Կիսվել