Գյումրիում մեկնարկեց «Շիրակի պատմամշակութային ժառանգությունը. հայագիտության արդի հիմնահարցերը» խորագրով միջազգային գիտաժողովը

Գյումրիում  մեկնարկեց  «Շիրակի պատմամշակութային ժառանգությունը. հայագիտության արդի հիմնահարցերը» խորագրով միջազգային գիտաժողովը:  Արդեն 9-րդ անգամ անցկացվող գիտաժողովին մասնակցելու հայտ է ներկայացրել  հայաստանյան 90 մասնակից և 30 գիտնական՝ 14  տարբե ր երկրներից. ընդհանուր առմամբ  երկօրյա գիտաժողովի ընթացքում կհնչի 104 զեկույց:

Ինչպես նախկիններն, այս գիտաժողովը ևս կազմակերպվել և անցկացվում է ՀՀ ԳԱԱ  Շիրակի հայագիտական հետազոտությունների կենտրոնի   կողմից՝  ՀՀ Գիտությունների Ազգային Ակադեմիայի հայագիտության և հասարակական գիտությունների բաժանմունքի, ԿԳՆ  գիտության պետական կոմիտեի, Շիրակի թեմի առաջնորդարանի, Շիրակի մարզպետարանի ու Գյումրու քաղաքապետարանի աջակցությամբ:

Գիտաժողովը պաշտոնապես մեկնարկեց Շիրակի թեմի առաջնորդ Միքայել եպիսկոպոս Աջապահյանի օրհնությամբ, ապա տանուտերի իրավունքով Գյումրի այցելած հյուրերին ու գիտաժողովի բոլոր մասնակիցներին ողջունեցին Շիրակի մարզպետն ու Գյումրու քաղաքապետը՝ մաղթելով արդյունավետ աշխատանքային օրեր:

«Կենտրոնի անուրանալի ձեռքբերումներից են  Գյումրիում ավանդաբար հրավիրվող «Շիրակի պատմամշակութային ժառանգություն. հայագիտության արդի հիմնահարցեր» խորագրով գիտաժողովները: Երկու-երեք տարին մեկ անցկացվող գիտաժողովը, որ ՀՀ ԳԱԱ նախագահության թույլտվությամբ վերջին շրջանում ձեռք է բերել միջազգային կարգավիճակ, նպատակ է հետապնդում բարձրացնել Հայաստանի հյուսիսի, մասնավորաբար՝ պատմական Շիրակի հնագիտական« պատմագիտական, ազգաբանական ու բանագիտական ուսումնասիրության ժամանակակից մակարդակը, բացահայտել տարաբնույթ հետազոտո ւթյունների իրականացման գործում առկա հիմնախնդիրները, առաջադրել ու քննարկել ուսումնասիրվող վիճահարույց իրողությունների նորովի մեկնաբանություններ և հնարավորության սահմաններում ուրվագծել հայագիտության ընդհանուր համատեքստում Շիրակի հարուստ ազգագրության, բանահյուսության, պատմության, արհեստների ու արվեստների ուսումնասիրության հետագա ընթացքն ու առաջնահերթությունները 21-րդ դարի առաջին քառորդին»,- իր խոսքում նշեց ՀՀ ԳԱԱ  Շիրակի հայագիտական հետազոտությունների կենտրոնի տնօրեն,  գիտաժողովի կազմկոմիտեի պատասխանատու քարտուար Սերգո Հայրապետյանը՝ փաստելով, որ այս տարի ևս կներկայացվի ոչ միայն Շիրակի հարուստ ազգագրության, բանահյուսության, պատմության, արհեստների ու արվեստների ուսումնասիրությունների արդյունքները հետագա ընթացքը, այլև հայագիտության  արդի հիմնահարցեր:

Գիտաժողովի շրջանակներում, պաշտոնական բացման և անդրանիկ լիագումար նիստից հետո,  մասնաճյուղային նիստեր անցկացվում են  հնագիտության, մարդաբանության, վիմագրության, պատմագիտության, ժողովրդագրության, ազգաբանության,  բանասիրության և այլ ոլորտներին առնչվող: Հատկանշական է, որ հայագիտությանը և տարբեր երկրներում հայերի ունեցած դերի մասին զեկույցներ կներկայացնեն նաև արտասահմանյան երկրներից ժամանած գիտնականները. օրինակ,  ՌԴ-ն ներկայացնող Ռուսլան Կանդորը  կներկայացնի «Չերքեզական հեծյալ գնդի ձևավորման մեջ հայերի դերը» զեկւյցը, իսկ հարևան Վրաստանից ժամանած Օտար Գոգոլիշվիլին  կխոսի Բաթումիի կապիտալիզմի զարգացման մեջ Մանթաշովի ունեցած ազդեցության ու դերի մասին:  

Ինչպես նախորդ, այդպես էլ այս գիտաժողովի նյութերը ԳԱԱ Շիրակի հայագիտական կենտրոնը հրատարակելու է որպես ժողովածու և տեղադրելու է իր կայքում:

Արմենուհի Մխոյան