ԼՂՀ Մարտունու շրջանի Ճարտար քաղաքի պատվիրակությունն Ավան վարչական շրջանում է

Մայրաքաղաքի վարչական շրջանների և ԼՂՀ շրջանների միջև համագործակցության ծրագրով Երևանի Ավան վարչական շրջանում է գտնվում ԼՂՀ Մարտունու շրջանի Ճարտար քաղաքի պատվիրակությունը` Ճարտարի քաղաքապետ Արթուր Աղաբեկյանի գլխավորությամբ: Արցախյան պատվիրակության անդամները հանդիպել են Ավան վարչական շրջանի ղեկավար Մանվել Ջավադյանի հետ: Հանդիպմանը ներկա է գտնվել նաև ՀՀ ԱԺ պատգամավոր Ռոբերտ Սարգսյանը: Ողջունելով ճարտարցի հյուրերին` Աան վարչական շրջանի ղեկավար Մանվել Ջավադյանը նշել է, որ Երևանի վարչական շրջանների և ԼՂՀ շրջանների միջև հաստատված գործակցության շրջանակում բազմաթիվ ծրագրեր են նախանշվել ու կյանքի կոչվել:

Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, Երևանի քաղաքապետ Տարոն Մարգարյանի ԼՂՀ կատարած պաշտոնական այցի ժամանակ առավել հստակեցվեցին համագործակցության շրջանակներն ու բազմաթիվ նոր ծրագրերի սկիզբ նախանշվեց: Ավանի ու Ճարտարի համագործակցության արդյունքում նույնպես արդեն իսկ կյանքի են կոչվել ճանաչողական և փոխօգնության բազմաթիվ ծրագրեր: Հատկանշելով առավել տեսանելի արդյունքներ ապահովելու ք աղաքապետ Տարոն Մարգարյանի կողմից առաջադրված պահանջը` կողմերըպայմանավորվել են մշակել և կյանքի կոչել այնպիսի ծրագրեր, որոնց արդյունքներն առավել առարկայական ու տեսանելի կլինեն Ավանի և Ճարտարի բնակիչներին`մասնավորապես քաղաքային միջավայրի զարգացման, կրթամշակութային, մարզական և կոմունալ բնագավառներում: Շուտով Ճարտար կմեկնի նաև ճարտարապետների խումբ` այգի և խաղահրապարակ կառուցելու նախագծման համար, որից հետո կմեկնարկեն շինարարական աշխատանքները:

Մանվել Ջավադյանը հատկանշել է, որ Ավանի ու Ճարտար քաղաքի բարեկամության ամրապնդման և ընդլայնման հարցում մշտապես եղել է նաև ՀՀ ԱԺ պատգամավոր Ռոբերտ Սարգսյանի մասնակցությունը, ով այսուհետ նույնպես իր լիազորությունների շրջանակում հնարավորին կաջակցի նոր նախաձեռնությունների իրագործմանը: Շնորհակալություն հայտնելով ջերմ ընդունելության համար՝ Ճարտարի քաղաքապետ Արթուր Աղաբեկյանը հատուկ արժևորել է ապրիլյան քառօրյա պատերազմի օրերին Երևանի քաղաքապետարանի և մասնավորապես Ավան վարչական շրջանի ցուցաբերած համակղմանի աջակցությունը Ճարտարին ու քաղաքի բնակչությանը: Անդրադառնալով համագործակցության հեռանկարներին`արցախցի պաշտոնյան կարևորել է քաղաքային տնտեսության տարբեր բնագավառներում Ավան վարչական շրջանի փորձը Ճարտարում ներդնելու հնարավորությունը: Կողմերը պատրաստակամություն են հայտնել ավելի սերտ դարձնելու հետագա համագործակցությունը:

Ավան վարչական շրջանի ղեկավար Մանվել Ջավադյանն ու Ճարտարի քաղաքապետ Արթուր Աղաբեկյանը ստորագրել են աշխատակազմերի համագործակցության 2016-2017 թվականների գործողությունների ծրագիր:
Այնուհետ պաշտոնական հանդիպման մասնակիցները Ավանի Սբ Աստվածամայր եկեղեցու բակում ծաղիկներ են խոնարհել արցախյան ազատամարտում զոհված ազատամարտիկների հուշարձանին, ստացել եկեղեցու հոգևոր հովիվ Հարություն քահանա Ավագյանի օրհնությունը: Արցախցի հյուրերը Երևանի իրենց գործընկերների հետ այցելել են նաև Գ. Բուդաղյանի անվան արվեստի դպրոց, ծանոթացել կրթօջախի առօրյ ային, իսկ դահլիճում նաև ունկնդրել համերգ`դպրոցի սաների մասնակցությամբ: