Ադրբեջանի իշխանության ներսում «Գյուլենի ցանցի» բացահայտման գործընթաց է սկսվել

Ադրբեջանի խորհրդարանի պատգամավոր Գուդրաթ Հասանգուլիեւը դարձյալ օրակարգ է բերել երկու տարի առաջ արած իր հայտարարությունն այն մասին, որ իրեն հրավիրել են ԱՄՆ-ի Փենսիլվանիա նահանգ հանդիպելու չափավոր իսլամի թուրք քարոզիչ Ֆեթուլլահ Գյուլենի հետ, որտեղ նա բնակվում է վտարանդիության մեջ, սակայն, ինքը հրաժարվել է` կանխազգալով, որ «դա վտանգավոր քայլ կլինի»:

Ինչպես հաղորդում է «Արմենպրես»-ը, moderator.az-ի հետ զրույցում նա ասել է, որ ինքը բազմիցս քննադատել է Գյուլենի «ցանցը», եւ չնայած դրան, երկու տարի առաջ հրավիրվել էր Փենսիլվանիա:

«Ես հրաժարվեցի ընդունել հրավերը, այն ընդունողներ եղան, մեկնեցին եւ մասնակցեցին տարբեր միջոցառումների», -ասել է նա` ակնարկելով, որ անհրաժեշտության դեպքում կարող է նշել Ադրբեջանի իշխանությունից Գյուլենի հետ հանդիպման մեկնածների անունները:

«Ազադլըգ» թերթն այդ առնչությամբ գրում է, որ որոշ փորձագետներ գտնում են, որ պատգամավորի` հերթական անգամ այդ թեման օրակարգ բերելը կարող է կապված լինել կառավարության ներսում «Գյուլենի գործոնից» միմյանց դեմ որպես կոմպրոմատ օգտագործելու գործընթաց սկսվելու հետ:

«Ներկայում Թուրքիայում «Գյուլենի շարժման» դեմ գործողություններ են անցկացվում: Պաշտոնական Անկարան Ադրբեջանի իշխանությունից եւս պահանջում է վնասազերծել երկրում առկա գյուլենականներին: Սպասվում է, որ Ադրբեջանում եւս գործողություններ կանցկացվեն գյուլենականների դեմ: Նման իրավիճակում հնարավոր է ներիշխանական խմբավորումներն աշխատեն այդ խաղաքարտով հարվածել միմյանց», -«Ազադլըգ»-ին հայտնել են փորձագետները: 

Ադրբեջանական ԶԼՄ-ներն ավելի վաղ հայտնել են, որ Թուրքիայում հունիսի 15-ին տեղի ունեցած ռազմական հեղաշրջման փորձի ձախողումից հետո, որի կազմակերպման մեջ Անկարան մեղադրում է Ֆեթուլլահ Գյուլենին եւ նրա կողմնակիցներին, Թուրքիայի կառավարության հորդորով Բաքվում փակվել են ենթադրաբար Գյուլենի կողմից հովանավորվող «Կովկաս» համալսարանը եւ մի շարք միջնակարդ դպրոցներ ու ուսումնարաններ: