Գավառում կայացել է էպոսասացության հանրապետական մրցույթ

Գավառի երկրագիտական թանգարանի շենքում օգոստոսի 5-ին կայացավ էպոսասացության փառատոնի հանրապետական փուլը, որի արդյունքում եւ որոշվեցին հաղթող դպրոցականները:

Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի տեղեկատվության եւ հասարակայնության հետ կապերի բաժնից, «Սասնա տուն» հասարակական կազմակերպությունը ՀՀ մշակույթի նախարարության   աջակցությամբ   իրականացնում է արդեն  ավանդական դարձած «Սասնա ծռեր կամ Սասունցի Դավիթ» հայկական  էպոսին նվիրված փառատոն, որի եզրափակիչ փուլն այս տարի կայացավ Գեղարքունիքի մարզում: Այս տարի «Սասնա ծռեր» էպոսին նվիրված հանրապետական փառատոնը ներառում էր էպ ոսասացության մրցույթ` «Ձենով Օհան» անվանակարգով: Փառատոնն անցկացվում է արդեն 6-րդ անգամ:   

«2016 թվականի  փառատոնի հանրապետական փուլի անցկացման վայր է ընտրվել  Գեղարքունիքի մարզը՝ հաշվի առնելով մարզի դպրոցականների ակտիվ մասնակցությունը նախորդ տարիներին անցկացված փառատոններին: Փառատոնի նպատակն է նպաստել էթնիկ, հոգեւոր-մշակութային արժեքների ճիշտ ընկալմանն ու գիտակցմանը, ինչպես նաեւ դրանց պահպանմանն ու տարածմանը»,- նշեց «Սասնա տուն» հասարակական կազմակերպության ղեկավար, ծրագրի ղեկավար Ավագ Ավագյանը: 

Փառատոնի հանրապետական փուլին մասնակցում էին Գեղարքունիքի, Կոտայքի, Շիրակի, Արագածոտնի, Արարատի մարզերից եւ Արցախից մարզային փուլում հաղթող ճանաչված  25 դպրոցականներ, որոնք հանդես եկան  «Սասունցի Դավիթ» էպոսից իրենց ցանկությամբ ընտրված հատվածների ներկայացմամբ: Ժյուրիի կազմը ղեկավարում էր արվեստի վաստակավոր գործիչ, կոմիտասագետ, էպոսագետ Արթուր Շահնազարյանը: Թիմային արդյունքներով առաջատար ճանաչվեց Արցախը ներկայացնող թիմը, իսկ անհատական արդյունքներով մրցանակային առաջին տեղը զբաղեցրեց Գեղարքունիքի մարզի  Կարմիրգյուղ ի N 2 միջնակարգ դպրոցի աշակերտ Նարեկ Սիմոնյանը, 2-րդ տեղը` Արարատի մարզի Զանգակատուն համայնքի միջնակարգ դպրոցի աշակերտուհի  Էմմա Բադալյանը: 3-րդ մրցանակային տեղը շնորհվեց Գեղարքունիքի մարզի Մարտունու N 1 հիմնական դպրոցի աշակերտ Սամվել Ավետիսյանին եւ Գեղարքունիքի մարզի Կարմիրգյուղի N 1 միջնակարգ դպրոցի աշակերտուհի Լուսինե Մարդոյանին:

Մրցանակային տեղեր զբաղեցրած դպրոցականները  «Սասնա տուն» հասարակական կազմակերպության կողմից խրախուսվեցին  պատվոգրերով, «Սասունցի Դավիթ»  հուշամեդալներով,  խրախուսական այլ նվերներով: