Արդարադատության նախարարությունը երկու ամիս ժամանակ ունի «Մատաղիսի գործով» տղաներին 27 միլիոն դրամ վճարելու համար

Արդարադատության նախարարությունը մինչեւ սեպտեմբրի 17-ը պետք է 50 հազար եվրո վճարի «Զալյանը եւ այլք ընդդեմ Հայաստանի» գործի դիմումատուներին: Մարդու իրավունքների եվրոպական դատարանի վճռով հատուցման գումարի վճարման վերջնաժամկետ է սահմանվել այս տարվա սեպտեմբերի 17-ը:

Եվ վաղը կայանալիք կառավարության հերթական նիստին կքննարկվի նաեւ «Զալյանը եւ այլք ընդդեմ Հայաստանի» գործով դիմումատուներին հատուցելու նպատակով Արդարադատության նախարարությանը գումար հատկացնելու մասին որոշումը:

Ըստ կառավարության կայքի՝ Մարդու իրավունքների եվրոպական դատարանի «Զալյանը եւ այլոք ընդդեմ Հայաստանի» գործով մարտի 17-ի վճռի պահանջները կատարելու նպատակով ՀՀ 2016թ. պետական բյուջեով նախատեսված պահուստային ֆոնդի հաշվին արդարադատության նախարարությանը պետք է հատկացվի 50 հազար եվրոյին համարժեք 27 միլիոն դրամ` վճռով սահմանված արդարացի հատուցման համար: Սրանից 20 հազար եվրո կստանա Արայիկ Զալյանը, իսկ Ռազմիկ Սարգսյանն ու Մուսա Սերոբյանը՝ 15 հազարական եվրո:

Այս գումարը պահուստային ֆոնդից կհատկացվի բյուջետային ծախսերի տնտեսագիտական դասակարգման՝ «Կառավարման մարմինների գործունեության հետեւանքով առաջացած վնասվածքների կամ վնասների վերականգնում» հոդվածով:

Դատական գործը վերաբերում էր Հայաստանի Զինված ուժերի նախկին զինծառայողներ Արայիկ Զալյանի, Ռազմիկ Սարգսյանի եւ Մուսա Սերոբյանի՝ ազատությունից ապօրինի զրկված լինելու վերաբերյալ գանգատին: Սա հանրությանը հայտնի «Մատաղիսի գործն» է, որի դատական գործընթացը սկսվել էր դեռեւս 2004-ին, երբ 2003թ. դեկտեմբերին երկու ծառայակիցների սպանության մեղադրանքով ժամկետային զինծառայողներ Զալյանը, Սարգսյանը եւ Սերոբյանը ներգրավվել են իբրեւ մեղադրյալներ:

Այդ ընթացքում նրանց նկատմամբ, իրենց իսկ պնդմամբ, օրինապահ մարմինների կողմից սպանություն կատարելու մեջ խոստովանական ցուցմունք կորզելու նպատակով ցուցաբերվել է դաժան եւ անմարդկային վերաբերմունք:

Հիշեցնենք, որ տեւական դատական գործընթացներից հետո՝ 2005թ. մայիսին Զալյանին, Սարգսյանին եւ Սերոբյանին դատապարտում են 15 տարվա ազատազրկման՝ անհիմն համարելով օրինապահ մարմինների կողմից խոշտանգումների մասին պնդումները, ապա 2006թ. մայիսին Վերաքննիչ դատարանը վերանայել է ստորին պալատի վճիռը եւ նրանց երեքին էլ դատապարտել ցմահ ազատազրկման: 2006թ. դեկտեմբերին զոհերից մեկի ծնողի վճռաբեկ բողոքի հիման վրա 2012թ. դեկտեմբերին Վճռաբեկ դատարանի որոշմամբ նախկին զինծառայողները արդարացվում եւ ազատ են արձակվում:

Դրանից հետո էլ ՄԻԵԴ ներկայացված գանգատում դիմումատուները պնդել էին, որ իրենք նախ` անօրինական կերպով են զրկվել ազատությունից եւ 2004թ. ապրիլի 19-23-ին կտտանքների ու խոշտանգումների վերաբերյալ իրենց դիմումները երբեք չեն քննվել:

Քրիստինա Տեր-Մաթեւոսյան