Նժդեհի, ուժեղ պետության ու արարող մարդու գաղափարախոսությամբ «Զարթուցիչ» դասընթացը նոր որակ է բերում կյանքին

Հաջողություններ բիզնեսում, կարիերայում, ընտանիքում ու առհասարակ, կյանքի բոլոր ոլորտներում, սա է խոստանում Հայաստանում թրեյնինգների ոլորտում նոր ֆորմատ ներկայացնող «Զարթուցիչ» հաջողության թրեյնինգը, որը կարճ ժամանակում մեծ հետաքրքրություն է առաջացրել մեր երկրում։ «Թրեյնինգ, որը մասնագիտացված է մարդու կյանքի բոլոր ոլորտների բարելավման համար։ Սա ոչ միայն հո գեբանական, այլ նաև բիզնես թրեյնինգ է: Այն մարդուն համալիր փոփոխությունների է բերում, օգնում է ստեղծել կամ լավացնել մարդու անձնական կյանքը, կարիերան, բիզնեսի, մենեջմենթի հմտություններ է տալիս, զարգացնում է հիշողությունը»,-«Արմենպրես»-ի փոխանցմամբ` ասում է այս ֆորմատը Հայաստանում առաջինը ներդրած 32-ամյա Գրիգոր Առաքելյանը։

Դեռևս մեկ տարի առաջ մեկնարկած «Զարթուցիչ» մեկամսյա թրեյնինգներին, որոնցից ութերորդն այժմ ընթացքի մեջ է, մասնակցել են շուրջ յոթ հարյուր տարբեր տարիքի ու մասնագիտությունների անձինք։ Թրեյնինգների հիմնադիրը արտերկրում բավական տարածված «Լայք Քոուչինգ» ֆորմատը հայաֆիկացրել է՝ հիմքում դնելով հայկական արժեքները՝ ընտանիք, Նժդեհի գաղափարախոսություն, ուժեղ պետություն, արարող մարդ և այս ամենում զրո քաղաքականություն։

«Զարթուցիչում» երկու թեմա կա, որոնց անդրադարձ չի լինում՝ քաղաքականությունն ու կրոնական հարցերը, հավանաբար սա էլ է «Զարթուցիչի» գրավականներից մեկը, քանի որ շատ հաճախ մարդիկ այնքան հոգնած են լինում քաղաքականությունից, որ ոչ մի բանի մասին չեն ուզում լսել դրա հետ կապված»,-֊ասում է Գրիգորը։

Ըստ Գրիգորի՝ թրեյնինգների այս ձևաչափը եկել է սպորտից։ «Երբ մարզիչները մարզելով իրենց մարզիկին, հասկացել են, որ միայն դա շատ քիչ է հաջողության հասնելու համար, սկսել են նաև հոգեբանորեն մարզել։ Այս ամենը զարգացել է ժամանակի ընթացքում և այժմ մարզում են մարդուն ապրել ու մեծ նպատակների հասնել, ինչպես մարզիկներին։ Եթե մարզիկի նպատակն է չեմպիոն դառնալը, ապա այս թրեյնինգի նպատակն էլ իր մասնակցին չեմպիոն դարձնելն է կյանքի մակարդակում։ Չեմպիոն ամուսին, չեմպիոն կին, չեմպիոն հայ, չեմպիոն գործարար…»,-֊ասում է Գրիգոր Առաքելյանը, ով նաև ուս անողական տարիներին զբաղվել է հոգեբանական խորհրդատվությամբ։

Սակայն թրեյնինգների միտքը հաջողակ երիտասարդի մոտ շատ ավելի երկար է հասունացել։ «Հայրս Նաիրիտում էր աշխատում, մայրս էլ լամպերի գործարանում և հասկանալի է, որ տարիներով աշխատավարձ չէին ստանում ու փոքր տարիքում ինձ միշտ տանջում էր այդ հարցը, թե ինչու ենք մենք վատ ապրում, մինչդեռ մեր հարևաններն ապահովված են ամեն բանով։ Այդ հարցերի մեծ շարանն ինձ հոգեբանական խնդիրների առաջ կանգնեցրեց ու ստիպեց իմ խնդիրը լուծել գրականության միջոցով։ Վերցրեցի հոգեբանության մասին գրքեր, սկսեցի ուսումնասիրել ու արդեն կարճ ժամանակ անց ինքս էի այլոց խորհու րդներ տալիս»,֊-հոգեբանական խորհրդատվության պահանջարկը ստիպում է երիտասարդին սկսել փոքր դասընթացներ, որոնք արդեն ժամանակի ընթացքում զարգանալով դարձել են հիմք «Զարթուցիչի» համար։

Գրիգոր Առաքելյանի դիտարկմամբ` շատ կարևոր է, որ մարդկանց խնդիրները լուծվեն ոչ թե հոգեբանական խորհրդատվությունների ժամանակ, այլ թրեյնինգների: Փորձը ցույց է տալիս, որ երբ մարդն ունի նույնիսկ առողջական խնդիրներ, իրեն ավելի շատ կարելի է թրեյնինգի միջոցով օգնել։ Նրա խոսքով` Հայաստանում այս ամենի ներդրման նպատակն է եղել նաև ստեղծել ցանց, որտեղ մարդիկ ոչ թե համացանցի պես ստատուսներ կգրեն, այլ իրական կյանքում կշփվեն իրար հետ, կստեղծվի առողջ սոցիալական միավոր, որի նպատակն է երկրում ինչ որ լավ բան անելը։ 

Ժամանակ առ ժամանակ «Զարթուցիչի» մասնակիցները հավաքվում են միասին մեկ վայրում, ծանոթանում, շփվում։ Հերթական հավաքն էլ անցկացվել է անցյալ կիրակի, որին մասնակցել է 460 մարդ։

Թրեյնինգները կարծես թե արդեն տվել են իրենց պտուղները։ Դրանց մասին են վկայում հարյուրավոր դրական արձագանքները։ Մասնակիցներից Մարինե Ղուբազյանն ասում է` սա առողջ միջավայր է, որտեղ ստանում ես ահռելի քանակությամբ գիտելիք, որն ամբողջովին մարսելու համար գուցե տասնյակ տարիներ պետք գան։  «Զարթուցիչը» հաջողության թրեյնինգ է, երբ այդքան կարճ ժամանակահատվածում յուրաքանչյուրի մեջ ծնվում է ցանկությունների մի հսկա օվկիանոս, որի միջոցով պատրաստ ես հիմնավոր և հաղթական տրամադրված փոխել կյանքդ»,-ասում է Ղուբազյանը։

Մասնակիցներից Գրիգոր Բաբայանն էլ նշում է, որ ամեն մի դասն առանձին վերցված ադամանդ է իր հերթին, իսկ ամբողջական արդյունքն անհամեմատ ավելի մեծ է ստացվում գումարելիների գումարից: «Զարթուցիչը» տրամադրում է բոլոր այն գործիքները, որոնք անհրաժեշտ են ինքնավերլուծության, կյանքդ վերարժևորելու, կյանքդ քո ձեռքը վերցնելու ճանապարհը սկսելու համար»,-ասում է Բաբայանը: