Երանի նրանց, ովքեր ապրում են իրենց սկիզբն ու վերջը, իսկ ես միայնակ եմ. Օֆելյա Համբարձումյանի վերջին հարցազրույցը (լուսանկարներ)

NEWS.am-ը գրում է

Երգչուհի, ՀԽՍՀ ժողովրդական արտիստ Օֆելյա Համբարձումյանը 70 տարի բեմում լինելուց հետո այլեւս չէր մտածում բեմ վերադառնալու մասին: Վերջին տարիներին սիրված երգչուհին իր երազած պտղատու այգին ուներ՝ ծիրանենիներով, տունը՝ բնության գրկում, սակայն, իրեն միայնակ էր զգում: 

«Երանի նրանց, ովքեր ապրում են իրենց սկիզբն ու վերջը, իսկ ես միայնակ եմ»,- երգչուհու մասին պատմող «Օֆելյա» ֆիլմի վերջում ափսոսանքով նշել էր երգչուհին:

Հենց ֆիլմի երեւանյան պրեմիերայի օրն էր՝ 2015թ. սեպտեմբերի 24-ին, վերջին անգամ հասարակությանը երեւացել սիրված երգչուհին: Քչախոս Օֆելյա Համբարձումյանը համաձայնվել էր խոսել լրատվամիջոցների ներկայացուցիչների հետ, ապա լուսանկարվել ցանկացողների հետ:

NEWS.am-ի թղթակցի հետ զրույցում ֆիլմի պրեմիերայի օրը ժողովրդական արտիստուն նշել էր, որ այլեւս չի ցանկանում բեմ վերադառնալ, քանի որ համերգի մասին լսելիս հուզվում է: 

«Հնարավոր է վերադառնամ, բայց ես չեմ ցանկանում, հերիք է. 70 տարին քիչ չէ: Արդեն հոգնել եմ, լսում եմ համերգի անուն, հուզվում եմ: Բոլորն այդպես չեն, հիմիկվա երեխաները թռվռալով գալիս են բեմ, բայց ես, բեմի անուն լսելիս, լացս գալիս է»,- ասել էր նա:

Համբարձումյանի խոսքով՝ թեեւ այս տարիքն իր դժվարություններն ունի, ինքը ո՛չ մի նոտա, ո՛չ մի երգ բաց չի թողնում: Ի՞նչ էր երգը Օֆելյա Համբարձումյանի համար. բնության գույներ, որոնց սիրահարվելուց հետո էր միայն համաձայնվում կատարել այն:

«Ձայնս ժառանգել եմ մորիցս, ինքս էլ փոխանցել աղջկաս։ Մանկությունս անցել է երգի մեջ, նույնիսկ պատերազմի տարիներին եմ երգել զինվորների համար»,- հիշում էր երգչուհին։

Լրատվամիջոցների համար գրեթե փակ երգչուհին իր մասին պատմող ֆիլմում անկեղծացել էր. խոսում էր թե անձնական կյանքի, թե ամուսնու՝ Նորայր Հովհաննիսյանի հետ հարաբերությունների մասին:

«Ես ազնիվ մարդ եմ, նվիրված ընտանիքիս, բայց ինձ համար առաջնայինը երգն է եղել, արվեստը։ Եղել են դեպքեր, որ ընտանիքս ճաշ չի ունեցել, բայց ես գնացել եմ փորձի»,- պատմում էր երգչուհին, ապա ավելացնում. «Խաղաղ ընտանիք եմ ունեցել։ Ես ու Նորայրը միասին ենք աշխատել, թերեւս դա է պատճառը, որ խանդի տեսարաններ չեն եղել իր կողմից, բայց ես խանդել եմ երեւի»։

Երեխաների՝ Տաթեւիկի եւ Հովհաննեսի համար Օֆելյա Համբարձումյանը ոչ խիստ ծնող է եղել, նույնիսկ մի անգամ դպրոց էր գնացել եւ խնդրել՝ դասերն ուշ սկսել, որպեսզի դուստրը կարողանա մի քիչ էլ երկար քնել:

«Օֆելյա» ֆիլմի մեծ ցուցադրությունը, ցավոք, Օֆելյա Համբարձումյանը չհասցրեց տեսնել:

Սիրված երգչուհին մահացել է այսօր առավոտյան 91 տարեկան հասակում: