Ադրբեջանի թափանցիկության ցածր վարկանիշը թույլ չի տա արտասահմանյան կապիտալ ներգրավել. փորձագետ

Ադրբեջանի կառավարման թափանցիկության ցածր վարկանիշը թույլ չի տա նավթի գների անկման պատճառով տնտեսական ճգնաժամում հայտնված Բաքվին արտասահմանյան կապիտալ ներգրավել երկիր:

Ինչպես հաղորդում է «Արմենպրես»-ը, մեկնաբանելով Բաց կառավարման գործընկերության (OGP) Կառավարման կոմիտեի կողմից Ադրբեջանին ոչ ակտիվ գործընկերոջ կարգավիճակ տալու որոշումը, այս մասին «Թուրան»-ին տված հարցազրույցում հայտարարել է ադրբեջանցի հայտնի տնտեսագետ ԳուբադԻբադօղլուն:

Նրա խոսքով` այդ հարցը Ադրբեջանը կարող է լուծել միայն կատարելով թափանցիկության ոլորտում ստանձնած պարտավորությունները, այն է` պայքարել կոռուպցիայի դեմ եւ բաց կառավարություն ունենալ:

«Եթե կոռուպցիայի մակարդակը չիջնի, իսկ ներդրումային եւ վարկային վարկանիշները չբարձրանան, ապա Ադրբեջանում ընդհանուր տնտեսական խնդիրները միայն կավելանան: Ընդ որում, առաջիկա տարիներին Ադրբեջանը պետք է ֆինանսավորի իր պարտավորությունները խոշոր էներգետիկական նախագծերում: Խոսքը միլիարդավոր դոլարների մասին է, որոնք փոխառել խոշոր առեւտրային բանկերից անհնար է, դրանք կարելի է ստանալ միայն խոշոր միջազգային ֆինանսական կազմակերպություններից` Համաշխարհային բանկից, Արժույթի միջազգային հիմնադրամից, Վերակառուցման եւ զարգացման եվրոպական բան կից: Միջազգային նախաձեռնություններում Ադրբեջանի կարգավիճակի իջեցումը կդժավարացնի միջազգային ֆինանսական հաստատությունների հետ Ադրբեջանի բանակցությունները», -գտնում է փորձագետը:

Նա նաեւ նշել է, որ Ադրբեջանում մինչև այժմ փակ է մուտքը ֆինանսական տեղեկատվություն, ֆինանսական վերահսկողության մարմիններում բացակայում է թափանցիկությունը: Արդեն 10 տարի է` չի լուծվում չինովնիկների եկամուտների հայտարարագրերի մասին հարցը, որոնք պետք է բաց մուտք ունենան:

Գուբադ Իբադօղլուն ընդգծել է, որ թափանցիկության գծով 2016-2018 թվականների համար նոր «Գործողությունների ազգային ծրագրում» քաղաքացիական հասարակության շատ առաջարկություններ հաշվի չեն առնվել: Դրանք վերաբերում են ֆինանսական-ֆիսկալ հաշվետվության, դատական իշխանության անկախության եւ այլ առաջարկություններին:

OGP-ն հասարակական կազմակերպությունների գործունեության համապատասխան պայմաններ չապահովելու համար Ադրբեջանին ոչ ակտիվ անդամի կարգավիճակ է շնորհել «Բաց կառավարություն» միջազգային նախաձեռնությունում:

Ոչ ակտիվ կարգավիճակ ստացած Ադրբեջանը հնարավորություն չի ունենա քվեարկելու OGP-ի ընտրությունների ժամանակ եւ կկարողանա միայն ներկա գտնվել OGP-ի միջոցառուներին որպես դիտորդ` սովորելու նպատակով:

Ադրբեջանն OGP-ին անդամակցում է 2011 թվականից: Կազմակերպությունը, որը հայտնի է որպես Պատասխանի քաղաքականություն (Response Policy), առաջին անգամն է իր անդամին ոչ ակտիվ կարգավիճակ տալու մասին որոշում ընդունել:

Մեկ տարի առաջ Ադրբեջանի կարգավիճակն իջեցվել է նաեւ «Արդյունահանող ճյուղում թափանցիկության նախաձեռնություն» միջազգային կառույցում: