Ողբերգական ավտովթար Երևանում. կա 1 զոհ, 2 վիրավոր. նրանց առաջինը օգնության են հասել ՀՀ ՈԶ ծառայողները. ժամանել են Երևանի ՃՈ պետն ու քննչական վարչության պետի տեղակալը.

Shamshyan.com-ը գրում է.

Այսօր` օգոստոսի 1-ին ողբերգական ավտովթար է տեղի ունեցել Երևանում: Ժամը 05:20-ի սահմաններում Մոնթե Մելքոնյան փողոցում Renault մակնիշի 34 QD 575 համարանիշի ավտոմեքենայի վարորդը դուրս է եկել ճանապարհի երթևեկելի գոտուց, բախվել բետոնե արգելապատնեշներին և մոտ 20 մետր գլխիվայր շրջվելով հայտնվել ճանապարհի մեջտեղում:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղում մահացել է, իսկ Արմավիրի մարզի Արևշատ գյուղի բնակիչներ 25-ամյա Կարապետ Կարապետյանը և 29-ամյա Արսեն Հովհաննիսյանը մարմնական վնասվածքներով տեղափոխվել են Արմենիա բժշկական կենտրոն, որտեղ բժիշկներն ու փրկարարները մեծ դժվարությամբ են կարողացել հոգեբանական և բժշկական օգնություն ցուցաբերել նրանց քանի որ գտնվում էին ծանր հոգեբանական ապրումների մեջ:

Վիրավորներին առաջինը օգնության են հասել այդ պահին նշված հատվածով անցնող Ոստիկանության զորքերի 1033 զորամասի ծառայողները, ովքեր քաղաքացիների օգնությամբ վիրավորներին դուրս են բերել ավտոմեքենայից:

Օպերատիվ են գործել Երևանի 1-03 շտապօգնության հերթապահ խմբերը, նրանք տեղում առաջին բուժօգնությունն էին ցուցաբերում վիրավորներին:

Վթարի վայր են ժամանել Երևանի ճանապարհային ոստիկանության աշխատակիցները Երևանի ՃՈ պետ Արման Հակոբյանի գլխավորությամբ:

Ժամանել էին նաև Տարածքային կառավարման և արտակարգ իրավիճակների նախարարության փրկարար ծառայության Ճգնաժամային կառավարման ազգային կենտրոնի օպերատիվ խումբը Քրիստինե Հովհաննիսյանի գլխավորությամբ:

Վթարի մասին ՃՈ օպերատիվ կառավարման կենտրոնից տեղեկությունը փոխանցել են Հայաստանի քննչական կոմիտեի Երևանի քննչական վարչություն, որտեղից ժամանել են պետի տեղակալ Արտաշես Վանյանը և քննիչ Գեղամ Գալստյանը:

Վերջինիս կողմից փաստի առթիվ հարուցվել է քրեական գործ ՀՀ քր-օրի 242 հոդվածի 2-րդ մասի (ճանապարհային երթևեկության և տրանսպորտային միջոցների շահագործման կանոնները խախտելը որն անզգուշությամբ առաջացրել է մարդու մահ) հատկանիշներով:

Քննիչի հանձնարարականով ավտոմեքենան քարշակի միջոցով տեղափոխվեց Երևանի ՃՈ պահպանվող հատուկ տարածք:

Ֆոտոլրագրողի տեղեկություններով վիրավորներից Կ. Կարապետյանը վերջերս է վերադարձել Ռուսաստանի Դաշնությունից, որտեղ նույնպես հայտնվել է ավտովթարի մեջ:Այսօր տեղի ունեցած վթարի ժամանակ նա և Ա. Հովհաննիսյանը իրենց դուրս են նետել ավտոմեքենայից:

Ֆոտոլրագրողի տեղեկություններով նշված ավտոմեքենան հաշվառված է Արմավիրի մարզի Քարակերտ գյուղի Բաբաջանյան փողոցի 5-րդ շենքի բնակիչ 26-ամյա Լևոն Ավագյանի անվամբ: Ոստիկանությունն ու քննչական բաժինը պարզում են վարորդի և մահացածի ինքնությունը:

Ի դեպ վերջին 10 օրվա ընթացքում նշված փողոցում մեկ այլ ողբերգական ավտովթար էր տեղի ունեցել, ինչի հետևանքով հիվանդանոց տեղափոխված երիտասարդ վարորդը մահացել էր, այդ մասին հայտնել էինք ավելի վաղ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: