Բրյուսել. ահաբեկչությունների զոհերի թիվը 34 է, վիրավորների թիվը հասել է 230-ի / լրացվում է

Բրյուսելում ստեղծվել են փոխօգնության ցանցեր. մարդիկ, այդ թվում՝ հայ համայնքի ներկայացուցիչները, սոցիալական ցանցերում բացված հարթակներում ակտիվ հաղորդակցվելով, օգնության են հասնում միմյանց, ավտոմեքենա ունցողները մեքենայով հասնում ու տեղափոխում են մեքենա չունեցողնրին:

20.55 CNN-ը հաղորդում է, որ վիրավորների թիվը հասել է 230-ի։

20:23 Բրյուսելում հյուրանոցներն անվճար սենյակներ են տրամադրում ահաբեկչությունից տուժած անձանց։  Այս մասին տեղեկացնում է nieuws.vtm.be կայքը։ 

19:36 Բելգիայում տեղի ունեցած ահաբեկչություններից հետո երկրում հայտարարվել է եռօրյա սուգ: Այս մասին հայտարարությունն արել է Բելգիայի ներքին գործերի նախարար Յան Յանբոնը:

19:31 Բելգիայի ոստիկանությունը հայտնաբերել է Բրյուսելի օդանավակայանում պայթյուն իրականացրած մահապարտ ահաբեկչի  դին, որի կողքին «Կալաշնիկով» ավտոմատ  է հայտնաբերվել: Այս մասին հաղորդում է Lenta.ru-ն` հղում անելով VRT բելգիական հեռուստաալիքին:

Բելգիայի Թագավորությունում Հայաստանի Հանրապետության դեսպանատունը ճշտում է՝ Բրյուսելի օդանավակայանում եւ մետրոյում այսօր՝ մարտի 22-ին, վաղ առավոտյան պայթյունների հետեւանքով զոհերի եւ վիրավորների մեջ հայեր կան, թե ոչ: Այս մասին NEWS.am-ի թղթակցի հետ զրույցում ասաց Բելգիայի Թագավորությունում Հայաստանի Հանրապետության արտակարգ և լիազոր դեսպան Թաթուլ Մարգարյանը:

«Ինչպես արդեն տեղյակ եք, Բելգիայում հայտարարված է արտակարգ իրավիճակի բարձրագույն աստիճան, դադարեցվել է օդանավակայանի, մետրոյի եւ հանրային այլ տրանսպորտի գործունեությունը: Բրյուսելում Հայաստանի Հանրապետության դիվանագիտական առաքելությունների անձնակազմն ու այստեղ գտնվող ԱԺ պատվիրակության անդամներն ապահով են եւ շարունակում են իրենց գործունեությունը»,- ասաց դեսպանը:

19:22 Համացանցում հրապարակվել է Բրյուսելի Զավենտեմի օդանավակայանում այս տեղի ունեցած երկու պայթյունների հեղինակների լուսանկարը, հայտնում է բելգիական rtl.be կայքը:

18:55 Բելգիայի մայրաքաղաք Բրյուսելում այսօր տեղի ունեցած պայթյուններից հետո տարհանում են Եվրոպական հանձնաժողովի շենքը: ТАСС-ի փոխանցմամբ` այս մասին հաղորդում  Belga  գործակալությունը:

18:36 Բելգիայի մայրաքաղաք Բրյուսելում այսօր տեղի ունեցած պայթյուններից հետո երկրի երկու ատոմային էլեկտրակայաններ են տարհանում: Այս մասին հաղորդում  բելգիական HLN պարբերականը:

18:31 Բրյուսելում այսօր տեղի ունեցած պայթյունների հետևանքով տուժածների թիվը հասել է 170-ի։ Հիշեցնենք, որ այսօր Երևանի ժամանակով 16.46-ի դրությամբ վիրավորների թիվը 150 էր։ Հաղորդվում է, որ պայթյունների հետևանքով զոհվել է առնվազն 34 մարդ։

17:39 Բելգիայի ոստիկանությունը երկու մարդու է ձերբակալել և արդեն ուսումնասիրում է Բրյուսելի օդանավակայանում պայթյուններ կազմակերպած անձանցից մեկի կադրերը տեսահսկման համակարգից, հաղորդում է The Daily Mail-ը:

«Իսլամական պետություն» ահաբեկչական խմբավորումը ստանձնել է Բրյուսելի ահաբեկչությունների պատասխանատվությունը։ Համապատասխան հայտարարությունը մեջբերում է ծայրահեղականների հետ կապ ունեցող «Ամակ» գործակալությունը, փոխանցում են տեղական լրատվամիջոցները։

16:20 Բրյուսելի ամենաբարձր երկնաքերի տանիքում հայտնաբերվել է կասկածելի փաթեթ: Բոլոր այցելուները տարհանվում են:

16:05 «Իսլամական պետություն» ահաբեկչական խմբավորումը ստանձնել է Բրյուսելի ահաբեկչությունների պատասխանատվությունը:

15:50 Բրյուսելի ահաբեկչությունից հետո ի նշան համերաշխության Փարիզի Էյֆելյան աշտարակը կլուսավորվի Բելգիայի դրոշի գույներով:

15:45 Facebook սոցցանցը Բրյուսելում այսօր տեղի ունեցած ահաբեկչություններից հետո յուրահատուկ էջ է ավելացրել, որը թույլ է տալիս Բելգիայում գտնվող անձանց հայտնել իրենց որպիսության մասին, որ չեն տուժել ահաբեկչություններից:

15:18 Բելգիան հայտարարել Է, որ  Բրյուսելում տեղի ունեցած պայթյունների կապակցությամբ փակում Է սահմանները:

15:00 Բրյուսելում զոհերի թիվը հասել է 37-ի:

Հաղորդվում է, որ տեղի ունեցած ահաբեկչական շարքի առնչությամբ ուժեղացվել են Բրյուսելում ՆԱՏՕ-ի գրասենյակի անվտանգության միջոցառումները։ Այդ մասին հայտնել է կազմակերպության ներկայացուցիչը:

Լոնդոնի և Փարիզի ոստիկանությունը լրացուցիչ միջոցառումներ է ձեռնարկել քաղաքի կենտրոնում անվտանգության ապահովման համար՝ Բելգիայի մայրաքաղաքում իրականացված ահաբեկչությունների առնչությամբ:

13:57 Բրյուսելում ահաբեկիչների հարձակումների առնչությամբ ստեղծված ճգնաժամային կենտրոնը խորհուրդ է տալիս քաղաքում գտնվող բոլոր մարդկանց պահպանել հանգստություն և մնալ այնտեղ, որտեղ այս պահին գտնվում են:

Նման առաջարկով է իր աշխատակիցներին դիմել նաև Եվրահանձնաժողովը, որը խնդրել է աշխատավայրում գտնվող իր աշխատակիցներին փակվել գրասենյակներում, իսկ նրանց, ովքեր դեռ չեն եկել աշխատանքի՝ մնալ տանը:

Ավելի վաղ հաղորդվել է, որ Բրյուսելում ահաբեկչություններից հետո չեն աշխատում օդանավակայանը, մետրոն, կենտրոնական կայարանը, ողջ հանրային տրանսպորտը, ներառյալ՝ տաքսին:

Բրյուսելի բնակիչներին խնդրել են նաև խուսափել հեռախոսազանգեր կատարելուց: Թույլատրվում է օգտվել համացանցից, մասնավորապես Թվիթթերից և Ֆեյսբուքից:

13:33 Բելգիական VTM լրատվամիջոցի հաղորդմամբ՝ Բրյուսելի մետրոյի Մալբեկ կայարանում տեղի ունեցած պայթյունի հետևանքով զոհվել է մոտ 10 մարդ: Կայարանը գտնվում է Եվրամիության շենքերից 500 մետր հեռավորության վրա:

Որոշ լրատվամիջոցներ հայտնում են Բրյուսելի մետրոյում տեղի ունեցած չորրորդ պայթյունի մասին: Ավելի վաղ հաղորդվել է Բրյուսելի մետրոյում երեք պայթյունների մասին՝ Մալբեկ, Շուման և Արտ-լուա կայարաններում։

Բրյուսելում մի շարք պայթյուններից հետո դադարեցվել է տրանսպորտային ցանցի երթևեկությունը:

Լրատվամիջոցների հաղորդմամբ՝ ահաբեկչական հարձակումներից հետո Եվրոպական հանձնաժողովը փակել է իր անձնակազմին շենքի ներսում։ Աշխատակիցներին հրահանգված էմնալ շենքում:

13:10 Բրյուսելի օդանավակայանում պայթյուններն իրականացրել են մահապարտ ահաբեկիչները։ Բելգիական VRT լրատվամիջոցը հայտնում է Բրյուսելի օդանավակայանում առնվազն 13 զոհի և 35 վիրավորի մասին:

Լրատվամիջոցների հաղորդմամբ՝ Բրյուսելում հայտնաբերվել է մի քանի պայթուցիկ սարք, որոնք չեն պայթել:

13:01 Բրյուսելի մետրոյում տեղի է ունեցել երրորդ պայթյունը: Այդ մասին հայտնում է RBTF հեռուստաալիքը։

Կենտրոնական կայարանից, առևտրի և ժամանցի խոշոր կենտրոնններից մարդիկ տարհանվում են։ Նշվում է, որ այդ որոշումը կայացվել է այն բանից հետո, երբ հայտնի է դարձել մետրոյի երկու կայարաններում պայթյունների մասին:

Բրյուսելի իշխանությունները խնդրում են մարդկանց մնալ տներում՝ օդանավակայանում և մետրոյի կայարաններում տեղի ունեցած պայթյուններից հետո:

12:52 Բրյուսելում մետրոյի ևս մի կայարանում է պայթյուն տեղի ունեցել, հայտնում է The Telegraph-ը: Հաղորդվում է, որ երկրորդ պայթյունը տեղի է ունեցել Շուման կայարանում՝ Եվրահանձնաժողովի և ԵՄ Խորհրդի շենքերի մոտակայքում։

12:35 Պայթյուն է տեղի ունեցել Բրյուսելի մետրոյի Մալբեկ կայարանում, որը գտնվում է «եվրոպական» թաղամասի գոտում: Այդ մասին հայտնել է RTBF հեռուստառադիոընկերությունը: «Մեր տեղեկությունների համաձայն՝ պայթյուն է տեղի ունեցել Մալբեկ կայարանում, ճյուղի երթևեկությունը դադարեցվել է»,- ասված է հաղորդագրությունում:

12:22 Reuters գործակալությունը՝ վկայակոչելով Belga բելգիական լրատվական գործակալությանը, հայտնել է, որ մինչ պայթյունները Բրյուսելի օդանավակայանում կրակոցներ են հնչել և արաբերենով բղավոցներ:

12:08 Բրյուսելի օդանավակայանում պայթյունի հետևանքով զոհվել է 14 մարդ, ավելի քան 30 հոգի վիրավորվել է: Այդ մասին հայտնում է RTL հեռուստաալիքը։

11:54 Բրյուսելի օդանավակայանում տեղի ունեցած երկու պայթյունի հետևանքով մի քանի մարդ է զոհվել: Այդ մասին հայտնում է NBC News հեռուստաալիքը՝ բելգիական դաշնային ոստիկանության մամուլի քարտուղարին հղումով։ Հաղորդվում է, որ պայթյունները տեղի են ունեցել American Airlines-ի գրանցման վայրի մոտ։ Բրյուսելի օդանավակայանը Twitter-ի իր էջում հաստատել է երկու պայթյունների մասին տեղեկությունը և կոչ արել չգալ օդանավակայանի տարածք։ Բրյուսելի Զավենտեմի օդանավակայանում երկու պայթյուն է տեղի ունեցել, հաղորդում է RTBF հեռուստաալիքը: Պայթյունների պատճառները դեռ հայտնի չեն:

Նախնական տեղեկություններով՝ առաջին պայթյունը լսվել է տերմինալի մուտքից 200 մետր հեռավորության վրա, երկրորդ պայթյունը, որն ավելի ուժեղ է եղել, հենց տերմինալի շենքում:

* Բրյուսելում տեղի ունեցած ահաբեկչական գործողությունների և դրանց հետևանքով ստեղծված իրավիճակի մասին օպերատիվ տեղեկատվությանը կարելի է հետևել Բելգիայում ՀՀ դեսպանության և ԵՄ-ում ՀՀ առաքելության էջերում՝ «Ֆեյսբուքում» և «Թվիթթերում:

Բրյուսելում ահաբեկչությունից տուժած ՀՀ քաղաքացիների համար թեժ գիծ՝ +32.2.3484406: