Արցախի վարչապետը մի շարք հանդիպումներ է ունեցել Լիբանանում

Արցախի Հանրապետության վարչապետ Արայիկ Հարությունյանը մարտի 14-ին մի շարք հանդիպումներ է ունեցել Լիբանանում՝ հայկական համայնքի տնտեսական, կրթական և քաղաքական շրջանակների հետ: Ինչպես  տեղեկացրին ԱՀ կառավարության աշխատակազմի տեղեկատվության և հասարակայնության հետ կապերի բաժնից, «Արցախ Րութս Ինվեսթմընթ» ընկ երության բաժնետերերի տարեկան ընդհանուր ժողովում դիմելով ներկաներին՝ Արայիկ Հարությունյանը գոհունակություն է հայտնել ընկերության կողմից նախորդ տարիներին Արցախում կատարված աշխատանքներից, որոնք ընդգրկել են միլիոնավոր դոլար ներդրումներ:

«Ուրախ եմ, որ տարեցտարի աճում է թե՛ շահառուների, թե՛ բաժնետերերի թիվը, ինչը վկայում է ծրագրի արդյունավետության և վստահելիության բարձր մակարդակի մասին: Հավատացած եմ, որ ժամանակի ընթացքում ավելի շոշափելի ձեռքբերումներ կարձանագրենք մեր ճանապարհին` Քաշաթաղի շրջանին հնարավորություն ընձեռելով զարգացման նոր փուլ թևակոխել: «ԱՐԻ»-ն օրինակելի նախագիծ է աշխարհասփյուռ հայության համար, քանի որ այն, կառավարության երաշխիքներով ու տոկոսների մասնակի սուբսիդավորմամբ, ընդգրկում է փոքր և միջին ներդրումներ մեր հայրենակիցների կողմից: Ընկերության կողմից տրամադրվող միկրովարկերի միջոցով թե՛ Արցախի բնակիչներն են հնարավորություն ստանում եկամուտի սեփական աղբյուր ստեղծել, թե՛ բաժնետերերն են շահույթ ստանում իրենց ներդրումներից՝ միաժամանակ հայրենիքի համար օգտակար գործ կատարելով»,- նշել է Արայիկ Հարությունյանը:

Բեյրութի Հայկազյան համալսարանում հանդիպելով դասախոսական կազմի և ուսանողների հետ՝ Արայիկ Հարությունյանը հակիրճ ներկայացրել է Արցախի պետականակերտման և տնտեսության զարգացման հաջողությունները, խնդիրներն ու հեռանկարները: Նա կարևոր է համարել լիբանանահայ համայնքի փորձն ազգապահպանության գործում, որում իր զգալի ներդրումն է ունեցել նաև Հայկազյան համալսարանը: Վարչապետը վերջում պատասխանել է ներկաների տարաբնույթ հարցերին:

Արայիկ Հարությունյանն առանձին հանդիպումներ է ունեցել նաև Լիբանանում գործող հայկական՝ Հայ հեղափոխական դաշնակցություն, Ռամկավար ազատական և Սոցիալ-դեմոկրատական հնչակյան կուսակցությունների ղեկավար կազմերի հետ: Հանդիպումների ընթացքում Արայիկ Հարությունյանը ողջունել է նշված կառույցների հայապահպան գործունեությունը՝ կարևորելով, որ նրանց ուշադրության կիզակետում լինի հայրենիքը՝ որպես բոլոր հայերի օրրան: Կուսակցությունների ներկայացուցիչների հետ վարչապետը քննարկել է հետագա համագործակցության հնարավորությունները և ձեռք բերել պայմանավորվածություններ այդ ուղղությամբ:

Այցի շրջանակներում Արայիկ Հարությունյանը հանդիպում է ունեցել Հայ բարեգործական ընդհանուր միության լիբանանյան կառույցի ներկայացուցիչների հետ, որին մասնակցել են նաև Լիբանանի Հանրապետության հայազգի պատգամավորներ ու նախարարներ: