Այն, որ այս պահին «Կասկածելի երեկո»-ի շրջանակում տեսնում ենք միայն Գարիկին ու Ռոբին, չի նշանակում, որ «Վիտամին ակումբը» մասնատվել է. պրոդյուսերը՝ նոր հաղորդման և ապագա ծրագրերի մասին

Life.panorama.am-ը գրում է.

«Կասկածելի երեկո»՝ այսպես է կոչվում «Վիտամին ակումբի» նոր նախագիծը, որը կրկին հեռարձակվում է «Շանթ» հեռուստաընկերությամբ: Նոր նախագծի հաղորդավարներն են ակումբի անդամներ Գարիկ Պապոյանն ու Ռոբերտ Մարտիրոսյանը: Life.panorama.am-ի հետ զրույցում «Վիտամին ակումբի» պրոդյուսեր Վլադ Սահակյանը հայտնեց, որ «Կասկածելի երեկո»-ի մտահղացման հեղինակը Գարիկ Պապոյանն է.

«Մեր նոր հաղորդումը մեր մանկության մի քանի խաղերի հիմքի վրա է ստեղծվել, այն խաղային ոճով հումորային թոք-շոու է, որի գաղափարը տվեց Գարիկ Պապոյանը, որն էլ հետո մեր թիմով զարգացրեցինք ու արդեն ներկայացրինք մեր հեռուստադիտողներին, ովքեր արդեն երկար ժամանակ մեզնից նորության էին սպասում»,- նշեց պրոդյուսերը:

Վլադ Սահակյանի տեղեկացմամբ՝ հաղորդավարների ընտրությունը պատահական չի եղել.

«Այս հաղորդման ձեւաչափն այնպիսին է, որ բացի նախատեսված սցենարից պետք է նաեւ տեղում իմպրովիզներ անել, իսկ այդ հարցում բոլորս գիտենք, որ Գարիկ Պապոյանը միշտ է աչքի ընկել (հիշենք «Վիտամին ակումբ»-ի հյուրերի հետ զրույցները, երբ Գարիկը կարող էր անսպասելի մի բան ասել, որից ողջ դահլիճը ավելի շատ ծիծաղեր, քան գրված սցենարից), իսկ «Վիտամին ակումբ»-ի ելույթների ժամանակ Գարիկի ականջում տեղադրված հուշող սարքի միկրոֆոնը մշտապես գտնվել է Ռոբի մոտ, ով մեր գլխավոր սցենարիստն է: Այսինքն ստացվում է, որ նրանք իմպրովիզացիայի մեծ փորձ ունեն, ինչն էլ այս հաղորդման գլխավոր շեշտերից էր, ուստի որպես հաղորդավարներ՝ նրանց ընտրությունը պատահական չէր»,- նշեց նա:

«Կասկածելի երեկո»-ի համար շատ կարեւոր է հյուրերի ընտրությունը, քանի որ միայն նրանց միջոցով կարող է հաջողվել հաղորդումը.

«Շատ կարեւոր է հյուրերի ընտրությունը, ամեն հաղորդման համար չորս հյուր ենք հրավիրում, որոնցից երկուսը Գարիկի թիմում է, երկուսը՝ Ռոբերտի: Իհարկե շատ լավ է, որ հյուրերը լինեն հիպերակտիվ, հումորով, բայց դրան զուգահեռ կարող են լինել շատ փակ հյուրեր, քանի որ հետաքրքիր է, երբ արձագանքները տարբեր են լինում: Իրականում մանրամասն ենք աշխատում,  շատ երկար ծանրութեթեւ անելուց հետո ենք հյուրերին ընտրում, որպեսզի ամեն ինչ ճիշտ կառուցվի»,- պատմեց Վլադ Սահակյանը:

«Կասկածելի երեկո»-ի առաջին փուլում հյուրերն ու հաղորդավարները պատմում են իրենց պատմությունը, որոնց հակառակորդների կողմից հավատալու կամ չհավատալու միջոցով միավորներ են հավաքվում: Հետաքրքրվելով, թե այդ պատմությունները նախապես մտածված սցենարի արդյունք են, թե իրական պատմություններ, պորդյուսերը մանրամասնեց.

«Իրականում մեր հյուրերից ամեն մեկն իր հետ բերում է իր իրական պատմությունը, բայց դրան զուգահեռ մեր խմբագիրը գրում է եւս մեկ սուտ պատմություն: Հյուրերը խաղից առաջ չգիտեն՝ իրենց կընկնի իրական, թե սուտ պատմությունը, սակայն յուրաքանչյուր պարագայում նրանք պետք է ներկայացնեն որպես իրականություն»:

Ի դեպ՝ մեզ հետ զրույցում Վլադ Սահակյանը անդրադարձավ նաեւ «Վիտամին ակումբ»-ի հետագա ծրագրերին: Նրա խոսքերով՝ արդեն հաջորդ եթերաշրջանում հնարավոր են նոր հաղորդումներ, որոնք գուցե կվարեն ակումբի մյուս տղաները.

«Այն, որ այս պահին «Կասկածելի երեկո»-ի շրջանակում տեսնում ենք միայն Գարիկին ու Ռոբին, չի նշանակում, որ «Վիտամին ակումբը» մասնատվել է: Սա ընդհանուր աշխատանք է՝ «Վիտամին ակումբ» փրոդաքշենի արտադրանքը: Կադրից դուրս մեծ թիմ է աշխատում, նույն թիմը, որն աշխատել է «Վիտամին ակումբի» համար: Այն խոսակցությունները, թե մեր անձնակազմը էլ չկա կամ չի լինի, բացարձակապես սուտ է, ընդամենը բամբասանք»,- նշեց նա:

Վլադ Սահակայնը չբացառեց նաեւ մոտ ապագայում «Վիտամին ակումբ»-ի վերադարձը.

«Դեռեւս ժամկետներ չեմ կարող նշել, բայց մոտ ապագայում չենք բացառում նաեւ «Վիտամին ակումբի» ավանդական ելույթների վերադարձը: Այս պահին զբաղված ենք հանդիսատեսի համար ելույթների նախապատրաստական աշխատանքներով, բայց ավելի ուշ մենք կրկին եթերում կլինենք: Ընդ որում նշեմ նաեւ, որ եթերից դուրս ելույթներ նախատեսվում է ինչպես Երեւանում եւ Հայաստանի մարզերում, այնպես էլ արտերկրում»,- ավելացրեց պրոդյուսերը:

Հեղինակ՝ Անուշիկ Մելքոնյան