Փախլավա

Բաղադրությունը՝

կարագ կամ մարգարին – 500 գր,

թթվասեր – 600 գր,

ալյուր – 5 բաժակ

սոդա – 1 թ. գդ.

միջուկի համար.

ընկույզ կտրատած – 2 բաժակ,

շաքարավազ – 1 բաժակ,

դարչին – 0.5 թ.գդ.,

ձու – 1 հատ,

մեղր – 1 բաժակ .

Լավ կլինի, եթե խմորը ողջ գիշեր մնա սառնարանում:

Կարագը խորանարդիկների բաժանել: Ալյուրը մաղել, լցնել սեղանի վրա: Կարագի խորանարդիկները լցնել ալյուրի վրա և դանակներով կտրատել, խառնել: Ձեռքերով խմորին չդիպչել: Խառնել այնքան, որ խառնուրդը նմանվի խոնավ ալյուրի, շատ փոքր գնդիկներով: Զանգվածի մեջ փոս անել: 200 գր թթվասերին 1/3 թ. գդ. սոդա խառնել և լցնել ալյուրի վրա: Կրկին դանակներով խառնել մինչև համասեռ դառնալը: Եվս 200 գր թթվասեր 1/3 թ. գդ. սոդայի հետ խառնել, լցնել խմորի վրա: Երբ խմորը նորից միատարր դառնա, լցնել թթվասերի վերջին բաժինը: Ստացվում է փափուկ խմոր։ Այն ձեռքերով թույլ սեղմել, գունդ անել, կիսել: Ամեն գունդը բացել, 25 գր կարագ քսել, ծրարաձև ծալել, դնել սառնարան երկու ժամով: Նույն ձևով բացել երկրորդ գունդը, դնել սառչելու: Երկու ժամ անց խմորը հանել, բացել, քսել 25-ական գր կարագ, ծրարաձև ծալել, նորից դնել սառնարանի մեջ: Միջուկի համար երկու բաժակ ընկույզ կտրատել, խառնել շաքարավազի, դարչնի և ձվի սպիտակուցի հետ: Խմորներից մեկը, որն ավելի փոքր և անհարթ կլինի, բացել տապակի չափով: Վրան լցնել ընկույզով միջուկը, համաչափ տարածել: Բացել համեմատաբար մեծ խմորի գունդը, դնել միջուկի վրա, եզրերն ամրացնել, որ միջուկը դուրս չգա: Ձվի դեղնուցը հարել, քսել խմորի վրա: Այնուհետև զգուշորեն կտրատել խմորը նախ ուղղահայաց գծով, ապա շեղ, որպեսզի ստացվեն փախլավաձև կտորներ: Դնել 180 աստիճան տաք ջեռոցի մեջ, թխել, մինչև բարձրանա ու կարմրի: Հանել, վրան լցնել մեղրը այնպես, որ բոլոր կտորների վրայով հոսի: Թողնել սառչի, կտրատել և մատուցել: