Կապիտան Բաբկեն Ղարդյանը, ՊՆ-ից պատասխան չստանալով, դիմել է Սերժ Սարգսյանին

Զինծառայողներին սեքսուալ բնույթի գործողությունների դրդման մեջ մեղադրվող, ութ տարվա ազատազրկման դատապարտված կապիտան Բաբկեն Ղարդյանը բաց նամակով դիմել է նախագահ Սերժ Սարգսյանին այն բանից հետո, երբ Սեյրան Օհանյանին դիմելուց հետո պատասխան չի ստացել: Ղարդյանը նամակով դիմել էր նաեւ Սեյրան Օհանյանին՝ մատնացույց անելով բանակում տիրող բարքերն ու անօրինկանությունները:

Սերժ Սարգսյանին ուղղված նամակը ներկայացնում նք ստորեւ. «Մեծարգո Պարոն Նախագահ, որպես իր գերագույն գլխավոր հրամանատարի Ձեզ է դիմում մի սպա, ով ինը տարի ծառայել է ՀՀ ԶՈւ-ի կազմում, որից յոթ տարին՝ ԼՂՀ սահմանամերձ գոտում: Լինելով ՌՈ աշխատակից՝ պայքարել եմ հովանավորչության և հանցագործության դեմ, ինչը շատ դեպքերում դուր չի եկել իմ ղեկավարությանը եւ զինվորական դատախազ Արսեն Սարդարյանին, ով, ըստ իր հայտարարության, հանդիսանում է Ձեր սանիկը: Այս ամենը հանգեցրեց նրան, որ վերջինս ՌՈ պետ Արամ Բաղդասարյանի հետ հորինեցին մի այնպիսի խայտառակ, շինծու, վարկաբեկիչ քրեական գործ իմ հանդեպ, որ ես հայտնվեցի կատարյալ մոլորության եւ շփոթության մեջ: Ինձ մեղադրեցին իբր զինվորների նկատմամբ ունեցել եմ բռնի սեռական գործողություններ, այն էլ՝ ես հանդիսացել եմ պասիվ կողմ, ինչը զարմանք է առաջացրել անգամ ամենափորձառու սեքսապաթոլոգների մոտ: Նախաքննության սկզբում իբրեւ տուժող հանդիսացող զինծառայողները միաձայն հայտարարում էին, որ բացի «օրալ» հարաբերություններից՝ իրենց կամքին հակառակ իմ հետ եղել է նաեւ «անալ» հարաբերություն: Սակայն դատաբժշկական փորձաքննությունը ամբողջովին հերքեց այս խայտառակությունը: Մեծարգո Պրն. Նախագահ, նախաքննության ընթացքում ենթարկվելով հոգեբանական ճնշումների, ահաբեկումների եւ շանտաժի՝ ես համաձայնվեցի արագացված դատավարական կարգին՝ նաեւ հիմք ընդունելով զինդատախազ Սարդարյանի խոստումը այն մասին, որ ինձ կտան պայմանական, եւ այս սեքսուալ միջադեպը ստվեր չի գցի բանակի հեղինակության վրա: Հակառակ դեպքում՝ քրեական գործի մեջ կներգրավվեն իմ եւ կնոջս հարազատների ու բարեկամների այն տղաները, ովքեր ծառայում են ԼՂՀ տարածքում: Դրանով էլ ավելի կխայտառակեն ինձ եւ իմ հարազատներին: Բացի այդ ցանկանում եմ նշել, որ մինչեւ ձերբակալվելս, ես օրեր շարունակ անօրիանական կերպով գտնվել եմ անազատության մեջ, որի համար գրավոր դիմել եմ ՀՀ գլխավոր դատախազին, բայց դեռ արդյունք չկա: Պրն.Նախագահ, 10.02.2016թ. կայացավ իմ վերաքննիչ դատական նիստը, որի ժամանակ իմ պատիժը հինգ տարուց դարձավ ութ տարի:

Ես դիմել եմ դատարանին՝ պահանջելով բեկանել արագացված դատական նիստը եւ այն փոխարինել նորմալ, փաստական ապացույցների ուսումնասիրությամբ դատական նիստով, քանզի բոլոր այն ցուցմունքները, որոնք իբրեւ թե զինվորների կողմից են գրված՝ կազմված են թերի, անգրագետ մտքերով, նույնաբովանդակ: Նաեւ չեն կատարվել դատահոգեբանական, լաբորատոր և նեղ մասնագիտական պատշաճ փորձաքննություներ: Այս ամենին փոխարինել է զինվորական դատախազությունը, ինչպես նաեւ քրեական գործին է կցվել իմ՝ իրականությանը չհամապատասխանող ծառայողական բնութագիրը:

Ըստ որի՝ 2010թ.-ից ես հանդես եմ գալիս որպես շատ վատ զինծառայող: Սակայն այդ նույն ժամանակահատվածում ես երկու անգամ ստացել եմ զինվորական հերթական կոչումներ, երկու անգամ՝ պաշտոնի առաջխաղացում, ՊՆ Նախարարի կողմից արժանացել եմ թանկարժեք նվերների, ունեմ բազմաթիվ խրախուսանքներ, շնորհակալագրեր եւ շքանշաններ: Երբ 2012թ. ինձ ցանկանում էին տեղափոխել Երևան ՌՈ վարչություն, նույն այդ ղեկավարությունը՝ Ստեփանակերտի ՌՈ պետը, խնդրեց, որպեսզի ես ստանձնեմ Մատաղիսի ՌՈ հենակետի պետի պաշտոնը:

Այսքանից հետո նույն անձը տալիս է կեղծ բնութագիր՝ դատարանում միտումնավոր էլ ավելի բարդացնելով իմ իրավիճակը: Այսպիսով՝ հարգարժան Նախագահ, դիմում եմ Ձեզ, որպես իմ միակ հույսի խնդրանքով. կարգադրեք վերանայել այս քրեական գործը փաստական կողմերով՝ բեկանելով արագացված դատական ընթացակարգը, որը շուտով կուղարկվի իմ կողմից վճռաբեկ դատարան, եւ եթե փաստական կողմերով օբյեկտիվորեն կհիմանվորվի իմ մեղքը, ապա ես համաձայն եմ էլ ավելի խիստ պատժի: Հույս ունեմ, որ Դուք կաջակցեք Ձեր սպային եւ ինձ չեք դրդի ծայրահեղ քայլերի:

Հարգաներով՝ Բաբկեն Ղարդյան»: