Քրքումի և կոճապղպեղի մզվածքները նպաստում են ոսկրային իմպլանտների սերտաճմանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին            

Վաշինգտոն նահանգի համալսարանի նոր հետազոտության համաձայն, քրքումի և կոճապղպեղի մզվածքը նպաստում է ոսկրային իմպլանտների ամուր սերտաճմանը, ինչպես նաև ոչնչացնում է բակտերիաներն ու քաղցկեղային բջիջները: Այս հայտնագործությունը կարող է օգնել հոդերի էնդոպրոթեզավորման և ոսկրերի քաղցկեղ ունեցող միլիոնավոր պացիենտների:

Նախնական փորձարկումները ցույց են տվել, որ մզվածքը 6 շաբաթվա ընթացքում մոտ 2 անգամ արագացնում է ոսկրային հյուսվածքի սերտաճումն իմպլանտի շուրջը, ոչնչացնում է իմպլանտի մակերեսի բակտերիաների ավելի քան 90%-ը և զգալիորեն նվազեցնում քաղցկեղային բջիջների քանակը: Այս արդյունքները համատեղում են ավանդական բժշկության վրա հիմնված նատուրոպաթիկ մոտեցման տարրերը և ժամանակակից բժշկական տեխնոլոգիաները:

Քրքումը և կոճապղպեղի արմատը հազարավոր տարիներ շարունակ օգտագործվել են սննդի մեջ և բժշկական նպատակներով Չինաստանում ու Հնդկաստանում:

Journal of American Ceramic Society ամսագրում հրապարակված նոր հետազոտությունը Բոուզի և Բոինգի համալսարանի պրոֆեսոր Ամիտ Բանդիոպադհյայի աշխատանքն է, որտեղ նրանք ցույց են տալիս, որ քրքումի և կոճապղպեղի միացությունները կարող են արդյունավետ հավելում դառնալ բուժման առաջադեմ մեթոդների համար: Աշխատանքը հիմնված է հեղինակների ավելի վաղ հետազոտությունների վրա, որոնք վերաբերում են ոսկրային իմպլանտների արտադրության համար 3D տպագրության կիրառմանը: Ժամանակին այս գաղափարը ֆանտաստիկ էր թվում, սակայն այսօր 3D տպագրությունն իմպլանտների պատրաստման տարածված միջոց է:

Ընթացիկ հետազոտության մեջ գիտնականները կենտրոնացել են ոսկրային իմպլանտների հետ կապված առողջական մի շարք խնդիրների վրա: Ըստ «Научная Россия»-ի, իմպլանտների զգալի մասը ստիպված են լինում փոխարինել այն պատճառով, որ դրանք չեն սերտաճում ոսկրի հետ կամ ժամանակի ընթացքում թուլանում են: Բացի այդ, լուրջ խնդիրներ կան՝ կապված հենց իմպլանտների մետաղական մակերեսների վարակների հետ. դրանք առաջանում են դեպքերի գրեթե մեկ երրորդում, և դրանց բուժումը շատ դժվար է:

«Հաճախ վարակի պատճառով ստիպված ենք լինում հեռացնել իմպլանտը,- ասում է աշխատանքի հեղինակ Բոուզը,- Պացիենտի մարմնում ոսկրն ամրացնելու այլ միջոց չկա: Հետևաբար, վարակի հետ կապված խնդիրները կարող են հանգեցնել առողջական ծանր հետևանքների և ֆինանսական դժվարությունների»:

Մզվածքը փորձարկել են օստեոսարկոմա առաջացնող բջիջների վրա. սա ոսկրերի քաղցկեղի ձև է, որն ամենատարածված չարորակ հիվանդությունն է երեխաների և երիտասարդների շրջանում: Նույնիսկ վիրահատական միջամտությունից, քիմիոթերապիայից և ոսկրային իմպլանտների տեղադրումից հետո որոշ քաղցկեղային բջիջներ մնում են օրգանիզմում:

Հետազոտական խումբը ստուգել է՝ հնարավոր է արդյոք կոճապղպեղի մզվածքը և քրքումի ակտիվ նյութը՝ կուրկումինը, քսել տիտանե իմպլանտին, որպեսզի դրանք երկար ժամանակի ընթացքում աստիճանաբար անջատվեն: Մզվածքը փորձարկվել է լաբորատոր պայմաններում և առնետների ազդրոսկրի իմպլանտի վրա կատարված փորձի ընթացքում:

Այն նպաստել է տիտանե իմպլանտի ամուր սերտաճմանը ոսկրի հետ՝ վիրահատությունից 6 շաբաթ անց մոտ 2 անգամ ուժեղացնելով այդ ազդեցությունը: Մզվածքը նաև ոչնչացրել է բակտերիաների 92%-ը իմպլանտի մակերեսին և 11 անգամ նվազեցրել քաղցկեղային բջիջների քանակն իմպլանտի շուրջը՝ չբուժված ստուգիչ խմբի համեմատ:

«Այս խնդիրը բազմաթիվ կողմեր ունի,- ասում է Բանդիոպադհյայը,- Մենք մշակում ենք իմպլանտ, որը որոշ չափով կայուն կլինի վարակների նկատմամբ: Այն կօգնի ոսկրն ամրացնել պրոթեզին, լինի դա կոնքազդրային, ծնկան, ողնաշարի թե ուսի իմպլանտ»:

Բոուզը նշել է, որ վարակների և քաղցկեղային բջիջների դեմ պայքարում կոճապղպեղի և քրքումի արդյունավետությունն այս մթերքների օգտակար հատկություններից միայն մեկն է: Ապացուցված է, որ քրքումն ու կոճապղպեղն ունեն հակաբորբոքային և հակաօքսիդանտ հատկություններ, ինչպես նաև այլ օգտակար առավելություններ:

«Ես մեծ ոգևորությամբ եմ վերաբերվում այս բնական բուժիչ միացություններին, քանի որ կարծում եմ, որ դրանք կարելի է հեշտությամբ օգտագործել որպես կանխարգելիչ միջոց առօրյա կյանքում,- ասում է Բոուզը,- Քրքումից ստացվող կուրկումինն ունի շատ լավ հակաբորբոքային ազդեցություն, իսկ բորբոքային գործընթացների հետևանքով ոսկրային զանգվածի կորուստը լուրջ խնդիր է: Կոճապղպեղը կարող է հակաքաղցկեղային ազդեցություն ունենալ: Մենք կարող ենք օգտագործել այս միացությունները որպես կանխարգելիչ միջոց»:

Հետևեք մեզ՝ այստեղ