Իտալիայի իշխանությունները վիրավորական են համարել Սուրբ Հարության տաճարում պատարագի մատուցման արգելքը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Համաշխարհային առաջնորդներն իրենց մտահոգությունն են հայտնել այն բանից հետո, երբ իսրայելական ոստիկանությունը կիրակի թույլ չի տվել Երուսաղեմի լատին պատրիարք, կարդինալ Պիերբատիստա Պիցաբալային մուտք գործել Սուրբ Հարության տաճար, հայտնում է NBC News-ը։

Պիցաբալան փորձել է մեկնել Երուսաղեմի Հին քաղաքում գտնվող եկեղեցի՝ եկեղեցու պաշտոնական պահապան, վերապատվելի Ֆրանչեսկո Իելպոյի հետ՝ Ծաղկազարդի պատարագ մատուցելու համար։

Ըստ Լատին պատրիարքության, հոգևորականներին ճանապարհին կանգնեցրել են և ստիպել հետ դառնալ, ինչը «դարերի ընթացքում առաջին դեպքն է», երբ հնարավոր չի եղել Ծաղկազարդի պատարագ մատուցել եկեղեցում, որը քրիստոնեության ամենասուրբ վայրն է և կառուցված է այնտեղ, որտեղ, շատերի համոզմամբ, խաչվել է Հիսուսը։

Իսրայելի վարչապետ Բենիամին Նեթանյահուի գրասենյակը հանդես է եկել հայտարարությամբ, որում պարզաբանել է, որ ոստիկանությունը խոչընդոտել է Պիցաբալային «նրա անվտանգության նկատմամբ ունեցած հատուկ հոգատարությունից ելնելով», և դրանում «որևէ չարամտություն չի եղել»։

Հայտարարության մեջ նշվում է, որ Հին քաղաքի բոլոր սրբավայրերը, որտեղ գտնվում են քրիստոնեական, մուսուլմանական և հրեական սրբությունները, փակվել են հավատացյալների համար, երբ փետրվարին սկսվել է պատերազմն Իրանի հետ։ «Իրանը բազմիցս բալիստիկ հրթիռներով հարվածներ է հասցրել Երուսաղեմում բոլոր երեք միաստվածային կրոնների սրբավայրերին։ Հարվածներից մեկի հետևանքով հրթիռի բեկորներն ընկել են Սուրբ Հարության տաճարից մի քանի մետր հեռավորության վրա։ Դավանանքի ազատությունը կշարունակի պահպանվել՝ անհրաժեշտ սահմանափակումների կիրառմամբ»,- ասված է իսրայելական ոստիկանության հայտարարության մեջ։ Ծաղկազարդի պաշտոնական թափորը, որին սովորաբար մասնակցում են հազարավոր քրիստոնյաներ, չեղարկվել էր անցյալ շաբաթ՝ Իսրայելի կողմից մարդկանց մեծ հավաքների արգելքի համաձայն, իսկ Լատին պատրիարքությունը վկայակոչել է «հակամարտությամբ պայմանավորված սահմանափակումները»։

Կիրակնօրյա հայտարարության մեջ Իտալիայի վարչապետ Ջորջիա Մելոնին համերաշխություն է հայտնել Պիցաբալային, Իելպոյին և մյուսներին, որոնց իսրայելական իշխանություններն այսօր թույլ չեն տվել Ծաղկազարդի պատարագ մատուցել Սուրբ Հարության տաճարում։

«Երուսաղեմի պատրիարքի և Սուրբ Երկրի պահապանների մուտքը մերժելը, հատկապես հավատքի համար այնպիսի կարևոր տոնին, ինչպիսին Ծաղկազարդն է, հանցագործություն է ոչ միայն հավատացյալների, այլև ցանկացած համայնքի դեմ, որը ճանաչում է դավանանքի ազատությունը»,- հավելել է նա։

Ֆրանսիայի նախագահ Էմանուել Մակրոնը նույնպես դատապարտել է իսրայելական ոստիկանության որոշումը Երուսաղեմի վերաբերյալ, որն, ըստ նրա, «լրացնում է Երուսաղեմի սրբավայրերի կարգավիճակի խախտումների մտահոգիչ շարքը»։

Նախքան միջադեպը, Հռոմի Պապ Լևոն XIV-ը Վատիկանում Ծաղկազարդի իր ուղերձը սկսել էր՝ ընդգծելով, որ իր աղոթքները «ավելի քան երբևէ ուղղված են Մերձավոր Արևելքի քրիստոնյաներին»։ Նա դա կրկնել է X սոցիալական ցանցի իր էջում՝ միջադեպից հետո՝ առանց անմիջականորեն անդրադառնալու կատարվածին։

Իր հերթին Իտալիայի փոխվարչապետ Մատեո Սալվինին միջադեպն անվանել է «անընդունելի և վիրավորական», իսկ երկրի արտաքին գործերի նախարար Անտոնիո Տայանին հայտարարել է, որ կկանչի Իսրայելի դեսպանին՝ տեղի ունեցածի վերաբերյալ «պարզաբանումներ ստանալու» համար։

Հետևեք մեզ՝ այստեղ