Ինչո՞ւ է կարմրուկը դեռևս սպառնում Եվրոպային

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Եվրոպական առողջապահական մարմինները նախազգուշացնում են. կարմրուկը դեռևս խնդիր է Եվրոպայում՝ չնայած 2025 թվականի անկմանը, և կոչ են անում անհապաղ հաղթահարել պատվաստումների հարցում առկա տատանումները:

Կարմրուկը, որի մասին հաճախ մոռանում են, շարունակում է լուրջ խնդիր մնալ ողջ մայրցամաքի համար, հայտնում է Euronews-ը: Առողջապահության համաշխարհային կազմակերպության եվրոպական տարածաշրջանում 2025 թվականին դեպքերի թիվը նախորդ տարվա համեմատ նվազել է, սակայն փորձագետները նախազգուշացնում են, որ բռնկումների ռիսկը պահպանվում է:

2024 թվականին Եվրոպան արձանագրել է կարմրուկի 127,350 դեպք, ինչն ամենաբարձր ցուցանիշն է 1997 թվականից ի վեր:

Թեև 2025 թվականին դեպքերի թիվը կրճատվել է, գրանցված հիվանդացությունը երկու անգամ գերազանցել է 2023 թվականի ցուցանիշը, նախազգուշացնում է Հիվանդությունների կանխարգելման և վերահսկման եվրոպական կենտրոնը (ECDC):

«Եվրոպան պետք է առաջատար դեր խաղա կարմրուկի վերացման գործում»,- ասել է ECDC-ի պատվաստումների միջոցով կանխարգելվող հիվանդությունների և իմունիզացիայի ծրագրի ղեկավար Սաբրինա Բաչին:

Նա հավելել է, որ Եվրոպան ունի բարձր արդյունավետությամբ և անվտանգ պատվաստանյութ, ինչպես նաև գիտելիքներ, ռեսուրսներ և համաճարակաբանական հսկողության ամենահուսալի միջոցներից մի քանիսը՝ այս կանխարգելելի հիվանդությունը վերահսկելու համար:

Բռնկումները կանխելու և կարմրուկի նկատմամբ հատկապես խոցելի խմբերին պաշտպանելու համար (օրինակ՝ երեխաներին, որոնք դեռ շատ փոքր են պատվաստվելու համար, կամ նրանց, ում չի կարելի պատվաստվել բժշկական ցուցումներով), պատվաստման ենթակա բնակչության առնվազն 95 տոկոսը պետք է ստանա պատվաստանյութի երկու դեղաչափ:

Սակայն, ըստ ECDC-ի տվյալների, 2025 թվականին կարմրուկով հիվանդացած 10 հոգուց 8-ը պատվաստված չի եղել, ինչն արտացոլում է նույն միտումը, ինչ 2024 թվականին:

«Անհատական պատվաստումը պաշտպանում է նրանց, ովքեր չեն կարող պատվաստվել, քանի որ այն նվազեցնում է վարակների տարածումը: Սա պատվաստումը դարձնում է ոչ միայն ինքնապաշտպանության ակտ, այլև համերաշխության դրսևորում: Կարմրուկը հնարավոր է վերացնել, եթե միասին գործենք»,- հավելել է Բաչին:

Կարմրուկը մարդուն ախտահարող ամենավարակիչ վիրուսներից մեկն է. յուրաքանչյուր հիվանդից վարակվում է մինչև 18 չպատվաստված մարդ, այսինքն՝ վիրուսը մոտ 12 անգամ ավելի վարակիչ է, քան գրիպը:

Հիվանդությունը կարող է առաջացնել երկարատև ծանր բարդություններ, այդ թվում՝ իմունային համակարգի վնասում. վիրուսը ամիսներով և նույնիսկ տարիներով «ջնջում է» դրա հիշողությունն այն մասին, թե ինչպես պայքարել վարակների դեմ:

Ըստ ԱՀԿ-ի, սա կարմրուկով հիվանդացածներին ավելի խոցելի է դարձնում այլ հիվանդությունների և մահվան նկատմամբ:

Կարմրուկը բուժող դեղամիջոց կամ յուրահատուկ բուժում գոյություն չունի. բարդությունների բացակայության դեպքում հիվանդությունը սովորաբար տևում է մոտ երկու շաբաթ, ինչն ընդգծում է պատվաստման առանցքային դերը դրա դեմ պայքարում:

«Թեև դեպքերի թիվը նվազել է, պահպանվում են և պետք է վերացվեն այն պայմանները, որոնք վերջին տարիներին հանգեցրել են այս մահացու հիվանդության վերադարձին»,- հայտարարել է Եվրոպայում և Կենտրոնական Ասիայում ՄԱԿ-ի Մանկական հիմնադրամի (ՅՈՒՆԻՍԵՖ) տարածաշրջանային տնօրեն Ռեգինա Դե Դոմինիչիսը:

Նա ընդգծել է պատվաստումների նկատմամբ անվստահության և ապատեղեկատվության դեմ պայքարելու անհրաժեշտությունը: Առանց դրա, հավելել է Դե Դոմինիչիսը, երեխաները դեռևս կունենան կարմրուկից և պատվաստման միջոցով կանխարգելվող այլ հիվանդություններից մահանալու կամ ծանր հիվանդանալու ռիսկ:

ԱՀԿ եվրոպական տարածաշրջանային տնօրեն Հանս Կլյուգեն չորեքշաբթի կոչ է արել մարդկանց ապավինել միայն հուսալի աղբյուրներից ստացված ստուգված բժշկական տեղեկատվությանը՝ «ներկայիս համատարած կեղծ լուրերի միջավայրում»:

«Կարմրուկի վերացումն առանցքային նշանակություն ունի առողջապահության ազգային և տարածաշրջանային անվտանգության ապահովման համար»,- հավելել է Կլյուգեն:

Հետևեք մեզ՝ այստեղ