«Ֆուլ Հաուս. Վայրէջք»․ վերադարձ ու տարիներով պահված հույզեր

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Տարիներ անց սիրված սիթքոմը՝ «Ֆուլ Հաուս»-ը վերադարձել է ֆիլմի ձևաչափով: «Ֆուլ Հաուս. Վայրէջք» գեղարվեստական ֆիլմն արդեն մեծ էկրաններին է։ «Ֆուլ Հաուս»-ի վերջին նկարահանումներից անցել է գրեթե յոթ տարի, սակայն «երբ է լինելու շարունակությունը» հարցն այս տարիների ընթացքում հնչել է անդադար։ Սիրված հերոսները  վերադառնում են ամբողջովին նոր պատմությամբ՝ խոստանալով հույզեր, ծիծաղ ու անսպասելի շրջադարձեր:

Tert.am Life-ը ներկա է եղել ֆիլմի պրեմիերային ու առանձնացրել երեկոյի հետաքրքիր դրվագները: 

Ֆիլմի պրեմիերայից առաջ դերասանական կազմը կիսվեց սպասումներով, հույզերով ու անցած ճանապարհով։ Սցենարիստ, դերասան Գրիգոր Դանիելյանը նշեց, որ «Ֆուլ Հաուսը երբ է լինելու» հարցը դարձել էր ամենատարածվածը․ «Կարծում եմ՝ բոլորը կհաստատեն, որ «ո՞նց ես, ի՞նչ կա չկա»-ից ավելի շատ մեր կյանքում գերակշռում էր «Ֆուլ Հաուսը ե՞րբ է լինելու» հարցը։ Մարդուն հանդիպում էիր՝ նույնիսկ բարև չէր տալիս, առաջին հարցը դա էր։ Վերջապես որոշեցինք այդ հարցը փակել»։

Գրիգոր Դանիելյանի խոսքով՝ սերիալի փոխարեն ֆիլմ ստեղծելու գաղափարը վաղուց է եղել․ «Մենք չէինք կարող անել հերթական եթերաշրջան, մեզ պետք էր մի քայլ առաջ, իսկ դա՝ ֆիլմն էր։ Ուզում էինք, որ այն չլինի միայն կատակերգություն, այլ ներառի նաև դրամա, արկածային տարրեր ու լարված պահեր, որպեսզի հնարավորինս պահենք հանդիսատեսին էկրանների առաջ»։

Դերասան, պրոդյուսեր Արմեն Պետրոսյանը՝ Մենչը պատմեց, որ ֆիլմի ստեղծման ճանապարհին ամենաբարդը թիմը կրկին մեկտեղելն էր․ «Յոթ տարի անց բոլորն արդեն իրենց գործերն ունեին, մեկը մի երկրում էր, մյուսը՝ մեկ ուրիշում։ Բայց փառք Աստծո՝ շատ արագ հավաքվեցինք, որովհետև բոլորի համար սա սպասված էր, ու բոլորը մեծ հաճույքով ու եռանդով աշխատեցին»։

Նա ընդգծեց, որ ֆիլմը միջազգային ցուցադրություն է ունենալու՝ Եվրոպայում, ԱՄՆ-ում, Ռուսաստանում ու Կանադայում․ «Կան քաղաքներ, որտեղ երբեք հայկական ֆիլմ չի ցուցադրվել, և ամենահետաքրքիրը՝ այդ քաղաքներում նույնիսկ չեն պատկերացրել, թե որքան հայ է ապրում այնտեղ։ Ֆիլմը մարդկանց համախմբում է»։

Միհրան Ծառուկյանն ու Արփի Գաբրիելյանը պրեմիերան բնութագրեցին որպես տարիներով փայփայված օր․ «Հիշեցի մեր բոլոր 12 տարիները ու հասկացա, որ մեզնից յուրաքանչյուրն այս օրը իր մեջ պահել է, բայց համարձակություն չի ունեցել բարձրաձայնելու։ Սա մեզ համար չափազանց կարևոր օր է»,- նշեց դերասանուհին:

Նրա խոսքով՝ նկարահանումների դժվարությունները հետին պլան են մղվում, երբ աշխատանքն անում ես սիրով․ «Արվեստը զոհեր է պահանջում, բայց, երբ գործը քեզ համար աշխատանք չէ, այլ սեր, դժվարությունները հետո անգամ չես հիշում»։

Դերասանուհի Մարջան Ավետիսյանն էլ նշեց, որ «Ֆուլ Հաուս»-ը երբեք չի անհետացել իրենց կյանքից․

«Մենք չափազանց երկար ենք ապրել այդ կերպարների հետ, և նույնիսկ հիմա մեծ դիսոնանս չկա։ Մեր աշխատանքը միշտ եղել է կոլեկտիվ, և դա այս ֆիլմի ամենամեծ հաջողությունն է»։

Սցենարիստ, դերասան Գարիկ Սեփխանյանը պատմեց սցենարական աշխատանքի դժվարությունների մասին․

«Սցենարը մոտ վեց դրաֆտ է ունեցել։ Աշխատել ենք գիշեր-ցերեկ, քննարկել, փոխել, որպեսզի բոլորին դուր գա։ Հուսամ՝ հանդիսատեսը դա կզգա ֆիլմը դիտելուց հետո»։

«Ֆուլ Հաուս. Վայրէջք»-ը ոչ միայն սիրված պատմության շարունակությունն է, այլ նաև տարիներով ձևավորված թիմի վերադարձը՝ լի հույզերով, հումորով ու սպասումով։ Իսկ թե որքան կարդարանա այդ սպասումը, ստեղծագործական թիմի խոսքով՝  կորոշի հանդիսատեսը։ 

Հիշեցնենք, որ ֆիլմում նկարահանվել են Արմեն Պետրոսյանը, Գրիգոր Դանիելյանը, Գարիկ Սեփխանյանը, Միհրան Ծառուկյանը, Արփի Գաբրիելյանը, Աղաս Մանուկյանը, Մարջան Ավետիտյան, Մոսո Կարապետյանը, Անի Երանյանը, Գոռ Հակոբյանը և այլք: Պրոդյուսեր՝ Արմեն Պետրոսյան, սցենարի հեղինակներ՝ Գրիգոր Դանիելյան,Գարիկ Սեփխանյան, ռեժիսոր՝ Կարեն Ամյան:

Լուսանկարները՝ Էլեն Գասպարյանի

Հետևեք մեզ՝ այստեղ