Ձեռք են բերվել մեծաքանակ փրկարարական միջոցներ․ ՆԳՆ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ՀՀ Ներքին գործերի նախարարությունից պարզաբանում են տարածել․

«Նոյեմբերի 27-ին լրատվական կայքերից մեկում շրջանառվեց «Փրկարարական սարքերի փոխարեն՝ մոտոցիկլետներ պարեկներին» վերտառությամբ հոդվածը, որում անդրադարձ էր կատարվել ՆԳ նախարարության կողմից իրականացվող գնման ընթացակարգերին։ Հոդվածում առկա որոշ տեղեկություններ մանիպուլացնող են և մոլորեցնող։

ՀՀ ՆԳՆ կարիքների համար 2025 թվականին էլեկտրոնային աճուրդ գնման ձևով հայտարարվել է 10 մոտոցիկլետների ձեռքբերման գնման ընթացակարգ, որի շրջանակներում հայտ է ներկայացրել միայն «Վանիթար» ՍՊ ընկերությունը։ Վերջինիս հետ 2025 թվականի օգոստոսի 28-ին կնքվել է պայմանագիր։ Գնման ընթացակարգը կազմակերպվել է «Գնումների մասին» ՀՀ օրենքի 15-րդ հոդվածի 6-րդ մասի համաձայն՝ ֆինանսական միջոցներ նախատեսվելու պայմանով։

Ֆինանսական միջոցների արդյունավետ կառավարման համար, մոտոցիկլետների ձեռք բերման նպատակով, ֆինանսական միջոցները հատկացվել են փրկարար ծառայության գնումների պլանով նախատեսված «հատուկ նպատակային այլ նյութեր» հոդվածից, քանի որ վերոնշյալ գնման առարկաների մասով անվազն 3 անգամ հայտարարվել են գնման ընթացակարգեր, որոնք չեն կայացել։

Հարկ է նաև նշել, որ 2025 թվականի ընթացքում ՆԳՆ փրկարար ծառայության կարիքների համար ձեռք են բերվել մեծաքանակ փրկարարական միջոցներ և տեխնիկա, մասնավորապես՝ 29 հրշեջ փրկարարական ավտոմեքենաներ, 309 մարտական հանդերձանք (վերջին անգամ գնում եղել է 2019 թվականին), փրկարարական ապրանքներ և պարագաներ։ Այն իր մեջ ներառում է գործիքների հավաքածու, լիցքավորիչներ, պատգարակի ներդիրներ, պատգարակներ, մոտոհղկիչներ, կրակմարիչներ, ծալվող աստիճաններ, բահեր, էլեկտրական անկյունահղկիչներ, շղթայավոր բետոնի սղոցներ, հեռադիտակ, փրկարարական և արտակարգ իրավիճակներում կիրառվող սարքեր, օձ որսալու սարքեր, մոտոպերֆերատորներ, բենզինային խոտհնձիչներ, եռոտանիներ (Tripod), փչովի նավակ, պարանի ճախարակ և այլն։ Ի դեպ, վերջին ժամանակահատվածում նման ծավալի գնումներ կատարվում են առաջին անգամ։ 2026 թվականի բյուջեով ևս Փրկարար ծառայության համար նախատեսված են միջոցներ, կատարվելու են համապատասխան գնումներ։

Բացի այդ, այս տարվա ընթացքում շահագործման է հանձնվել Ստեփանավանի հրշեջ-փրկարարական ջոկատի շենքը, իսկ Եղեգնաձորի, Բաղրամյանի ՀՓՋ-ների և Սևանի ջրափրկարարական կայանի շենքերի կառուցումը շինարարության փուլում են։

Նախարարությունն իր կարիքների համար ծառայություններ ձեռք է բերում բացառապես թափանցիկ և հաշվետվողական մրցույթային ընթացակարգով, ըստ այդմ․

Նախարարությանը վերաբերող բյուջետային ծախսերը, այդ թվում՝ գնումների ընթացակարգերը պլանավորվում են նախօրոք՝ պլանավորումն իրականացվում է «Պետական բյուջեի մասին» օրենքով սահմանված կարգով։ Ձեռքբերումների համար բյուջետային համապատասխան միջոցներ կան նաև նախատեսված 2026-2028թթ. միջնաժամկետ ծախսերի ծրագրով։

ՆԳՆ համակարգում մեկ ծառայության կարիքները մեկ այլ ծառայության կարիքների համար նախատեսված ընթացակարգերով որևէ կերպ չեն ապահովվում։

Միաժամանակ հայտնում ենք, որ իրավաչափ պայմաններում գնման ընթացակարգը կարող է չկայանալ՝ հաշվի «Գնումների մասին» Հայաստանի Հանրապետության օրենքի 37-րդ հոդվածով ներկայացված հանգամանքները։

Ըստ այդմ՝ գնման գործընթացը որոշակի պարբերականությամբ չկայանալու դեպքում արդյունավետ կառավարման տրամաբանության մեջ լիովին օրինաչափ է բյուջետային միջոցների ողջամիտ ու ժամանակին տնօրինելու կարևորությունը և համապատասխան միջոցները այլ անհրաժեշտ կարիքների ձեռքբերմանը վերաուղղելը՝ հաշվի առնելով նաև այն, որ ընթացիկ տարում տվյալ գնման դեպքում ողջմատորեն հնարավոր է ապահովել մատակարարում։

Ներքին գործերի նախարարությունը մշտապես բաց է համագործակցության համար․ կոչ ենք անում զերծ մնալ կեղծ և մանիպուլյացիոն տեղեկություններ տարածելուց և հորդորում ենք հոդվածը հրապարակելուց առաջ տեղեկությունը ճշտել Ներքին գործերի նախարարությունից»։

Հետևեք մեզ՝ այստեղ