Այն 3 բառը, որ նա երբեք չի ցանկանում լսել քո շուրթերից

ԼԱՅՖ 5 Փետրվար, 2016 22:37

Shabat.am-ը գրում է.

Գուցե քո մտքով իսկ չի անցնում, բայց այս արտահայտությունն ակնթարթորեն հիասթափեցնում է տղաներին, դեռ չենք նշում դրա բացասական ազդեցությունը քո ինքնագնահատականի վրա: Գրող Ջոշ Այելոն ցանկանում է մեկընդմիշտ վերջ դնել կանանց շրջանում լայն տարածում ունեցող այս արտահայտության կիրառմանը:

Եթե ցանկանում ես հիասթափեցնել տղամարդուն, արտաբերիր այս կախարդական բառերը:

Այս արտահայտությունը տղամարդկանց համար աղջիկների շուրթերից հնչող ամենանյարդայնացնող արտահայտություններից է և ապահովում է տրամադրության ակնթարթային անկում: Ցանկանո՞ւմ ես համոզվել, հարցրու նրան. «Այս հագուստը գիրացնո՞ւմ է ինձ»: Այո՛, տղամարդիկ ամեն ինչ կտան, որպեսզի չլսեն այդ 3 բառը. «Ես գեր եմ»: Պատկերացրու ամենավատ բանը, որ կարող ես լսել տղամարդուց (օրինակ՝ նման սարսափելի արտահայտություններ՝ «Իրականում ես սիրում եմ քո քրոջը», «Ես մարդ եմ սպանել...») բազմապատկիր այս արտահայտությունները 10-ով, ավելացրու հանգստյան օրերին հեռուստացույցով միայն մարզական հաղորդումներ դիտելը և կհասկանաս, թե որքան սարսափելի է լսել «Ես գեր եմ» արտահայտությունն այն աղջկա շուրթերից, որին մենք սիրում ենք:

Որպես ապացույց մեջբերեմ իմ ընկերներից մեկի տեսակետը. «Երբ աղջիկն ասում է, որ գեր է, ես միայն մտածում եմ այդ թեման հնարավորինս շուտ փակելու մասին: Նա կա՛մ ցանկանում է հաճոյախոսություն լսել, կա՛մ իրոք ավելորդ կիլոգրամներ է ձեռք բերել, ինչի պարագայում նույնպես ոչինչ անել չեմ կարող. կա՛մ որևէ միջոց ձեռնարկիր ավելորդ քաշի դեմ, կա՛մ դադարիր մտահոգվել և սիրիր քեզ այնպիսին, ինչպիսին կաս»: «Ինչն էլ լինի պատճառը, իմ միակ ցանկությունը թեման հնարավորինս շուտ փակելն է»,- շարունակում է նա: Ճիշտ է, ես կին չեմ, բայց ենթադրում եմ, որ «Խնդրում եմ, փակիր թեման» արտահայտությունն այն չէ, ինչ շատ աղջիկներ ակնկալում են լսել իրենց սիրելիից նման պարագայում: Մինչդեռ դա միակ խելամիտ արձագանքն է, և ահա՝ ինչու.

Երբ դուք ասում եք «Ես գեր եմ», մենք ինքներս մեզ անօգնական ենք համարում։

Այդ արտահայտությունը լսելիս մենք գիտակցում ենք, որ անկարող ենք ձեզ հակառակն ապացուցել՝ թեկուզ տասն անգամ կրկնեք՝ որքան կրքոտ ու անկրկնելի եք: Ձեր ինքնագնահատականն ու ինքնավստահությունն արդեն ճեղքեր են տվել, և ամենակարևորը՝ ձեր իսկ նախաձեռնությամբ: Իսկ տղամարդիկ տանել չեն կարող անօգնական լինելու զգացումը:
Միասին անցկացրած հաճելի ժամանակի երաշխավորված տապալում։

«Երբ աղջիկն արտաբերում է այդ խոսքերը, երեկոն (նաև գիշերը) միանշանակ տապալված է,- խոստովանում է իմ ընկեր Ալեքսը: -Նա արդեն իսկ անինքնավստահ է և վատ տրամադրությամբ. տհաճ և անելանելի իրավիճակ»: «Դա գրեթե նույնն է, ինչ ասես, որ դու տգեղ ես»: «Իհարկե, մենք ամեն կերպ պետք է ձեզ հակառակը համոզենք, այլապես խոսակցությունը կարող է վերածվել լուրջ կոնֆլիկտի»:

Դուք կասկած եք առաջացնում մեր մեջ։

Քո ընկերն ունի աչքեր և ի՛ր կարծիքը, այն է՝ դու գեր չես: Բայց եթե մշտապես կրկնես այդ արտահայտությունը, նա կսկսի կասկածել այդ ակնհայտ փաստի վերաբերյալ: Տարիներ առաջ ես հանդիպում էի մի գեղեցիկ աղջկա հետ, ով համոզված էր, որ ավելորդ քաշ ունի: Նա այնքան հաճախ էր կրկնում իր՝ գեր լինելու հանգամանքը, որ երբ իմ ծնողներն այցելեցին ինձ, ես չծանոթացրի նրանց այդ աղջկա հետ: Ինչո՞ւ: Որովհետև ես կասկածում էի, թե արդյոք իրեն նայելիս ես տեսնում էի նույնը, ինչ կտեսնեին ուրիշ, առավել օբյեկտիվ մարդիկ: Անընդհատ կրկնելով «Ես գեր եմ» արտահայտությունը՝ դուք տղայի մտքում միավորում եք ձեր և գեր լինելու փաստը: Եվ երբ այդ կապը հաստատված է, այն վերացնելը կարող է բարդություն առաջացնել:

Ձեր անվստահությունը փոխանցվում է նաև մեզ։

Ընդունում եմ, որ կանանց վրա մեծ ճնշում գոյություն ունի՝ կատարյալ տեսք ունենալու առումով: Բայց պետք չէ մոռանալ, որ տղաների վրա այդ ճնշումը նույնպես անդրադառնում է: «Երբ աղջիկն ասում է, որ գեր է,- շարունակում է խոստովանություններն իմ ընկերը,- ես սկսում եմ մտածել, սպասիր... նա գե՞ր է: Իսկ մի փոքր մտածելուց հետո իմ մտքում ծագում է «պայծառ» միտքը. եթե նա գեր է, ուրեմն ես էլ եմ գեր: Վաղն ևեթ պետք է մարզասրահ այցելեմ»:

Այսինքն՝ այդ արտահայտությունը տղամարդուն կարող է ոչ միայն նյարդայնացնել, այլև ստիպել, որ ինքն իրեն նույնպես գեր զգա: Իսկ դա իսկապես անկում է: Այնպես որ, երբ հաջորդ անգամ այդ բառերը արտաբերելու անդիմադրելի ցանկություն առաջանա (նույնիսկ սովորույթի ուժով), փորձեք պայքարել դրա դեմ: Եվ եթե նույնիսկ դուք մի քանի ավելորդ կիլոգրամ եք ձեռք բերել, դա ձեր ընկերոջը հավանաբար չի հետաքրքրում: Այնպես որ, վերցրեք այդ բեռը ձեր ընկերոջ ուսերից և մի՛ շոշափեք այդ թեման:

http://www.cosmo.am/am