«Լավագույնին որոշում են պրոֆեսիոնալները». կայացավ Պրոֆեսիոնալ Գիլդիաների 2-րդ մրցանակաբաշխությունը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երեկ՝ ապրիլի 16-ին, Հայ կինոյի օրվա առթիվ Կինոգործիչների միությունում կայացավ Պրոֆեսիոնալ Գիլդիաների 2-րդ մրցանակաբաշխությունը, որի ընթացքում հայտնի դարձան տարվա լավագույնները:

Հայաստանի Կինոգործիչների միության նախագահի գլխավոր խորհրդական Արայիկ Մանուկյանի խոսքով՝ մրցանակաբաշխության նպատակը պրոֆեսիոնալ գիլդիաների կայացումն է Հայաստանում:

«Երբ Հարություն Խաչատրյանն ընտրվեց Կինոգործիչների միության նախագահ և մեր թիմը եկավ Կինոյի տուն, մեր երազանքն էր, որ Հայաստանում ստեղծվեն Պրոֆեսիոնալ կինոգիլդիաներ: Սա ընդունված գործունեության ձև է կինոյի աշխարհում, որի միջոցով կարգավորվում են բոլոր խաղի կանոնները, որ գոյություն ունի կինոյի աշխարհում»,- Tert.am Life-ի հետ զրույցում մրցանակաբաշխությունից առաջ ասաց Արայիկ Մանուկյանը:

Ըստ նրա՝ սա կինոյի աշխարհի մարդկանց համախմբման յուրօրինակ ձև է:

«Սա ամենահարգի մրցանակաբաշխությունն է, որովհետև պրոֆեսիոնալներն իրենք են որոշում լավագույնին: Ներկայացված ֆիլմերը դիտել է ժյուրին, ամեն գիլդիա իր կանոնակարգով ու որոշման չափանիշով»,- պարզաբանեց Արայիկ Մանուկյանը:

Մրցանակաբաշխության քվեարկությունն անցկացվել է փակ ձևաչափով՝ էլեկտրոնային տարբերակով, իսկ արդյունքը բոլորի համար անակնկալ է եղել:

«Գիլդիաների կարևորությունն այն է, որ մեր փոքր, բայց ակտիվորեն զարգացող համայնքում մասնագետները հնարավորություն են ստանում շփվելու, համագործակցության հարթակ ստեղծելու և ընդհանուր պայմանավորվածություններ ձեռք բերելու։ Եղել է մի ժամանակաշրջան, երբ ոլորտը գրեթե չէր զարգանում. չկային խաղի հստակ կանոններ։ Այսօր գիլդիաներն ուղղակի փորձ չեն, այլ իրական քայլ համակարգվածության ստեղծման ճանապարհին։ Դրանք օգնելու են ձևավորել միասնական մոտեցումներ, պայմանավորվածություններ և հավասար խաղի կանոններ՝ անկախ անուններից։

Կարևորը՝ հավասարության սկզբունքը, որը պետք է գործի բոլորի համար։ Վերջին տարիներին նկատվում է աճ՝ նկարահանվում են ավելի շատ ֆիլմեր, ոլորտն ակտիվանում է, և մասնագետներն իրենց ավելի պաշտպանված ու գնահատված են զգում»,- Tert.am Life-ի հետ զրույցում նշեց պրոդյուսեր Արման Միտոյանը:

Նրա խոսքով՝ գիլդիաների ստեղծումը մեծապես նպաստում է այս ամենին։ «Քվեարկությունն անցկացվել է փակ ձևաչափով՝ էլեկտրոնային տարբերակով, իսկ արդյունքը բոլորիս համար անակնկալ էր»,- վստահեցրեց Արման Միտոյանը։

Հայ կինոյի օրվա առթիվ ՀՀ կրթության, գիտության, մշակույթի և սպորտի նախարարության մեդալով են պարգևատրվել Հայաստանի կինոյի հիմնադրամի կինոժառանգության բաժնի գլխավոր ֆոնդապահ Լարիսա Ստեփանյանը՝ հայկական կինոժառանգության պահպանման և կինոարվեստի զարգացման գործում ունեցած ներդրման համար և Ծովինար Սողոմոնյանը՝ վավերագրական կինոյի զարգացման և հանրահռչակման գործում նշանակալի ավանդի և ներդրման համար: Ոլորտի այլ ներկայացուցիչների հանձնվել են պատվոգրեր և շնորհակալագրեր:

Մրցանակաբաշխության ժամանակ Աննա Մաքսիմի «Մեդալի հակառակ կողմը» ֆիլմն առաջատար դարձավ՝ ստանալով 4 մրցանակ:

Խաղարկային լիամետրաժ ֆիլմի լավագույն ռեժիսոր՝ Աննա Մաքսիմ

Խաղարկային լիամետրաժ ֆիլմի լավագույն սցենարիստ՝ Աննա Մաքսիմ

Խաղարկային լիամետրաժ ֆիլմի լավագույն բեմադրող օպերատոր՝ Սուրեն Թադևոսյան («Մեդալի հակառակ կողմը»)

Խաղարկային լիամետրաժ ֆիլմի լավագույն դիմահարդար՝ Հասմիկ Ղազարյան («Մեդալի հակառակ կողմը»)

Հեղինակ՝ Անի Մնացականյան

Հետևեք մեզ՝ այստեղ